കൈമനം വനിതാ പോളിടെക്നിക് കോളേജിലെ അലുമ്നി അസോസിയേഷന്റെ ജനറൽ ബോഡി യോഗം ഏപ്രിൽ 19ന് ഉച്ചയ്ക്ക് രണ്ടിന് സെമിനാർ ഹാളിൽ ചേരുമെന്ന് പ്രിൻസിപ്പാൾ അറിയിച്ചു.

ലോക്‌സഭാ തിരഞ്ഞെടുപ്പുമായി ബന്ധപ്പെട്ട് സംസ്ഥാന തിരഞ്ഞെടുപ്പ് കമ്മീഷൻ പൊതുജനങ്ങൾക്കായി ക്വിസ് മത്സരം സംഘടിപ്പിക്കുന്നു. ഏപ്രിൽ 18 ന് രാവിലെ 10 ന് എറണാകുളം കളക്ടറേറ്റ് സ്പാർക്ക് ഹാളിലാണ്  ജില്ലയിലെ മത്സരം സംഘടിപ്പിക്കുന്നത്. എറണാകുളം, കോട്ടയം, ഇടുക്കി ജില്ലയിലുള്ളവർക്ക് മത്സരത്തിൽ പങ്കെടുക്കാം. മത്സര ദിവസം സ്പാർക്ക് ഹാളിൽ നേരിട്ടെത്തി രജിസ്റ്റർ ചെയ്യാം.

ഇതില്‍ വിജയിക്കുന്നവര്‍ക്കുള്ള ഫൈനല്‍ മത്സരം തിരുവനന്തപുരത്ത് നടക്കും.

ലോക്സഭാ തിരഞ്ഞെടുപ്പിനോടനുബന്ധിച്ച് സ്വീപ്പിന്റെ  നേതൃത്വത്തിൽ ഫോർട്ട് കൊച്ചി മൂലംകുഴി ബീച്ചിൽ സംഘടിപ്പിച്ച കയാക്കിംഗ് സബ് കളക്ടർ കെ. മീര ഉദ്ഘാടനം ചെയ്തു. പൊതുജനങ്ങളേയും സഞ്ചാരികളേയും ആകർഷിക്കുന്നതിനും വോട്ടിംഗ് അവബോധം സൃഷ്ടിക്കുന്നതിനുമാണ് കയാക്കിംഗ് സംഘടിപ്പിച്ചത്.

പരിപാടിയിൽ പങ്കെടുത്ത എല്ലാവർക്കും സൗജന്യമായി കയാക്കിംഗ് ചെയ്യുവാനുള്ള അവസരം ഒരുക്കിയിരുന്നു. ജില്ലയിൽ പരമാവധി വോട്ടിംഗ് പങ്കാളിത്തം ഉറപ്പാക്കുക എന്ന ലക്ഷ്യത്തോടെ വിവിധ വോട്ടർ ബോധവത്കരണ പ്രവർത്തനങ്ങളാണ് സ്വീപ്പ് നടത്തിവരുന്നത്.

ചാവക്കാട് വടക്കാഞ്ചേരി റോഡില്‍ ഓട്ടുപാറ ജങ്ഷന്‍ മുതല്‍ കാഞ്ഞിരക്കോട് തോട്ടുപാലം വരെ നിര്‍മാണ പ്രവൃത്തികള്‍ ഇന്ന് (ഏപ്രില്‍ 17) രാത്രി ഏഴുമുതല്‍ ആരംഭിക്കുന്നതിനാല്‍ ഈ വഴിയുള്ള ഗതാഗതം ഭാഗിതകമായി തടസപ്പെടുമെന്ന് വടക്കാഞ്ചേരി അസി. എന്‍ജിനീയര്‍ അറിയിച്ചു.

പുന്നയൂര്‍ക്കുളം- ചങ്ങരംക്കുളം റോഡില്‍ അറ്റക്കുറ്റപണി നടക്കുന്നതിനാല്‍ ഈ റോഡിലൂടെയുള്ള ഗതാഗതം പൂര്‍ണമായും നിരോധിച്ചതായി ചാവക്കാട് അസി. എന്‍ജിനീയര്‍ അറിയിച്ചു.

തൃശ്ശൂര്‍ ലോക്‌സഭാ മണ്ഡലത്തിലെ തിരഞ്ഞെടുപ്പ് ജോലികള്‍ക്കായി നിയോഗിക്കപ്പെട്ടിട്ടുളള ഉദ്യോഗസ്ഥര്‍ക്കുള്ള രണ്ടാംഘട്ട പരിശീലനം നടക്കുന്ന കേന്ദ്രങ്ങളില്‍ തിരഞ്ഞെടുപ്പ് ഓഫീസര്‍കൂടിയായ ജില്ലാ കളക്ടര്‍ വി.ആര്‍ കൃഷ്ണ തേജ സന്ദര്‍ശനം നടത്തി പുരോഗതി വിലയിരുത്തി. എല്ലാവരും ഒത്തൊരുമിച്ച് പ്രവര്‍ത്തിക്കണമെന്നും തിരഞ്ഞെടുപ്പ് മികച്ച രീതിയില്‍ പൂര്‍ത്തിയാക്കുന്നതിനായി എല്ലാ ഉദ്യോഗസ്ഥരുടെയും പിന്തുണ വേണമെന്നും ജില്ലാ കളക്ടര്‍ പരിശീലനത്തില്‍ പങ്കെടുക്കുന്ന ഉദ്യോഗസ്ഥരോട് അഭ്യര്‍ത്ഥിച്ചു. മികച്ചരീതിയില്‍ പരിശീലനം നടത്തിയ പരിശീലകരെ ജില്ലാ കളക്ടര്‍ വി.ആര്‍ കൃഷ്ണതേജ അഭിനന്ദിച്ചു.

2024 ലോക്‌സഭ തിരഞ്ഞെടുപ്പുമായി ബന്ധപ്പെട്ട് തിരഞ്ഞെടുപ്പ് ജോലികള്‍ക്കായി നിയോഗിക്കപ്പെട്ടിട്ടുളള ഉദ്യോഗസ്ഥര്‍ക്കുള്ള രണ്ടാംഘട്ട പരിശീലനം ജില്ലയിലെ വിവിധ പരിശീലന കേന്ദ്രങ്ങളില്‍ തുടങ്ങി. തൃശ്ശൂര്‍ ലോക്‌സഭാ മണ്ഡലത്തിലെ തിരഞ്ഞെടുപ്പ് ജോലികള്‍ക്കായി നിയോഗിക്കപ്പെട്ടിട്ടുളള ഉദ്യോഗസ്ഥര്‍ക്കുള്ള രണ്ടാംഘട്ട പരിശീലനം നടക്കുന്ന തൃശ്ശൂര്‍ ഗവ. എഞ്ചിനീയറിംഗ് കോളേജ്, തൃശ്ശൂര്‍ സെന്റ്. തോമസ് കോളേജ് എന്നീ പരിശീലന കേന്ദ്രങ്ങളിലെ വോട്ടേഴ്‌സ് ഫെസിലിറ്റേഷന്‍ സെന്ററുകളിലും പൊതു നിരീക്ഷക പി. പ്രശാന്തി സന്ദര്‍ശനം നടത്തി പുരോഗതി വിലയിരുത്തി.

ലോക്‌സഭാ തിരഞ്ഞെടുപ്പ്

പൊതു തിരഞ്ഞെടുപ്പിന് തൃശൂര്‍ ലോക്‌സഭാ മണ്ഡലത്തിലെ പോളിങ് ബൂത്തുകളിലേക്കുള്ള ഇ.വി.എം, വിവിപാറ്റ് എന്നിവയുടെ രണ്ടാംഘട്ട റാന്‍ഡമൈസേഷന്‍ പൂര്‍ത്തിയായി. ജില്ലാ തിരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ വി.ആര്‍ കൃഷ്ണതേജയുടെ നേതൃത്വത്തില്‍ പൊതു നിരീക്ഷക പി. പ്രശാന്തി, രാഷ്ട്രീയപാര്‍ട്ടി പ്രതിനിധികള്‍ എന്നിവരുടെ സാന്നിധ്യത്തിലാണ് റാന്‍ഡമൈസേഷന്‍ പ്രക്രിയ നടത്തിയത്.  

തൃശൂര്‍ പൂരം എക്‌സിബിഷനിലെ കുടുംബശ്രീ ഉത്പന്ന വിപണന സ്റ്റാളിന്റെ ഉദ്ഘാടനം ജില്ലാ മിഷന്‍ കോ-ഓര്‍ഡിനേറ്റര്‍ ഡോ. എ.കവിത നിര്‍വഹിച്ചു.  ജില്ലയിലെ 50 ല്‍ പരം സംരംഭകരുടെ 200 ല്‍ അധികം ഉത്പന്നങ്ങളാണ് വിപണനത്തിനായി ഉള്ളത്.

തൃശൂര്‍ പൂരത്തോടനുബന്ധിച്ച് ഏപ്രില്‍ 19 പുലര്‍ച്ചെ രണ്ടു മണി മുതല്‍ 20ന് ഉച്ചയ്ക്ക് രണ്ടുവരെ (36 മണിക്കൂര്‍) തൃശൂര്‍ കോര്‍പറേഷന്‍ പരിധിയില്‍ ഉള്‍പ്പെട്ട എല്ലാ മദ്യവില്‍പനശാലകളും കള്ള് ഷാപ്പ്, ബിയര്‍ ആന്‍ഡ് വൈന്‍ പാര്‍ലറുകള്‍, ബാര്‍ എന്നിവ പൂര്‍ണമായും അടച്ചിടുന്നതിനും മദ്യം, മറ്റു ലഹരി വസ്തുക്കളുടെ വില്‍പനയും നിരോധിച്ച് ജില്ലാ കലക്ടര്‍ ഉത്തരവിട്ടു. നേരത്തെ തൃശൂര്‍ താലൂക്ക് പരിധിയില്‍ ഏര്‍പ്പെടുത്തിയ മദ്യനിരോധന ഉത്തരവാണ് തൃശൂര്‍ കോര്‍പറേഷന്‍ പരിധിയില്‍ എന്നാക്കി ഭേദഗതി ചെയ്തത്.