മാലിന്യങ്ങള്‍ ശേഖരിക്കും
കട്ടപ്പന നഗരസഭ പ്രദേശത്തെ വ്യാപാര സ്ഥാപനങ്ങള്‍, ബാങ്കുകള്‍, ഓഫീസുകള്‍, സ്‌കൂളുകള്‍ തുടങ്ങിയവയില്‍ നിന്ന് മാലിന്യങ്ങള്‍ തരം തിരിച്ച് ശേഖരിക്കുന്ന സമ്പ്രദായം ജൂലൈ 1 മുതല്‍ നിലവില്‍ വരുമെന്ന് നഗരസഭാ ചെയര്‍മാന്‍ ജോയി വെട്ടിക്കുഴി അറിയിച്ചു. വ്യാപാര സ്ഥാപനങ്ങളിലെയും, മറ്റ് സ്ഥാപനങ്ങളിലെയും മാലിന്യങ്ങള്‍ നീക്കം ചെയ്യുന്നതിന് നഗരസഭ ആരോഗ്യവിഭാഗത്തില്‍ മുന്‍കൂട്ടി രജിസ്റ്റര്‍ ചെയ്യണം. നാളിതുവരെ രജിസ്‌ട്രേഷന്‍ നടപടികള്‍ പൂര്‍ത്തിയാക്കാത്ത ഓഫീസുകള്‍, കടകള്‍, ബാങ്കുകള്‍, സ്‌കൂളുകള്‍ തുടങ്ങിയവര്‍ 'എന്റെ നഗരം സുന്ദര നഗരം' പദ്ധതിയില്‍ രജിസ്‌ട്രേഷന്‍ നടത്തി അംഗത്വം എടുക്കണം.
രജിസ്റ്റര്‍ ചെയ്തിരിക്കുന്ന സ്ഥാപനങ്ങള്‍ക്ക് മാലിന്യങ്ങള്‍ തരം തിരിച്ച് നഗരസഭ വാഹനത്തില്‍ നല്‍കുന്നതിന് ജൂലൈ 1 മുതല്‍ ക്രമീകരണങ്ങള്‍ ഏര്‍പ്പെടുത്തും. മാലിന്യങ്ങള്‍, നിരത്തുകള്‍, ജലാശയങ്ങള്‍, പൊതു സ്ഥലങ്ങള്‍ എന്നിവിടങ്ങളില്‍ നിക്ഷേപിക്കുന്നവര്‍ക്കെതിരെ കര്‍ശന നിയമ നടപടികള്‍ സ്വീകരിക്കും. രജിസ്റ്റര്‍ ചെയ്തിട്ടുള്ള ഗുണഭോക്താക്കളില്‍ നിന്ന് ജൈവ മാലിന്യങ്ങള്‍ എല്ലാ ദിവസവും ശേഖരിക്കും.
വൃത്തിയാക്കിയ പ്ലാസ്റ്റിക് എല്ലാ തിങ്കളാഴ്ചയും, വര്‍ക്‌ഷോപ്പ് മാലിന്യങ്ങള്‍ ശനിയാഴ്ചകളിലും ശേഖരിക്കും. ശേഷിക്കുന്ന മറ്റ് അജൈവ മാലിന്യങ്ങള്‍ എല്ലാ മാസത്തെയും അവസാനത്തെ വ്യാഴാഴ്ചയും ശേഖരിക്കും. ഓരോ സ്ഥാപനത്തില്‍ നിന്നും ശേഖരിക്കുന്ന മാലിന്യത്തിന്റെ അളവനുസരിച്ച് നിശ്ചയിക്കുന്ന യൂസര്‍ഫീ ഓരോ മാസവും ഗുണഭോക്താക്കള്‍ അടയ്ക്കണം. ജൈവ മാലിന്യങ്ങള്‍ എല്ലാ ദിവസവും ഉച്ചകഴിഞ്ഞ് 4 മുതല്‍ 6 വരെ സ്ഥാപനങ്ങളുടെ മുമ്പില്‍ നിന്ന് നഗരസഭാ വാഹനത്തില്‍ ശേഖരിക്കും.
- Log in to post comments