പോളിയോ വൈറസ് നിർമാർജനം ലക്ഷ്യമിട്ടു നടത്തുന്ന പൾസ് പോളിയോ ഇമ്മ്യൂണൈസേഷൻ പരിപാടിയുടെ ഭാഗമായി ജില്ലയിലെ അഞ്ചു വയസില്‍ താഴെയുള്ള കുട്ടികള്‍ക്ക് പോളിയോ പ്രതിരോധ തുള്ളിമരുന്ന് നല്‍കി. ഏറ്റുമാനൂർ കുടുംബാരോഗ്യ കേന്ദ്രത്തിൽ നടന്ന ചടങ്ങില്‍ ഏറ്റുമാനൂർ നഗരസഭാ അധ്യക്ഷ ലൗലി ജോർജ്ജ്  ജില്ലാതല ഉദ്ഘാടനം നിർവഹിച്ചു.

ബൂത്തുകളിൽ തുള്ളി മരുന്ന് നൽകാൻ കഴിയാത്ത കുഞ്ഞുങ്ങൾക്ക് ഒക്ടോബർ 13, 14 തീയതികളിൽ വോളണ്ടിയർമാർ വീടുകളിലെത്തി തുള്ളി മരുന്ന് നൽകും.
അതിഥി തൊഴിലാളികളുടെ ക്യാമ്പുകൾ, വിനോദ സഞ്ചാരകേന്ദ്രങ്ങൾ എന്നിവിടങ്ങളിലെ മൊബൈൽ ബൂത്തുകളും 13,14 തീയതികളില്‍ പ്രവർത്തിക്കും.

  അഞ്ചുവർഷത്തെ വികസന നേട്ടങ്ങൾ ജനസമക്ഷം അവതരിപ്പിച്ച്  അയ്മനം ഗ്രാമപഞ്ചായത്ത് വികസന സദസ്.
ഈ കാലയളവിൽ പഞ്ചായത്തിൽ സംസ്ഥാന സർക്കാരിൻ്റെ ഭവന നിർമാണ പദ്ധതിയായ ലൈഫിലുടെ 141 പേർക്ക് വീട്  നൽകി. 60 കുടുംബങ്ങൾക്കി വീടു നിർമാണം പുരോഗമിക്കുകയാണ്. 
 
 പഞ്ചായത്തിൽ ആകെ യുണ്ടായിരുന്ന 21 അതിദരിദ്രരെയും അതിദാരിദ്ര്യനിർമാർജ്ജന പദ്ധതിയിലൂടെ ആ സ്ഥിതിയിൽ നിന്ന്
 മോചിപ്പിച്ചു.  പഞ്ചായത്ത് പരിധിയിലെ എല്ലാ സർക്കാർ സ്കൂളുകളിലും അടിസ്ഥാന സൗകര്യങ്ങൾ മെച്ചപ്പെടുത്തി.  ഭിന്നശേഷിക്കാരായ കുട്ടികൾക്ക് പഠനത്തിനായി നിരവധി പദ്ധതികൾ നടപ്പിലാക്കി. ഇതിനായി നാലു കോടിയോളം രൂപ ചെലവഴിച്ചു.

 ടി.വി. പുരം ഗ്രാമപഞ്ചായത്തില്‍ ചെമ്മനത്തുകരയില്‍ നിര്‍മാണം പൂര്‍ത്തിയായ സ്മാര്‍ട്ട് കൃഷിഭവന്‍  തിങ്കളാഴ്ച ( ഒക്ടോബർ 13)രാവിലെ ഒൻപതിന് കാര്‍ഷിക വികസന- കര്‍ഷകക്ഷേമ വകുപ്പ് മന്ത്രി പി. പ്രസാദ് ഉദ്ഘാടനം ചെയ്യും. സി.കെ ആശ എം.എല്‍.എ അധ്യക്ഷത വഹിക്കും. 

ഗ്രാമപഞ്ചായത്ത് അനുവദിച്ച ആറു സെന്റ് സ്ഥലത്ത് രണ്ടു നിലകളിലായാണ് സ്മാർട് കൃഷിഭവൻ നിർമിച്ചത്.
നബാർഡ് ആർ.ഐ.ഡി.എഫ്  2022 - 2023 സാമ്പത്തിക വർഷത്തിൽ അനുവദിച്ച 1.41 കോടി രൂപയാണ് പദ്ധതിയ്ക്കായി ചെലവഴിച്ചത്. 

മാടപ്പള്ളി ബ്ലോക്ക് പഞ്ചായത്തിലെ ഭിന്നശേഷി-ഓട്ടിസം തെറാപ്പി സെന്ററിന്റെ ഉദ്ഘാടനം ഒക്ടോബർ 13 (തിങ്കളാഴ്ച) ഉച്ചകഴിഞ്ഞ് രണ്ടിന് ബ്ലോക്ക് പഞ്ചായത്ത് ഹാളിൽ ഗവൺമെൻ്റ് ചീഫ് വിപ്പ് ഡോ. എൻ. ജയരാജ് നിർവഹിക്കും. അഡ്വ. ജോബ് മൈക്കിൾ എം.എൽ.എ അധ്യക്ഷത വഹിക്കും. സെന്റ് സേവ്യഴ്സ് ഫെറോനാപ്പള്ളി വികാരി ഫാ. സെബാസ്റ്റ്യൻ പുന്നശ്ശേരി അനുഗ്രഹപ്രഭാഷണം നിർവഹിക്കും.

ബ്ലോക്കുതല ഭിന്നശേഷി കലാമേള  രാവിലെ 10നും ഭിന്നശേഷി വിഭാഗത്തിൽപ്പെട്ടവരുടെ ഗാനമേളയും സമാപന സമ്മേളനവും സമ്മാനദാനവും ഉച്ചകഴിഞ്ഞ് മൂന്നിനും നടക്കും.

പള്ളിക്കത്തോട്ടിലെ വികസനസദസ്സ് രാവിലെ 10.30ന്  ഗ്രാമപഞ്ചായത്ത് കമ്മ്യൂണിറ്റി ഹാളിൽ സർക്കാർ ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്റ് മഞ്ജു ബിജു അധ്യക്ഷത വഹിക്കുന്ന ചടങ്ങിൽ പാമ്പാടി ബ്ലോക്ക് പഞ്ചായത്ത് പ്രസിഡന്റ് ബെറ്റി റോയ് മുഖ്യപ്രഭാഷണം നിർവഹിക്കും. ആസൂത്രണസമിതി ഉപാധ്യക്ഷൻ അഡ്വ. ബി. അശോക് ഗ്രാമപഞ്ചായത്ത് പ്രോഗ്രസ് റിപ്പോർട്ട് പ്രകാശനം ചെയ്യും.

തിടനാട് ഗ്രാമപഞ്ചായത്തിലെ വികസന സദസ് തിങ്കളാഴ്ച (ഒക്ടോബർ 13) രാവിലെ 10.30 ന് അഡ്വ. സെബാസ്റ്റ്യൻ  കുളത്തുങ്കൽ എം. എൽ. എ. ഉദ്ഘാടനം ചെയ്യും. ഗ്രാമപഞ്ചായത്ത് ഹാളിൽ നടക്കുന്ന പരിപാടിയിൽ ഗ്രാമപഞ്ചായത്ത് പ്രസിഡൻറ് സ്കറിയ ജോസഫ് പൊട്ടനാനി അധ്യക്ഷത വഹിക്കും. സംസ്ഥാന സർക്കാരിന്റെ വികസന നേട്ടങ്ങൾ റിസോഴ്സ് പേഴ്സൺ ജയകുമാറും ഗ്രാമപഞ്ചായത്തിന്റെ വികസന നേട്ടങ്ങൾ ഗ്രാമപഞ്ചായത്ത് സെക്രട്ടറി പി.പി. മണിയപ്പനും അവതരിപ്പിക്കും. തുടർന്ന് ഭാവി വികസന നേട്ടങ്ങളെ കുറിച്ച് തുറന്ന ചർച്ചയും നടക്കും.

മാഞ്ഞൂർ ഗ്രാമപഞ്ചായത്തിലെ  വികസന സദസ്സ് തിങ്കളാഴ്ച (ഒക്ടോബർ 13) രാവിലെ 9.30 ന് ജില്ലാ പഞ്ചായത്തം​ഗം ജോസ് പുത്തൻകാലാ ഉദ്ഘാടനം ചെയ്യും. ​ഗ്രാമപഞ്ചായത്ത് കമ്മ്യൂണിറ്റി ഹാളിൽ നടക്കുന്ന പരിപാടിയിൽ ഗ്രാമപഞ്ചായത്ത് പ്രസിഡൻറ് കോമളവല്ലി രവീന്ദ്രൻ ആധ്യക്ഷ്യം വഹിക്കും.

ബ്ലോക്ക് പഞ്ചായത്ത് പ്രസിഡന്റ് രാജു ജോൺ ചിറ്റേത്തും ജില്ലാ പഞ്ചായത്തം​ഗം നിർമ്മലാ ജിമ്മിയും മുഖ്യപ്രഭാഷണം നടത്തും. പഞ്ചായത്തിന്റെ  വികസന നേട്ടങ്ങൾ ഗ്രാമപഞ്ചായത്ത് സെക്രട്ടറി പി.എച്ച്. ഷീജാബീവി അവതരിപ്പിക്കും. തുടർന്ന് ഭാവിവികസന നേട്ടങ്ങളേക്കുറിച്ച് തുറന്ന ചർച്ച നടക്കും. 

 ചെമ്പ് ഗ്രാമപഞ്ചായത്തിലെ വികസന സദസ്സ് തിങ്കളാഴ്ച ഉച്ചയ്ക്ക് രണ്ടിന് കാട്ടിക്കുന്ന് നാസ് ഓഡിറ്റോറിയത്തിൽ സി.കെ ആശ എം.എൽ.എ ഉദ്ഘാടനം ചെയ്യും. 
ഗ്രാമപഞ്ചായത്ത് പ്രസിഡൻറ് സുകന്യ സുകുമാരൻ അധ്യക്ഷത വഹിക്കും.

പഞ്ചായത്തിന്റെ 2020- 25 വർഷത്തെ വികസന നേട്ടങ്ങൾ ഗ്രാമപഞ്ചായത്ത് സെക്രട്ടറി എൻ.അനൂപും സംസ്ഥാന സർക്കാരിൻറെ വികസന നേട്ടങ്ങൾ തദ്ദേശസ്വയംഭരണ വകുപ്പ് റിസോഴ്സ് പേഴ്സണും അവതരിപ്പിക്കും. തുടർന്ന് ഭാവി വികസനങ്ങളേക്കുറിച്ച് തുറന്ന ചർച്ചയും നടക്കും. 

 കേരളത്തിൻ്റെ സമഗ്ര പുരോഗതി ലക്ഷ്യമിട്ടുള്ള പ്രവർത്തനങ്ങളാണ് സംസ്ഥാന സർക്കാർ ആവിഷ്കരിച്ചു നടപ്പാക്കുന്നതെന്ന്  സഹകരണം -തുറമുഖം- ദേവസം വകുപ്പുമന്ത്രി വി. എൻ. വാസവൻ പറഞ്ഞു. അയ്മനം ഗ്രാമപഞ്ചായത്തിലെ വികസനസദസ്  ഉദ്ഘാടനം ചെയ്യുകയായിരുന്നു അദ്ദേഹം. അതിദരിദ്രർ ഇല്ലാത്ത സംസ്ഥാനമായി നവംബർ ഒന്നിന് സംസ്ഥാനത്തെ പ്രഖ്യാപിക്കുമ്പോൾ നമ്മൾ ലോകത്തിന് തന്നെ മാതൃകയായി മാറുകയാണ്.

 ഈ സീസണിലെ ശബരിമല മണ്ഡല- മകരവിളക്ക് തീർഥാടനത്തിന് മുന്നോടിയായി ഇടത്താവളങ്ങളിലെ ഒരുക്കങ്ങൾ വിലയിരുത്തുന്നതിനായി ദേവസ്വം സഹകരണം തുറമുഖം വകുപ്പ് മന്ത്രി വി എൻ വാസവന്റെ അധ്യക്ഷതയിൽ ഏറ്റുമാനൂരും  എരുമേലിയിലും നിലയ്ക്കലും  തിങ്കളാഴ്ച ( ഒക്ടോബർ 13) അവലോകനയോഗങ്ങൾ ചേരും. രാവിലെ 9 30 ന് ഏറ്റുമാനൂർ കൈലാസ് ഓഡിറ്റോറിയത്തിലും 11:30ന് എരുമേലി ദേവസ്വം ഹാളിലും  ഉച്ചകഴിഞ്ഞ് 3 30 ന് നിലയ്ക്കൽ ക്ഷേത്രത്തിനു സമീപവും ആണ് യോഗങ്ങൾ.