മഴക്കാല പൂര്‍വ ശുചീകരണ പ്രവര്‍ത്തനങ്ങളുടെയും പകര്‍ച്ചവ്യാധി പ്രതിരോധ പ്രവര്‍ത്തനങ്ങളുടെയും ഭാഗമായി ഈമസം രണ്ടു ദിവസം ജില്ലയിലെ എല്ലാ സര്‍ക്കാര്‍ സ്ഥാപനങ്ങളിലും ശുചീകരണ പ്രവര്‍ത്തനങ്ങള്‍ സംഘടിപ്പിക്കുമെന്ന് ജില്ലാ കളക്ടര്‍ പി.ബി. നൂഹ് അറിയിച്ചു. 10, 11 തീയതികളിലാണ് സര്‍ക്കാര്‍ സ്ഥാപനങ്ങളും പരിസരവും ജീവനക്കാരുടെ സഹകരണത്തോടെ വൃത്തിയാക്കുന്നത്. ഇതിന് അതത് ഓഫീസ് മേലധികാരികള്‍ നടപടി സ്വീകരിക്കണമെന്നും ജില്ലാ കളക്ടര്‍ നിര്‍ദ്ദേശിച്ചു.  

മാർച്ചിലെ എസ്.എസ്.എൽ.സി പരീക്ഷയിൽ തിരുവനന്തപുരം എസ്.എം.വി മോഡൽ ഹയർ സെക്കൻഡറി സ്‌കൂളിൽ നിന്ന് 70 പേർ എഴുതിയതിൽ 69 പേർ മികച്ച വിജയം നേടി. ഇതിൽ അഞ്ച് ഭിന്നശേഷി വിദ്യാർത്ഥികളും ഉൾപ്പെടുന്നു. ദേവജിത്ത് ജയൻ എന്ന ഭിന്നശേഷി വിദ്യാർത്ഥി എല്ലാ വിഷയങ്ങൾക്കും എ പ്ലസ് നേടി.

പി.എൻ.എക്സ്. 1239/19

സംസ്ഥാന വിദ്യാഭ്യാസ ഗവേഷണ പരിശീലന സമിതി (എസ്.സി.ഇ.ആർ.ടി)യുടെ നേതൃത്വത്തിൽ സംഘടിപ്പിക്കുന്ന യോഗാ ഒളിമ്പ്യാഡിന്റെ ഉദ്ഘാടനം കായിക യുവജനക്ഷേമ ഡയറക്ടർ സഞ്ജയൻ കുമാർ നിർവഹിച്ചു. വേഗതയാർന്ന ഇന്നത്തെ ജീവിത സാഹചര്യത്തിൽ യോഗ പരിശീലനത്തിനുള്ള പ്രാധാന്യം ഏറെയാണെന്ന് അദ്ദേഹം അഭിപ്രായപ്പെട്ടു.

അരുവിക്കര മൈലം ഗവ.ജി.വി.രാജ സ്‌പോർട്‌സ് സ്‌കൂളിൽ നടക്കുന്ന ഒളിമ്പ്യാഡ് ചൊവ്വാഴ്ച സമാപിക്കും. 14 ജില്ലകളിൽ നിന്നും തെരഞ്ഞെടുക്കപ്പെട്ട 224 വിദ്യാർത്ഥികളാണ് മത്സരത്തിൽ പങ്കെടുക്കുന്നത്. യു.പി., ഹൈസ്‌കൂൾ വിഭാഗങ്ങളിലായി ആൺകുട്ടികൾക്കും പെൺകുട്ടികൾക്കും പ്രത്യേകം മത്സരമാണ് നടക്കുന്നത്.

അധ്യയനവർഷാരംഭത്തോടനുബന്ധിച്ച് വിദ്യാർഥികൾക്ക് പ്രയോജനകരമായ രീതിയിൽ കൺസ്യൂമർഫെഡ് ആരംഭിക്കുന്ന 'സ്റ്റുഡൻറ്‌സ് മാർക്കറ്റു'കൾക്ക് തുടക്കമായി. സംസ്ഥാനതല ഉദ്ഘാടനം കൺസ്യൂമർഫെഡ് ചെയർമാൻ എം. മെഹബൂബ് ഉദ്ഘാടനം ചെയ്തു. സഹകരണസംഘം രജിസ്ട്രാർ എസ്. ഷാനവാസ് അധ്യക്ഷത വഹിച്ചു. എക്‌സിക്യൂട്ടീവ് ഡയറക്ടർമാരായ ലേഖാ സുരേഷ്, കെ.പി. കുറുപ്പ്, ഡയറക്ടർ മോളി സ്റ്റാൻലി തുടങ്ങിയവർ സംബന്ധിച്ചു. കൺസ്യൂമർഫെഡ് മാനേജിംഗ് ഡയറക്ടർ ആർ. സുകേശൻ സ്വാഗതവും റീജിയണൽ മാനേജർ ടി.എസ്. സിന്ധു നന്ദിയും പറഞ്ഞു.

ലോക്‌സഭാ തിരഞ്ഞെടുപ്പിൽ കാസറഗോഡ് ലോക്‌സഭാ മണ്ഡലത്തിലെ 19. പിലാത്തറ അപ്പർ പ്രൈമറി സ്‌കൂളിലെ പോളിംഗ് സ്റ്റേഷനിൽ എൻ.പി.സലീന എന്ന പഞ്ചായത്തംഗം കളളവോട്ടു ചെയ്തതായി പ്രാഥമിക  അനേ്വഷണത്തിൽ കണ്ടെത്തിയതായും ഇത് ഗുരുതരമായ പെരുമാറ്റ ദൂഷ്യമാണെന്നും സംസ്ഥാന തിരഞ്ഞെടുപ്പ് കമ്മീഷൻ നടപടിയെടുക്കണം എന്നുമുള്ള ചീഫ് ഇലക്ടറൽ ഓഫീസറുടെ അപേക്ഷയ്ക്ക് സംസ്ഥാന തിരഞ്ഞെടുപ്പ് കമ്മീഷൻ മറുപടി നൽകി.

ജൂൺ ഒന്നു മുതൽ സംസ്ഥാന സർക്കാരിന്റെ അസാധാരണ ഗസറ്റുകൾ ഇലക്‌ട്രോണിക് രൂപത്തിൽ പ്രസിദ്ധീകരിക്കുന്നത് സംബന്ധിച്ച് സർക്കുലർ ഇറങ്ങി. ഇ ഗസറ്റിൽ പ്രസിദ്ധീകരിക്കുന്ന വിജ്ഞാപനം ഇലക്‌ട്രോണിക് രൂപത്തിലും ഡൗൺലോഡ് ചെയ്തും അച്ചടിച്ച രൂപത്തിലും ഔദ്യോഗിക ആവശ്യങ്ങൾക്ക് പരിഗണിക്കും. 

സ്‌കോൾ കേരള-നടത്തുന്ന ഡിപ്ലോമ ഇൻ കമ്പ്യൂട്ടർ ആപ്ലിക്കേഷൻ കോഴ്‌സ് (ഡി.സി.എ.) നാലാം ബാച്ചിന്റെ പൊതു പരീക്ഷ ജൂൺ രണ്ടിന് ആരംഭിക്കും. പ്രായോഗിക പരീക്ഷ ജൂൺ രണ്ട്, എട്ട്, ഒൻപത്, 15 തീയതികളിലും, തിയറി പരീക്ഷ ജൂൺ 16, 22, 23, 29, 30 തീയതികളിലും അതത് പഠന കേന്ദ്രങ്ങളിൽ നടക്കും.

ഈ വർഷത്തെ എസ്എസ്എൽസി, ടിഎച്ച്എസ്എൽസി, എസ്എസ്എൽസി (ഹിയറിങ് ഇംപയേർഡ്), ടിഎച്ച് എസ്എൽസി (ഹിയറിങ് ഇംപയേർഡ്), എഎച്ച്എസ്എൽസി പരീക്ഷാഫലങ്ങൾ പ്രസിദ്ധീകരിച്ചു. എസ്എസ്എൽസി പരീക്ഷയിൽ ഉന്നതവിദ്യാഭ്യാസത്തിനു യോഗ്യത നേടിയ വിദ്യാർഥികളുടെ ശതമാനം 98.11. ആകെ പരീക്ഷ എഴുതിയ 4,34,729 വിദ്യാർഥികളിൽ 4,26,513 വിദ്യാർഥികൾ ഉന്നതവിദ്യാഭ്യാസത്തിനു യോഗ്യത നേടി. 37,334 വിദ്യാർഥികൾ എല്ലാ വിഷയത്തിനും എ പ്‌ളസ് നേടി. എല്ലാ വിഷയത്തിനും എ ഗ്രേഡും അതിനു മുകളിലും ലഭിച്ച വിദ്യാർഥികളുടെ എണ്ണം 67,508.