പ്രളയക്കെടുതിയില്‍ റേഷന്‍ കാര്‍ഡ്‌ നഷ്‌ടപ്പെട്ടവര്‍ക്ക്‌ ഡ്യൂപ്ലിക്കേറ്റ്‌ റേഷന്‍ കാര്‍ഡിന്‌ അപേക്ഷിക്കുന്നതിനുളള മാര്‍ഗ്ഗനിര്‍ദ്ദേശങ്ങള്‍ നിലവില്‍ വന്നു. റേഷന്‍ കാര്‍ഡ്‌ പൂര്‍ണ്ണമായും നഷ്‌ടമായവര്‍ക്ക്‌ ഡ്യൂപ്ലിക്കേറ്റ്‌ കാര്‍ഡിനുളള അപേക്ഷയോടൊപ്പം സ്വയം സാക്ഷ്യപ്പെടുത്തിയ സത്യവാങ്‌മൂലം നല്‍കിയാല്‍ മതിയാകും. റേഷന്‍ കാര്‍ഡിന്‌ കേടുപാടുകള്‍ പറ്റിയവര്‍ അപേക്ഷയോടൊപ്പം കേടുപറ്റിയ റേഷന്‍ കാര്‍ഡ്‌ തിരിച്ചേല്‍പ്പിക്കണം. അപേക്ഷയോടൊപ്പം 200 രൂപയുടെ മുദ്രപത്രത്തില്‍ സത്യവാങ്‌മൂലം നല്‍കേണ്ടതില്ല.

കേരള ബുക്ക്‌സ്‌ ആന്‍ഡ്‌ പബ്ലിക്കേഷന്‍ സൊസൈറ്റി വഴിയും സംസ്ഥാന ടെക്‌സ്റ്റ്‌ ബുക്ക്‌ ഓഫീസില്‍ നിന്നും ജില്ലയില്‍ അവശേഷിച്ച സ്റ്റോക്കില്‍ നിന്നുമായി ആകെ 140276 പാഠപുസ്‌തകളാണ്‌ വിതരണം നടത്തിയത്‌. ഇതോടൊപ്പം തന്നെ പ്രളയബാധിത മേഖലകളിലെ വിദ്യാര്‍ത്ഥികള്‍ക്ക്‌ നഷ്‌ടപ്പെട്ട നോട്ടുപുസ്‌തകങ്ങളും വിദ്യാലയങ്ങള്‍ക്ക്‌ നേരിട്ടും ജില്ലാ-ഉപജില്ലാ ഓഫീസുകള്‍ വഴിയും വിതരണം നടത്തിയത്‌. ഇതുവരെ ശേഖരിച്ച ലഞ്ച്‌ ബോക്‌സ്‌, ഇന്‍സ്‌ട്രുമെന്റ്‌ ബോക്‌സ്‌, പേന, പെന്‍സില്‍, കുട എന്നിവയും വിതരണം നടത്തിയതായി വിദ്യാഭ്യാസ ഡെപ്യൂട്ടി ഡയറക്‌ടറുടെ കാര്യാലയം അറിയിച്ചു.

ജില്ലയില്‍ പ്രളയം ബാധിച്ച്‌ നാശമായ 106790 വീടുകള്‍ 106390 വീടുകള്‍ ശുചീകരിച്ച്‌ വാസയോഗ്യമാക്കി. പഞ്ചായത്ത്‌ ഡെപ്യൂട്ടി ഡയറക്‌ടറുടെ മേല്‍നോട്ടത്തില്‍ തദ്ദേശസ്വയംഭരണ സ്ഥാപനങ്ങളുമായി ചേര്‍ന്നായിരുന്നു ശുചീകരണം. വാര്‍ഡ്‌ തലത്തില്‍ നടന്ന ശുചീകരണ യജ്‌ഞത്തില്‍ നിരവധി സന്നദ്ധപ്രവര്‍ത്തകരും നാട്ടുക്കാരും പങ്കാളികളായി. അതിജീവനം എന്ന പേരിട്ട ശൂചീകരണ പരിപാടിക്കായി പ്രത്യേക ശുചിത്വസേനയ്‌ക്ക്‌ രൂപം നല്‍കികൊണ്ടായിരുന്നു പ്രളയബാധിത പ്രദേശങ്ങളില്‍ ഇടപെട്ടത്‌. ഇനി 400 വീടുകള്‍ ശുചീകരിക്കാനുണ്ട്‌ ഇതില്‍ 150 വീടുകള്‍ അടഞ്ഞു കിടക്കുന്നു. പൂര്‍ണ്ണമായി തകര്‍ന്ന വീടുകള്‍ ശൂചീകരിച്ചിട്ടില്ല.

പ്രളയബാധിതര്‍ക്കുവേണ്ടി മുഖ്യമന്ത്രിയുടെ ദുരിതാശ്വാസ നിധിയിലേക്ക്‌ സ്വരൂപിക്കുന്ന വിഭവ സമാഹരണം തദ്ദേശസ്വയംഭരണവകുപ്പു മന്ത്രി എ.സി. മൊയ്‌തീന്‍, കൃഷി വകുപ്പു മന്ത്രി അഡ്വ. വി.എസ്‌. സുനില്‍കുമാര്‍, പൊതുവിദ്യാഭ്യാസ വകുപ്പു മന്ത്രിപ്രൊഫ. സി.രവീന്ദ്രനാഥ്‌ എന്നിവര്‍ സെപ്‌തംബര്‍ 13, 15 തിയ്യതികളില്‍ വിവിധ താലൂക്കുകളിലെത്തി ഏറ്റുവാങ്ങും. എം.പിമാര്‍, എം.എല്‍.എമാര്‍, തദ്ദേശ സ്വയംഭരണ സ്ഥാപന പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ എന്നിവര്‍ ചേര്‍ന്ന്‌ സെപ്‌തംബര്‍ 10 മുതല്‍ 15 വരെ വിവിധ താലൂക്കുകളില്‍ നിന്നു ശേഖരിക്കുന്ന വിഭവമാണ്‌ മന്ത്രിമാര്‍ ചേര്‍ന്ന്‌ ഏറ്റുവാങ്ങുക. 

കേരളത്തെ പുനര്‍നിര്‍മിക്കാനുള്ള യജ്ഞ ത്തില്‍ പങ്കാളികളായി ആനാട് ഗവണ്മെന്റ് എല്‍.പി.സ്‌കൂള്‍. മുഖ്യമന്ത്രിയുടെ പ്രളയ ദുരിതാശ്വാസ നിധിയിലേക്ക് സ്‌കൂള്‍ കുട്ടികള്‍ മുഖേനയുള്ള ധനസമാഹാരത്തിനായി ഓരോ ക്ലാസ് ടീച്ചറും അതത് ക്ലാസുകളിലെ കുട്ടികളുടെ രക്ഷിതാക്കളെ ഫോണില്‍ വിളിച്ച് വിഷയത്തിന്റെ ഗൗരവം ധരിപ്പിച്ചിരുന്നു. ചൊവ്വാഴ്ച രാവിലെ തന്നെ സ്‌കൂള്‍ റേഡിയോയിലൂടെ മുഖ്യമന്ത്രിയുടെ സന്ദേശം എല്ലാ കുട്ടികളിലുമെത്തിച്ചു. തുടര്‍ന്ന് ക്ലാസ് ടീച്ചര്‍മാര്‍ അവരവരുടെ ക്ലാസുകളിലെ കൊണ്ടുവന്ന ധനസഹായം സമാഹരിച്ചു. 

ജില്ലയിലെ പ്രളയക്കെടുതിയുടെ നാശനഷ്‌ടങ്ങള്‍ വിലയിരുത്താനും സഹായം അനുവദിക്കുന്നതിനുമായി ലോകബാങ്കിന്റെ പ്രത്യേക സംഘം വ്യാഴാഴ്‌ച (സെപ്‌തംബര്‍ 13) ജില്ലയിലെത്തി വിവിധ പ്രളയബാധിത പ്രദേശങ്ങള്‍ സന്ദര്‍ശിക്കുമെന്ന്‌ ജില്ലാകളക്‌ടര്‍ ടി.വി. അനുപമ അറിയിച്ചു. കളക്‌ടറുടെ ചേംബറില്‍ ചേര്‍ന്ന വകുപ്പുതല അവലോകന യോഗത്തിലാണ്‌ കളക്‌ടര്‍ ഇക്കാര്യം അറിയിച്ചത്‌. രാവിലെ 8.30 ന്‌ ചാലക്കുടിയില്‍ ലോകബാങ്ക്‌ സംഘം നാശനഷ്‌ടങ്ങളെ കുറിച്ച്‌ അവലോകനം നടത്തും. തുടര്‍ന്ന്‌ ജില്ലയില്‍ പ്രളയം ഏറെ ബാധിച്ച വിവിധ സ്ഥലങ്ങള്‍ സന്ദര്‍ശിക്കും.

കേരള സംസ്ഥാന ഭാഗ്യക്കുറി ഏജന്റുമാരുടെയും വില്‍പ്പനക്കാരുടെയും ക്ഷേമനിധിയില്‍ അംഗങ്ങളായിട്ടുള്ളവരുടെ മക്കള്‍ക്ക് ഉപരിപഠനത്തിന് ഒറ്റത്തവണ സ്‌കോളര്‍ഷിപ്പ് നല്‍കുന്നതിന് അപേക്ഷ ക്ഷണിച്ചു.  തിരുവനന്തപുരം ജില്ലയിലെ ക്ഷേമനിധി അംഗങ്ങളുടെ അപേക്ഷകള്‍ സെപ്റ്റംബര്‍ 30 വൈകുന്നേരം അഞ്ച് മണിക്ക് മുമ്പായി ജില്ലാ ഭാഗ്യക്കുറി ക്ഷേമനിധി ഓഫീസില്‍ എത്തിക്കണമെന്ന് തിരുവനന്തപുരം ജില്ലാ ഭാഗ്യക്കുറി ക്ഷേമനിധി ഓഫീസര്‍ അറിയിച്ചു.  കൂടുതല്‍ വിവരങ്ങള്‍ക്ക് ഫോണ്‍ 0471 2325582.
(പി.ആര്‍.പി. 2293/2018)

കാക്കനാട്:  സംസ്ഥാന മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റിസ് ആന്റണി ഡൊമിനിക്കിന്റെ അധ്യക്ഷതയില്‍ കളക്ടറേറ്റില്‍ ഇന്നലെ (സെപ്റ്റംബര്‍ 11) നടന്ന ക്യാമ്പ് സിറ്റിങ്ങില്‍ 25 പരാതികള്‍ തീര്‍പ്പാക്കി.  80 കേസുകള്‍ പരിഗണിച്ചതില്‍ 40  എണ്ണത്തില്‍ കക്ഷികള്‍ ഹാജരായി.  പുതുതായി മൂന്ന് പരാതികള്‍ ലഭിച്ചു.  അടുത്ത സിറ്റിങ് ഒക്‌ടോബര്‍ ഒമ്പതിന്  കളമശ്ശേരി പി.ഡബ്ല്യു.ഡി. റെസ്റ്റ് ഹൗസില്‍ നടത്തുമെന്ന് ചെയര്‍പേഴ്‌സണ്‍ അറിയിച്ചു.  

കലുങ്കിന്റെ നിര്‍മാണ ജോലികള്‍ നടക്കുന്നതിനാല്‍ വട്ടവിളയില്‍ നിന്ന് പിരായുംമൂട് വഴി നെയ്യാറ്റിന്‍കരയിലേയ്ക്ക് പോകുന്ന വാഹനങ്ങള്‍ കാട്ടിലുവിളയില്‍ നിന്ന് അമരവിള ടൈല്‍ ഫാക്ടറി വഴി നെയ്യാറ്റിന്‍കരയിലേയക്ക് ഈ മാസം 13 മുതല്‍ 30 വരെ തിരിച്ചുവിടുന്നതായി പാറശാല പി.ഡബ്ല്യു.ഡി റോഡ്‌സ് ഡിവിഷന്‍ അസി. എന്‍ജിനീയര്‍ അറിയിച്ചു. 
(പി.ആര്‍.പി. 2292/2018)

പ്രളയക്കെടുതി നേരിട്ട ജില്ലയിലെ വിവിധ സ്ഥലങ്ങള്‍ സംസ്ഥാന പ്ലാനിങ്‌ ബോര്‍ഡ്‌ വൈസ്‌ ചെയര്‍മാന്‍ ഡോ.വി.കെ. രാമചന്ദ്രന്‍ ഇന്നലെ (സെപ്‌തംബര്‍ 10 )സന്ദര്‍ശിച്ചു. രാവിലെ കുറാഞ്ചേരിയിലെത്തിയ അദ്ദേഹം സ്ഥല നിവാസികളോടും തദ്ദേശസ്വയംഭരണ പ്രതിനിധികളോടും മണ്ണിടിച്ചലുമായി ബന്ധപ്പെട്ട കാര്യങ്ങള്‍ വിശദമായി ചോദിച്ചറിഞ്ഞു.