പ്രളയക്കെടുതിക്ക് ശേഷമുള്ള പുനരധിവാസ പ്രവര്‍ത്തനങ്ങള്‍ ഏകോപിപ്പിക്കുന്നതിനായി ജില്ലയിലെ സര്‍ക്കാര്‍/എയ്ഡഡ്/അണ്‍എയിഡഡ് പോളിടെക്‌നിക്കുകള്‍, എന്‍ജിനീയറിംഗ് കോളേജുകള്‍ ഉള്‍പ്പെടെയുള്ള പ്രൊഫഷണല്‍ കോളേജുകളുടെ മാനേജര്‍/പ്രിന്‍സിപ്പല്‍ എന്നിവരുടെ യോഗം ഇന്ന് ഉച്ചയ്ക്ക് ശേഷം മൂന്നിന് ജില്ലാ കളക്ടറുടെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ ചേരും. ബന്ധപ്പെട്ട എല്ലാവരും യോഗത്തില്‍ പങ്കെടുക്കണമെന്ന് ജില്ലാ കളക്ടര്‍ അറിയിച്ചു.                   (പിഎന്‍പി 2809/18)

ഒരു നൂറ്റാണ്ടിന്റെ ചരിത്രം പറയുന്ന തിരുശേഷിപ്പ് കോന്നിയില്‍ കണ്ടെത്തി. 1924 ല്‍ ഉണ്ടായ മഹാപ്രളയത്തിന്റെ കണക്ക് രേഖപ്പെടുത്തിയ ശിലാഫലകമാണ് കോന്നിപഞ്ചായത്ത് കടവ് ഗവ.എല്‍.പി സ്‌കൂളിന് പിന്നില്‍ കണ്ടെത്തിയത്. പ്രളയം ജില്ലയാകെ വിഴുങ്ങിയപ്പോള്‍ ഏറ്റവും കൂടുതല്‍ സംസാരിച്ചതും മുന്‍ വര്‍ഷങ്ങളിലുണ്ടായ പ്രളയത്തെക്കുറിച്ചായിരുന്നു. 1924 ലിന് ശേഷം അത്തരമൊരു വെള്ളപ്പൊക്കം പിന്നീടുണ്ടായിട്ടില്ലെന്ന് പോലും അഭിപ്രായങ്ങളുണ്ടായി. ഇത് ശരി വയ്ക്കും വിധമാണ് ശിലാഫലകത്തില്‍ രേഖപ്പെടുത്തിയിരിക്കുന്നത്.