ജലപാത നിര്‍മ്മാണം : ചീഫ് എന്‍ജിനീയര്‍മാരുടെ ചുമതല പുതുക്കി ഉത്തരവായി

    ജലസേചന വകുപ്പിനു കീഴിലുള്ള ചീഫ് എന്‍ജിനീയര്‍ (കുട്ടനാട് പ്രോജക്ട്) എന്ന തസ്തിക, ചീഫ് എന്‍ജിനീയര്‍ (ജലപാതയും കുട്ടനാട് പ്രോജക്ടും) എന്ന് പുനര്‍ നാമകരണം ചെയ്ത് സര്‍ക്കാര്‍ ഉത്തരവായി.  ഇതോടെ ജലപാതകള്‍ പൂര്‍ണ്ണമായും പുതിയ ജലപാതയും കുട്ടനാട് പ്രോജക്ടും ചീഫ് എന്‍ജിനീയറുടെ ചുമതലയായി.
    ജലപാതയുമായി ബന്ധപ്പെട്ട് നിലവിലുള്ള ഓഫീസുകള്‍ ജലപാതയും കുട്ടനാട് പ്രോജക്ടും ചീഫ് എന്‍ജിനീയറുടെ അധികാര പരിധിയില്‍ ഉള്‍പ്പെടും. 
    616 കി.മി. നീളം വരുന്ന വെസ്റ്റ് കോസ്റ്റ് കനാലിന്റെ സമഗ്രവികസനം ലക്ഷ്യമാക്കി ഉള്‍നാടന്‍ ജലാഗതാഗത വകുപ്പുമായി ബന്ധപ്പെട്ട് 2018-2025 വരെയുള്ള കാലഘട്ടത്തില്‍ നിരവധി വികസന പ്രവര്‍ത്തനങ്ങള്‍ സമയബന്ധിതമായി നടപ്പിലാക്കേണ്ടതുണ്ട്.  616 കി.മി. നീളമുള്ള കനാലിലെ കൊല്ലം മുതല്‍ കോഴിക്കോട് വരെയുള്ള 328 കി.മി.  ഒഴികെയുള്ള ബാക്കി 288 കി.മി. ഭാഗം സംസ്ഥാന ജലപാതയാണ്.  കൂടാതെ 1160 കി.മി. നീളം വരുന്ന ഫീഡര്‍ കനാലുകള്‍, കാര്‍ഗോ ടെര്‍മിനല്‍സ്, ബോട്ട് ജെട്ടികള്‍, പാലങ്ങള്‍, ലോക്കുകള്‍ തുടങ്ങിയ നിര്‍മ്മാണ പ്രവര്‍ത്തനങ്ങള്‍, കൃത്രിമകനാലുകളുടെ നിര്‍മ്മാണം, സ്മാര്‍ട്ട് വാട്ടര്‍വേകളായി വികസിപ്പിക്കുന്നതിനുള്ള അനുബന്ധ നിര്‍മ്മാണങ്ങള്‍ എന്നിവയുള്‍പ്പെടെ 8000 കോടിയോളം രൂപയുടെ നിര്‍മ്മാണ പ്രവര്‍ത്തനങ്ങള്‍ ഏറ്റെടുക്കാനുണ്ട്.  ഇതുകൂടാതെ വിവിധ കനാലുകള്‍ക്ക് സ്ഥലം ഏറ്റെടുക്കുന്നതുള്‍പ്പെടെ നിരവധി പ്രവൃത്തികളും ചെയ്യേണ്ടതുണ്ട്.  ഈ പ്രവര്‍ത്തനങ്ങള്‍ക്കെല്ലാം കൂടുതല്‍ ശ്രദ്ധ വേണ്ടതിനാലാണ് പുതിയ മാറ്റം.
പി.എന്‍.എക്‌സ്.2703/18