സംരംഭകര്‍ക്ക് വഴികാട്ടാന്‍ ബോധവത്ക്കരണ ക്ലാസ്സ് നടത്തി

സംസ്ഥാന തലത്തില്‍ ഗ്രാമീണ സംരംഭങ്ങളുടെ പ്രോത്സാഹനം ലക്ഷ്യമിട്ട് തദ്ദേശ സ്വയംഭരണ സ്ഥാപനങ്ങളുടെയും വ്യവസായ വകുപ്പിന്റെയും നേതൃത്വത്തില്‍ പെരിനാട് ഗ്രാമപഞ്ചായത്തില്‍ സംരംഭകത്വ ബോധവത്കരണ ക്ലാസ്സ് സംഘടിപ്പിച്ചു. പെരിനാട് ഗ്രാമപഞ്ചായത്ത് പ്രസിഡന്റ് ദിവ്യ ജയകുമാര്‍ ഉദ്ഘാടനം ചെയ്തു.

മാറുന്ന ലോകത്തിന്റെ സാധ്യതകള്‍ മനസ്സിലാക്കുന്ന സംരഭ ആശയങ്ങളെ വ്യവസായങ്ങളാക്കുവാന്‍ സര്‍ക്കാര്‍ ആസൂത്രണം ചെയ്യുന്ന പദ്ധതികളെക്കുറിച്ചും പലിശ നിരക്ക് കുറഞ്ഞ ബാങ്ക് വായ്പാ സൗകര്യങ്ങളെക്കുറിച്ചും, ഓരോ പ്രദേശത്തിന്റെയും സാധ്യതകള്‍ മനസ്സിലാക്കി അനുയോജ്യമായ വ്യവസായങ്ങള്‍ തുടങ്ങുന്നതിനെക്കുറിച്ചും സംരംഭകരാകാന്‍ താത്പര്യമുള്ളവര്‍ക്ക് ബോധവത്ക്കരണം നടത്തി.

വൈസ് പ്രസിഡന്റ് അനില്‍കുമാര്‍ അധ്യക്ഷനായി. ചിറ്റുമല ബ്ലോക്ക് ആരോഗ്യ വിദ്യാഭ്യാസ സമിതി അധ്യക്ഷ ഇജീന്ദ്രലേഖ, പെരിനാട് ഗ്രാമപഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷന്‍ മുഹമ്മദ് ജാഫി, വികസന സമിതി അധ്യക്ഷ കെ സോമവല്ലി, സി ഡി എസ് ചെയര്‍പേഴ്സന്‍ വി ശോഭ, വ്യവസായ വികസന വകുപ്പ് ഉദ്യോഗസ്ഥരായ ജയാസാഗര്‍, വി വീണ തുടങ്ങിയവര്‍ പങ്കെടുത്തു.