അതിഥി തൊഴിലാളികളുടെ വിവരങ്ങള് ശേഖരിക്കണം ; താലൂക്ക് വികസന സമിതി
അതിഥി തൊഴിലാളികളുടെ വിവരങ്ങള് ശേഖരിക്കുന്നത് സംബന്ധിച്ച നടപടികള് അടിയന്തിരമായി സ്വീകരിക്കണമെന്ന് കോഴഞ്ചേരി താലൂക്ക് വികസന സമിതി യോഗം ആവശ്യപ്പെട്ടു.
കോഴഞ്ചേരി പഞ്ചായത്ത് സ്റ്റേഡിയത്തിലെ മണ്ണ് നീക്കം ചെയ്യുക, പത്തനംതിട്ട വില്ലേജിലെ റീസര്വെയുമായി ബന്ധപ്പെട്ട നടപടികള് വേഗത്തിലാക്കുക, പത്തനംതിട്ട ടൗണില് ഫുട്പാത്തിലേക്ക് ഇറക്കി സ്ഥാപിച്ച ബോര്ഡുകള് നീക്കം ചെയ്യുക, 2018 ലെ പ്രളയത്തില് ആറന്മുളയില് നിന്നും ലഭ്യമായ പുരാവസ്തുക്കള് മ്യൂസിയം നിര്മിച്ച് സംരക്ഷിക്കുക തുടങ്ങിയ വിഷയങ്ങളില് നടപടി എടുക്കണമെന്നും താലൂക്ക് വികസന സമിതി യോഗം ആവശ്യപ്പെട്ടു.
പത്തനംതിട്ട മുന്സിഫ് ഹാളില് ചെന്നീര്ക്കര ഗ്രാമപഞ്ചായത്ത് പ്രസിഡന്റ് ജോര്ജ് തോമസിന്റെ അധ്യക്ഷതയില് ചേര്ന്ന യോഗത്തില് കോഴഞ്ചേരി തഹസില്ദാര് കെ.ജയ്ദീപ്, ഡെപ്യൂട്ടി തഹസില്ദാര്മാരായ ജെ.അജിത്ത് കുമാര്, ബി.സുധ, ആന്റോ ആന്റണി എം.പി യുടെ പ്രതിനിധി അജിത്ത് മണ്ണില്, കോഴഞ്ചേരി ഗ്രാമപഞ്ചായത്ത് പ്രസിഡന്റ് റോയിഫിലിപ്പ്, മല്ലപ്പുഴശേരി പഞ്ചായത്ത് പ്രസിഡന്റ് പ്രദീപ് കുമാര്, കേരള കോണ്ഗ്രസ് പ്രതിനിധി ജോണ്പോള്, യുഡിഎഫ് ആറന്മുള മണ്ഡലം പ്രസിഡന്റ് ജോണ്സണ് കൂടപ്പുരയില്, എന്സിപി പ്രതിനിധി മുഹമ്മദ് സാലി, കേരള കോണ്ഗ്രസ് എം പ്രതിനിധി മാത്യൂ മരോട്ടിമൂട്ടില്, കോണ്ഗ്രസ് എസ് പ്രതിനിധി മാത്യു ജി ഡാനിയേല്, വകുപ്പുതല ഉദ്യോഗസ്ഥര് തുടങ്ങിയവര് പങ്കെടുത്തു.
- Log in to post comments