ഇളമാട് ഗവണ്‍മെന്റ് ഐ.ടി.ഐയില്‍ നോര്‍ക്കാ റൂട്ട്‌സും വ്യാവസായിക പരിശീലന വകുപ്പും സംയുക്തമായി ആരംഭിക്കുന്ന പ്ലംബിംഗ് ആന്റ് സാനിറ്റേഷന്‍ കോഴ്‌സിന് അപേക്ഷ ക്ഷണിച്ചു.  

പ്ലംബര്‍, സാനിറ്ററി ഹാര്‍ഡ്‌വെയര്‍, ഫിറ്റര്‍ ഐ.ടി.ഐ ട്രേഡ് പഠിച്ചവര്‍ക്കും പ്ലംബിംഗ്/സാനിറ്ററി ഹാര്‍ഡ്‌വെയര്‍ ഫിറ്റിംഗില്‍ രണ്ടുവര്‍ഷത്തെ പ്രവൃത്തിപരിചയമുള്ളവര്‍ക്കും അപേക്ഷിക്കാം. അവസാന തീയതി നവംബര്‍ 18.  അപേക്ഷാഫോമും വിശദവിവരങ്ങളും ഐ.ടി.ഐ ഓഫീസില്‍ ലഭിക്കും. ഫോണ്‍: 0474-2671715.
(പി.ആര്‍.കെ.നമ്പര്‍  2524/17)

കൊല്ലം ജില്ലാ സായുധസേനാ ക്യാമ്പില്‍ സൂക്ഷിച്ചിരിക്കുന്ന വകുപ്പിന് ഉപയോഗ യോഗ്യമല്ലാത്ത വാഹനങ്ങള്‍ നവംബര്‍ 25ന് രാവിലെ 11നും സ്‌പെയര്‍ പാര്‍ട്ട്‌സുകള്‍ നവംബര്‍ 28ന് രാവിലെ 11നും ലേലം ചെയ്യും.

വിശദ വിവരങ്ങള്‍ 0474-2764422 എന്ന നമ്പരില്‍ ലഭിക്കും.
(പി.ആര്‍.കെ.നമ്പര്‍  2523/17)
 

സംക്ഷിപ്ത വോട്ടര്‍പട്ടിക 2017-18 പുതുക്കലിന്റെ ഭാഗമായി തിരഞ്ഞെടുപ്പ് കമ്മീഷന്‍ സംഘടിപ്പിക്കുന്ന സ്‌പെഷ്യല്‍ ഡ്രൈവ് നവംബര്‍ 15 മുതല്‍ 30 വരെ നടക്കും. വോട്ടര്‍പട്ടികയില്‍ അര്‍ഹതയുള്ള എല്ലാ വോട്ടര്‍മാരെയും ഉള്‍പ്പെടുത്തുക, മരണമടഞ്ഞവര്‍/സ്ഥിരമായി താമസം മാറിപോയവര്‍/അനര്‍ഹര്‍ എന്നിവരെ ഒഴിവാക്കി വോട്ടര്‍പട്ടിക ശുദ്ധീകരിക്കുക എന്നിവയാണ് പരിപാടിയുടെ ലക്ഷ്യം. 
ഈ കാലയളവില്‍ ബൂത്ത് ലെവല്‍ ഓഫീസര്‍മാര്‍ അവരുടെ അധികാര പരിധിയിലുള്ള മേഖലകളില്‍ വിവരശേഖരണത്തിനായി ഭവനസന്ദര്‍ശനം നടത്തും.

നഗര-ഗ്രാമാസൂത്രണ വകുപ്പ് ജില്ലാ കാര്യാലയത്തില്‍ നവംബര്‍ 28ന് രാവിലെ 10 മുതല്‍ ഫയല്‍ അദാലത്ത് നടത്തും. ടൗണ്‍ പ്ലാനര്‍, വിവിധ തദ്ദേശ സ്വയംഭരണ സ്ഥാപനങ്ങളിലെ സെക്രട്ടറിമാര്‍ തുടങ്ങിയവര്‍ പങ്കെടുക്കും.

പരാതികള്‍ നവംബര്‍ 25 നകം ജില്ലാ നഗരാസൂത്രകന്റെ കാര്യാലയം, സെക്കന്റ് ഫ്‌ളോര്‍, മുനിസിപ്പല്‍ ബില്‍ഡിംഗ്, ക്ലോക്ക് ടവറിന് സമീപം, ചിന്നക്കട, കൊല്ലം-691001 എന്ന വിലാസത്തില്‍ നേരിട്ടോ തപാല്‍ വഴിയോ tpkollam@gmail.com എന്ന ഇ-മെയില്‍ വിലാസത്തിലോ സമര്‍പ്പിക്കണം. വിശദ വിവരങ്ങള്‍ 0474-2742062 എന്ന നമ്പരില്‍ ലഭിക്കും.
(പി.ആര്‍.കെ.നമ്പര്‍  2521/17)

സര്‍വ്വേ ആന്റ് ലാന്റ് റിക്കോര്‍ഡ്‌സ് വകുപ്പില്‍ സര്‍വ്വേയര്‍ ഗ്രേഡ്-2 തസ്തികയുടെ സാധ്യത പട്ടിക പി.എസ്.സി പ്രസിദ്ധീകരിച്ചു.
(പി.ആര്‍.കെ.നമ്പര്‍  2520/17)

സംസ്ഥാന പട്ടികജാതി പട്ടിക ഗോത്രവര്‍ഗ കമ്മീഷന്‍ നിലവിലുള്ള പരാതികളില്‍ തീര്‍പ്പ് കല്‍പ്പിക്കുന്നതിന് നവംബര്‍ 17ന് കൊല്ലം കലക്‌ട്രേറ്റ് കോണ്‍ഫറന്‍സ് ഹാളിലും 18ന് കൊട്ടാരക്കര പി.ഡബ്ല്യൂ.ഡി റസ്റ്റ്ഹൗസിലും അദാലത്ത് സംഘടിപ്പിക്കും.

കമ്മീഷന്‍ ചെയര്‍മാന്‍ റിട്ട. ജഡ്ജ് ഡോ. പി.എന്‍. വിജയകുമാര്‍, അംഗങ്ങളായ എഴുകോണ്‍ നാരായണന്‍, അഡ്വ. കെ. മനോജ്, രജിസ്ട്രാര്‍ ഒ.എം. മോഹനന്‍, അസിസ്റ്റന്റ് രജിസ്ട്രാര്‍ കെ. ഷീജ തുടങ്ങിയവര്‍ നേതൃത്വം നല്‍കും.

(പി.ആര്‍.കെ.നമ്പര്‍  2519/17)

കൊല്ലം റവന്യൂ ജില്ലാ സ്‌കൂള്‍ ശാസ്‌ത്രോത്സവവും പ്രവൃത്തിപരിചയ മേളയും ഐ.ടി മേളയും നവംബര്‍ 16, 17 തീയതികളില്‍ കൊട്ടാരക്കരയില്‍ നടക്കും. ഗവണ്‍മെന്റ് ബോയ്‌സ് ഹൈസ്‌കൂള്‍, ഗവണ്‍മെന്റ് ഗേള്‍സ് ഹൈസ്‌കൂള്‍, മാര്‍ത്തോമ്മ ഗേള്‍സ് ഹൈസ്‌കൂള്‍, വിമലാംബിക എല്‍.പി.എസ്, ഡയറ്റ്, യു.ഐ.ടി, ബി.ആര്‍.സി, തൃക്കണ്ണമംഗല്‍ എസ്.കെ.വി.എച്ച്.എസ്.എസ് എന്നിവയാണ് വേദികള്‍.

നവംബര്‍ 16ന് രാവിലെ ഒന്‍പതിന് കൊട്ടാരക്കര ഗവണ്‍മെന്റ് ബോയ്‌സ് ഹൈസ്‌കൂളില്‍ കൊടിക്കുന്നില്‍ സുരേഷ് എം.പി മേള ഉദ്ഘാടനം ചെയ്യും. പി. അയിഷാ പോറ്റി എം.എല്‍.എ അധ്യക്ഷയാകും. കൊട്ടാരക്കര നഗരസഭ ചെയര്‍പേഴ്‌സണ്‍ ഗീതാ സുധാകരന്‍ മുഖ്യപ്രഭാഷണം നടത്തും. 

മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ 2018-19 സാമ്പത്തിക വര്‍ഷത്തെ കര്‍മ്മപദ്ധതിയും  ലേബര്‍ ബജറ്റും ഡിസംബര്‍ 30ന് മുമ്പ്  തയ്യാറാക്കാന്‍ കഴിയുംവിധം പ്രവര്‍ത്തനങ്ങള്‍ ചിട്ടപ്പെടുത്തണമെന്ന് ജില്ലാ പ്രോഗ്രാം കോ-ഓര്‍ഡിനേറ്റര്‍കൂടിയായ ജില്ലാ കളക്ടര്‍ ഡോ. എസ്. കാര്‍ത്തികേയന്‍ നിര്‍ദേശിച്ചു. 
    പദ്ധതികള്‍ തിരെഞ്ഞെടുക്കുന്നതും ആക്ഷന്‍ പ്ലാന്‍ തയ്യാറാക്കുന്നതും മാസ്റ്റര്‍ സര്‍ക്കുലര്‍ അനുസരിച്ചായിരിക്കണം. തൊഴിലാളികള്‍ക്ക് ഒരു വര്‍ഷം 100 ദിവസം തൊഴില്‍ ലഭിക്കത്തക്കവിധത്തില്‍ എല്ലാ വാര്‍ഡുകളിലും ആവശ്യത്തിന് പ്രവൃത്തികള്‍ ഉള്‍പ്പെടുത്താന്‍ പ്രത്യേകം നിര്‍ദ്ദേശിച്ചിട്ടുണ്ട്. 

സംസ്ഥാന സര്‍ക്കാരിന്റെ നിര്‍ദേശപ്രകാരം ജില്ലാ കളക്ടര്‍ ഡോ. എസ്. കാര്‍ത്തികേയന്‍ നടത്തുന്ന താലൂക്ക്തല പൊതുജന പരാതി പരിഹാര അദാലത്ത് - സമാശ്വാസം 2017 നവംബര്‍ 18ന് രാവിലെ പത്തു മുതല്‍ പത്തനാപുരം താലൂക്ക് ഓഫീസില്‍ നടക്കും. താലൂക്കിലെ രണ്ടാം ഘട്ട അദാലത്താണിത്. 

കടലിലെ പ്ലാസ്റ്റിക് മാലിന്യങ്ങള്‍ ശേഖരിച്ച്, സംസ്‌കരിച്ച് മുല്യവര്‍ധിത ഉത്പന്നങ്ങള്‍ നിര്‍മിക്കുന്നതിന് ലക്ഷ്യമിടുന്ന ശുചിത്വസാഗരം പദ്ധതി പുതിയ ഘട്ടത്തിലേക്ക്. മാലിന്യങ്ങള്‍ സംസ്‌കരിക്കുന്നതിനുള്ള ഷ്രെഡിംഗ് യൂണിറ്റിന്റെ ഉദ്ഘാടനം നവംബര്‍ 20ന് വൈകുന്നേരം നാലിന് നീണ്ടകര ഹാര്‍ബറില്‍ നടക്കും.