കേരളാ ആരോഗ്യ സര്‍വകലാശാലാ സംസ്ഥാനതല ഇന്റര്‍സോണ്‍ അത്ലറ്റിക് മീറ്റ് മെയ് 20 മുതല്‍ 22 വരെ കണ്ണൂര്‍ ഗവ.മെഡിക്കല്‍ കോളേജ് സിന്തറ്റിക് ട്രാക്കില്‍ നടക്കുമെന്ന് സംഘാടക സമിതി ചെയര്‍മാന്‍ അറിയിച്ചു. രാവിലെ 6.30 മുതല്‍ 11 വരെയും ഉച്ചക്കുശേഷം മൂന്ന് മണി മുതല്‍ 6.30 വരെയുമാണ് മത്സരം നടക്കുക.

കണ്ണൂര്‍ സര്‍വകലാശാല ഡോ. ജാനകി അമ്മാള്‍ ക്യാമ്പസ്സിലെ നരവംശശാസ്ത്ര വകുപ്പില്‍ 2024-25 അധ്യയന വര്‍ഷത്തേക്കുള്ള എം.എ ആന്ത്രോപോളജി പ്രവേശനത്തിന് മെയ് 20 വരെ അപേക്ഷിക്കാം. ഏതെങ്കിലും വിഷയത്തില്‍ 45 ശതമാനം മാര്‍ക്കോ തത്തുല്യ ഗ്രേഡോ ആണ് യോഗ്യത. താല്‍പര്യമുള്ളവര്‍ admission.kannuruniversity.ac.in എന്ന കണ്ണൂര്‍ സര്‍വകാലശാല വെബ്‌സൈറ്റില്‍ അപേക്ഷിക്കണം. കൂടുതല്‍ വിവരങ്ങള്‍ക്ക് സര്‍വകലാശാല ഹെല്‍പ്ലൈനുമായി ബന്ധപ്പെടുക. ഫോണ്‍: 04972715261, 04972715286.

കേരളത്തിലെ നാളികേര കർഷകരിൽ നിന്നും ഗുണനിലവാരമുള്ള മില്ലിംഗ് കൊപ്ര ക്വിന്റലിന് 11160 രൂപ നിരക്കിലും ഉണ്ട കൊപ്ര ക്വിന്റലിന് 12000 രൂപ നിരക്കിലും മൂന്നുമാസത്തേക്ക് സർക്കാർ സംഭരിക്കുന്നു. വി എഫ് പി സി കെ, മാർക്കറ്റ് ഫെഡ് സെൻട്രൽ വെയർ ഹൗസിംഗ് കോർപ്പറേഷൻ എന്നീ ഏജൻസികളെയാണ് കൊപ്ര സംഭരണത്തിന്റെ സംസ്ഥാനതല ഏജൻസികളായി ചുമതലപ്പെടുത്തിയിട്ടുള്ളത്. കൂടുതൽ വിവരങ്ങൾക്ക് അതത് കൃഷിഭവനുകളുമായി ബന്ധപ്പെടണമെന്ന് തൃശൂർ പ്രിൻസിപ്പൽ കൃഷി ഓഫീസർ അറിയിച്ചു.

സഹകരണ വകുപ്പിന്റെ കീഴിൽ പുന്നപ്രയിൽ പ്രവർത്തിക്കുന്ന സ്കിൽ ആൻഡ് നോളജ് ഡെവലപ്മെന്റ് സെന്ററിൽ 10 മാസം ദൈർഘ്യമുള്ള ജർമ്മൻ ഭാഷ പരിശീലനം ഓൺലൈനായി ആരംഭിക്കുന്നു. താല്പര്യമുള്ളവർ 9496244701 നമ്പറിൽ ബന്ധപ്പെടുക.

സംസ്ഥാന ഹോർട്ടികൾച്ചർ മിഷൻ കർഷകർക്ക് സബ്സിഡി നൽകുന്നു.

തൃശ്ശൂര്‍ ഗവ. മെഡിക്കല്‍ കോളേജ് ആശുപത്രിയിലെ യൂറോളജി വിഭാഗം ഡോക്ടര്‍ അവധിയില്‍ പോയതിനാല്‍ മെയ് 30 വരെ യൂറോളജി ഒ.പി ഉണ്ടായിരിക്കുന്നതല്ലെന്ന് മെഡിക്കല്‍ കോളേജ് സൂപ്രണ്ട് അറിയിച്ചു.

ഹരിതകേരളം മിഷന്റെ നേതൃത്വത്തില്‍ വേള്‍ഡ് വൈല്‍ഡ് ലൈഫ് ഫണ്ടുമായി സഹകരിച്ച് സ്‌കൂള്‍ വിദ്യാര്‍ത്ഥികള്‍ക്കായി ജൈവവൈവിധ്യ പഠനോത്സവവും ക്വിസ് മത്സരവും സംഘടിപ്പിക്കുന്നു. ഇടുക്കി ജില്ലയിലെ അടിമാലിയില്‍ ഹരിതകേരളം മിഷന്‍ യു.എന്‍.ഡി.പി. പദ്ധയിലുള്‍പ്പെടുത്തി സ്ഥാപിച്ച നീലക്കുറിഞ്ഞി ജൈവവൈവിധ്യ വിജ്ഞാനകേന്ദ്രത്തിന്റെ കമ്യൂണിറ്റിതല പരിപാടികളുടെ ഭാഗമായാണ് പരിപാടി നടത്തുന്നത്. ജൈവവൈവിധ്യത്തെക്കുറിച്ചും അതിന്റെ സംരക്ഷണത്തിന്റെ പ്രാധാന്യത്തെക്കുറിച്ചുമുള്ള അവബോധം കുട്ടികളിലത്തിക്കാന്‍ ലക്ഷ്യമിട്ടാണ് ലോക ജൈവവൈവിധ്യ ദിനത്തോടനുബന്ധിച്ച് പഠനോത്സവവും ക്വിസ് മത്സരവും സംഘടിപ്പിച്ചിട്ടുള്ളത്.

കേരള കര്‍ഷക തൊഴിലാളി ക്ഷേമനിധിയില്‍ അംശദായം സ്വീകരിക്കുന്നതിന് ജില്ലാ എക്‌സിക്യുട്ടീവ് ഓഫീസറുടെ നേതൃത്വത്തില്‍ തദ്ദേശസ്വയംഭരണ സ്ഥാപനങ്ങളില്‍ മെയ് 28 വരെ സിറ്റിംഗ് നടത്തുന്നു. മെയ് 4 ന് കാറളം, 7 ന് തിരുവില്വാമല, 10 നും 14 നും പഴയന്നൂര്‍, 16 ന് അന്നമനട, 18 ന് വേലൂര്‍, 21 ന് കൈപ്പമംഗലം, 23 ന് കൊണ്ടാഴി, 28 ന് മുല്ലശ്ശേരി എന്നീ തദ്ദേശ സ്വയംഭരണ സ്ഥാപനങ്ങളിലാണ് സിറ്റിംഗ് നടത്തുന്നത്. അംശദായം ഓണ്‍ലൈനായി അടവാക്കുന്നതിനാല്‍ അംഗങ്ങളുടെ ആധാര്‍ കാര്‍ഡ് നമ്പര്‍, ബാങ്ക് അക്കൗണ്ട് നമ്പര്‍, ഐ.എഫ്.എസ്.സി കോഡ് എന്നിവ സിറ്റിംഗിന് ഹാജരാക്കണമെന്ന് ജില്ലാ എക്‌സിക്യുട്ടീവ് ഓഫീസര്‍ അറിയിച്ചു.

കേരള ഇന്‍സ്റ്റിട്ട്യൂട്ട് ഫോര്‍ എന്റര്‍പ്രണര്‍ഷിപ്പ് ഡവലപ്‌മെന്റ് സംരംഭം തുടങ്ങാന്‍ ആഗ്രഹിക്കുന്നവര്‍ക്കായി 'ഇന്‍ഡസ്ട്രി സെറ്റപ്പ് സപ്പോര്‍ട്ട് വര്‍ക്ക് ഷോപ്പ്' സംഘടിപ്പിക്കുന്നു. മെയ് 8 മുതല്‍ 10 വരെ കളമശ്ശേരി ക്യാമ്പസിലാണ് പരിശീലനം നല്‍കുന്നത്. താത്പര്യമുള്ളവര്‍ http://kied.info/training-calender/ ല്‍ മെയ് 5 നകം അപേക്ഷ സമര്‍പ്പിക്കണം. ഫോണ്‍: 0484 2532890, 2550322, 9188922800.

തൃശ്ശൂര്‍ ജില്ലയില്‍ ആരോഗ്യവകുപ്പില്‍ ലാബോറട്ടറി ടെക്‌നീഷ്യന്‍ ഗ്രേഡ് 2 തസ്തികയിലേക്ക് 2024 ജനുവരി 6 ന് പ്രസിദ്ധീകരിച്ച 02/2024/ഡിഒആര്‍ നമ്പര്‍ ചുരുക്കപ്പട്ടികയില്‍ ഉള്‍പ്പെട്ട ഉദ്യേഗാര്‍ത്ഥികള്‍ക്കുള്ള അഭിമുഖം മെയ് 8 മുതല്‍ 10 വരെ പബ്ലിക് സര്‍വ്വീസ് കമ്മീഷന്‍ തൃശ്ശൂര്‍ ജില്ലാ ഓഫീസില്‍ നടക്കും. ഉദ്യോഗാര്‍ത്ഥികള്‍ക്ക് എസ്.എം.എസ്, പ്രൊഫൈല്‍ മെസ്സേജ് എന്നിവ നല്‍കിയിട്ടുണ്ട്. ഉദ്യോഗാര്‍ത്ഥികള്‍ അഡ്മിഷന്‍ ടിക്കറ്റ് ഡൗണ്‍ലോഡ് ചെയ്ത് നിശ്ചിത സ്ഥലത്തും സമയത്തും ഹാജരാകണം.