ജില്ലാ വ്യവസായ കേന്ദ്രത്തിന്റെയും കൊട്ടിയൂര്‍ ഗ്രാമപഞ്ചായത്തിന്റെയും ആഭിമുഖ്യത്തില്‍ ആഗസ്റ്റ് 11 വെള്ളി ഉച്ചക്ക് രണ്ട് മണിക്ക് സംരംഭക ബോധവല്‍ക്കരണ ശില്‍പശാല സംഘടിപ്പിക്കുന്നു. കൊട്ടിയൂര്‍ ഗ്രാമപഞ്ചായത്ത് ഹാളില്‍ നടക്കുന്ന ശില്‍പശാല ഗ്രാമപഞ്ചായത്ത്  പ്രസിഡണ്ട് റോയ് നമ്പുടാകം ഉദ്ഘാടനം ചെയ്യും. ഫോണ്‍: 8075591304.
 

ഹരിത കര്‍മ്മസേനയ്ക്ക് യൂസര്‍ ഫീ കൊടുക്കേണ്ടതില്ല എന്ന വ്യാജ വാര്‍ത്ത പ്രചരിപ്പിക്കുന്നവര്‍ക്കെതിരെ നടപടിയെടുക്കുമെന്ന് ശുചിത്വ മിഷന്‍ ജില്ലാ കോ-ഓര്‍ഡിനേറ്റര്‍ അറിയിച്ചു. യൂസര്‍ ഫീ നല്‍കേണ്ടന്ന പത്രവാര്‍ത്തയുടെ കോപ്പി വ്യാപകമായി വാട്‌സാപ്പ് ഗ്രൂപ്പുകളില്‍ പ്രചരിക്കുന്നതായി ശ്രദ്ധയില്‍ പെട്ടിട്ടുണ്ട്. ഇത് ആറുമാസം മുന്‍പ് ആലപ്പുഴ ജില്ലയില്‍ വിവരാവകാശ നിയമ പ്രകാരം കിട്ടിയ മറുപടി തെറ്റായ രീതിയില്‍ കണ്ണൂരിലെ ഒരു സായാഹ്ന പത്രം വാര്‍ത്തയാക്കി മാറ്റിയതാണ്. അതേ തുടര്‍ന്ന് ഹരിതകര്‍മ്മസേനയുടെ യൂസര്‍ഫീ നിയമപ്രകാരമുള്ളതാണെന്ന് വ്യക്തമാക്കിക്കൊണ്ട് സര്‍ക്കാര്‍ ഉത്തരവ് ഇറങ്ങിയിട്ടുണ്ട്.

കണ്ണൂർ ജില്ലാ പഞ്ചായത്ത്, പെരളശ്ശേരി ഗ്രാമപഞ്ചായത്ത്, എം ജി എൻ ആർ ഇ ജി എ, നെഹ്‌റു യുവകേന്ദ്ര എന്നിവ സംയുക്തമായി സംഘടിപ്പിച്ച 'മേരി മിട്ടി മേരാ ദേശ്' ഭൂമിക്ക് വന്ദനം വീരർക്ക് അഭിവാദനം പരിപാടി ഐവർകുളം എ കെ ജി സ്മൃതി കുടീരത്തിൽ നടത്തി. ജില്ലാ പഞ്ചായത്ത് പ്രസിഡന്റ് പി പി ദിവ്യ, ജില്ലാ കലക്ടർ എസ് ചന്ദ്രശേഖർ എന്നിവരുടെ നേതൃത്വത്തിൽ വൃക്ഷത്തൈ നട്ടു. അസി. കലക്ടർ അനൂപ് ഗാർഗ്, പെരളശ്ശേരി ഗ്രാമപഞ്ചായത്ത് പ്രസിഡൻറ് എ വി ഷീബ എന്നിവർ സംബന്ധിച്ചു.
 

 ഓണം അവധി ഗോവയിൽ അടിച്ചുപൊളിക്കാൻ അവസരമൊരുക്കി കുടുംബശ്രീയുടെ 'ദി ട്രാവലർ'. ജില്ലയിലെ സ്ത്രീകൾക്ക് സുരക്ഷിത യാത്ര ഉറപ്പാക്കാൻ ജില്ലാ കുടുംബശ്രീ മിഷന്റെ നേതൃത്വത്തിൽ ആരംഭിച്ച 'ദി ട്രാവലർ' വനിത ടൂർ എന്റർപ്രൈസസിന്റെ പന്ത്രണ്ടാമത്തെ യാത്രയാണിത്. സംസ്ഥാനത്തിന് പുറത്തേക്കുള്ള ആദ്യത്തെ യാത്രയും. യാത്രകൾ ഇഷ്ട്ടപ്പെടുന്ന സ്ത്രീകളെ ഒരുമിപ്പിച്ച് ടൂർ പാക്കേജിലൂടെ വിവിധ ഇടങ്ങളിൽ കൊണ്ടുപോവുകയാണ് ഇതിന്റെ ലക്ഷ്യം. സ്ത്രീകൾക്ക് മാത്രമായിട്ടാണ് യാത്രകൾ എന്ന തെറ്റിദ്ധാരണ വേണ്ട, ഫാമിലി ട്രിപ്പും കുട്ടികളുടെ ട്രിപ്പുമെല്ലാം ട്രാവലർ ഒരുക്കുന്നുണ്ട്.

മാലിന്യം ശേഖരിക്കുന്ന ഇടങ്ങളിലെത്തിയാല്‍ മുഖം തിരിക്കുന്നവരാണ് പലരും. പക്ഷെ മട്ടന്നൂര്‍ നഗരസഭയുടെ മിനി എം സി എഫുകള്‍ കണ്ടാല്‍ ആരുമൊന്ന് നോക്കിപ്പോകും. അലങ്കാരച്ചെടികള്‍ വളര്‍ത്തി ആകര്‍ഷകമാക്കിയിരിക്കുകയാണ് ഇവിടം. മിനി എഫ് സി എഫുകളില്‍ വെര്‍ട്ടിക്കല്‍ ഗാര്‍ഡന്‍ ഒരുക്കിയാണ് മട്ടന്നൂര്‍ നഗരസഭ മാതൃകയാകുന്നത്.

ജില്ലയിലെ ആദ്യ സമ്പൂര്‍ണ്ണ ഭരണഘടനാ സാക്ഷരതാ പഞ്ചായത്താകാന്‍ ഒരുങ്ങി കുറുമാത്തൂര്‍ ഗ്രാമപഞ്ചായത്ത്.
ജനങ്ങളെ ഭരണഘടനയെ കുറിച്ച് പഠിപ്പിക്കാനും മൗലികാവകാശങ്ങളെ പറ്റി ബോധവല്‍ക്കരണം നടത്തുന്നതിനും കുറുമാത്തൂര്‍ ഗ്രാമപഞ്ചായത്തും കിലയും ചേര്‍ന്ന് നടപ്പാക്കുന്ന ഭരണഘടനാ സാക്ഷരതാ പദ്ധതിക്ക് തുടക്കമായി. പഞ്ചായത്തിലെ 10 വയസ്സിന് മുകളിലുള്ള എല്ലാവര്‍ക്കും ഭരണഘടനസാക്ഷരതാ ക്ലാസുകള്‍ നടത്തും. ഇതിലൂടെ ജില്ലയിലെ ആദ്യ സമ്പൂര്‍ണ്ണ ഭരണഘടനാ സാക്ഷരതാ പഞ്ചായത്താകാനാണ് ലക്ഷ്യമിടുന്നത്. 2023-24 വര്‍ഷത്തെ പദ്ധതിയിലുള്‍പ്പെടുത്തി ഒരു ലക്ഷം രൂപയാണ് ഇതിനായി വകയിരുത്തിയത്.

ജില്ലാ പഞ്ചായത്ത് ഭരണസമിതി യോഗം ആഗസ്റ്റ് 16ന് രാവിലെ 11 മണിക്ക് ജില്ലാ പഞ്ചായത്ത് ഭരണ സമിതി ഹാളില്‍ നടക്കും.
 

സംസ്ഥാന വിനോദ സഞ്ചാര വകുപ്പും,ജില്ലാ ഭരണകൂടവും,കണ്ണൂർ ജില്ലാ ടൂറിസം പ്രൊമോഷൻ കൗൺസിലും  സംയുക്തമായി കണ്ണൂർ ടൗൺ സ്‌ക്വയറിൽ ആഗസ്ത് 25 മുതൽ സെപ്തംബർ 02 വരെ സംഘടിപ്പിക്കുന്ന ഓണാഘോഷ പരിപാടികൾക്ക് പേരിനായി നിർദ്ദേശങ്ങൾ ക്ഷണിക്കുന്നു.  ഓൺലൈൻ മുഖാന്തരം ആണ് പേരുകൾ സ്വീകരിക്കുക. പേരുകൾ kannurdtpc@gmail.com   എന്ന ഇ-മെയിൽ അഡ്രസ്സിലേക്കോ  9447524545 എന്ന വാട്ട് സാപ്പ്  നമ്പറിലേക്കോ  ആഗസ്റ്റ് 15  വരെ സമർപ്പിക്കാം .ഒരാൾക്ക് ഒരു പേര്മാത്രമാണ് നിർദേശിക്കാവുന്നത്.

കലക്ടറേറ്റിലെ നവീകരിച്ച ഓഡിറ്റോറിയത്തിന്റെ ഉദ്ഘാടനം ആഗസ്റ്റ് 12ന് ശനിയാഴ്ച രാവിലെ 10 മണിക്ക് റവന്യൂ-ഭവനനിര്‍മാണ വകുപ്പ് മന്ത്രി കെ രാജന്‍ നിര്‍വ്വഹിക്കും. രാമചന്ദ്രന്‍ കടന്നപ്പള്ളി എം എല്‍ എ അധ്യക്ഷത വഹിക്കും. മേയര്‍ അഡ്വ. ടി ഒ മോഹനന്‍, എം പിമാരായ കെ സുധാകരന്‍, ഡോ. വി ശിവദാസന്‍, അഡ്വ. പി സന്തോഷ് കുമാര്‍, കെ വി സുമേഷ് എം എല്‍ എ, ജില്ലാ പഞ്ചായത്ത് പ്രസിഡണ്ട് പി പി ദിവ്യ എന്നിവര്‍ മുഖ്യാതിഥികളാകും. ജില്ലാ കലക്ടര്‍ എസ് ചന്ദ്രശേഖര്‍, എ ഡി എം കെ കെ ദിവാകരന്‍, സനിമാ താരം മീനാക്ഷി ദിനേശ്, ഗായിക പല്ലവി രതീഷ് എന്നിവര്‍ പങ്കെടുക്കും.