പുതിയ ആയുർവേദ മാറ്റിന്റെ ലോഞ്ചിങ് മന്ത്രി പി രാജീവ് നിർവ്വഹിച്ചു

ഇരിണാവ് വിവേഴ്സ് ഇൻഡസ്ട്രിയൽ കോപ്പറേറ്റീവ് സൊസൈറ്റിയുടെ സുവർണ്ണ ജൂബിലി ആഘോഷവും പുതുതായി പുറത്തിറക്കുന്ന ആയുർവേദ മാറ്റിന്റെ ലോഞ്ചിങ്ങും വ്യവസായ നിയമ വകുപ്പ് മന്ത്രി പി രാജീവ് നിർവഹിച്ചു. എം വിജിൻ എംഎൽഎ അധ്യക്ഷനായി. രാസവസ്തുക്കൾ ഒന്നും ഉപയോഗിക്കാതെ തികച്ചും പ്രകൃതിദത്തമായ ആയുർവേദ കൂട്ടുകൾ ഉപയോഗിച്ച് ചായം പൂശിയ നൂറ് ശതമാനം പരുത്തി നൂൽ ഉപയോഗിച്ചാണ് ആയുർ മാറ്റ് തയ്യാറാ ക്കിയിരിക്കുന്നത്. കസ്റ്റമൈസ് ചെയ്ത ഫാബ്രിക് പെയിന്റ് സാരിയും മറ്റ് റെഡിവെയർ വസ്ത്രങ്ങളും സംഘം നിർമ്മിക്കാൻ ആരംഭിച്ചിട്ടുണ്ട്. 10 തറികളിൽ പ്രവർത്തനം ആരംഭിച്ച സംഘം ഇന്ന് 150 ലേറെ തറികളുള്ള വ്യവസായ സംഘമണ്. ജക്കാർഡ്, ഡോബി, ടർക്കി തുടങ്ങി പ്രത്യേകതകളുള്ള തറികൾ ഇരിണാവിൽ പ്രവർത്തിപ്പിച്ചുവരുന്നു. കേരളത്തിൽ കൈത്തറി സഹകരണ സംഘങ്ങളിൽ ഏറ്റവും ആദ്യം കയറ്റുമതി ലൈസൻസ് കരസ്ഥമാക്കിയ സൊസൈറ്റി 1995ൽ ഏറ്റവും നല്ല കൈത്തറി സഹകരണ സംഘത്തിനുള്ള കേന്ദ്ര ടെക്സ്റ്റൈൽ മന്ത്രാലയത്തിന്റെ സ്വർണപ്പതക്കവും നേടി.

വീവേഴ്‌സ് അങ്കണത്തിൽ നടന്ന പരിപാടിയിൽ 75 വയസ്സ് പിന്നിട്ട മുൻകാല നെയ്ത്തുകാരെ ആദരിച്ചു. കല്യാശ്ശേരി ബ്ലോക്ക് പഞ്ചായത്ത് പ്രസിഡന്റ് പി.പി ഷാജിർ, കല്യാശ്ശേരി പഞ്ചായത്ത് പ്രസിഡന്റ് ടി.ടി ബാലകൃഷ്ണൻ, കല്യാശ്ശേരി ബ്ലോക്ക് പഞ്ചായത്ത് അംഗം കെ പ്രീത, ജില്ലാ വ്യവസായ കേന്ദ്രം ജനറൽ മാനേജർ കെ.എസ് അജിമോൻ, തോട്ടട ഐ ഐ എച്ച് ടി എക്സിക്യൂട്ടീവ് ഡയറക്ടർ എൻ ശ്രീധന്യൻ, ജില്ലാ പഞ്ചായത്ത് അംഗം പി.പി ദിവ്യ, കൊല്ലോൻ മോഹനൻ, ജില്ലാ വ്യവസായ കേന്ദ്രം ഡെപ്യൂട്ടറി റജിസ്ട്രാർ കെ ശ്രീജിത്ത്‌, കൈത്തറി മാനേജർ കെ സുരേഷ്, ജില്ലാ വ്യവസായ കേന്ദ്രം അസിസ്റ്റന്റ് രജിസ്ട്രാർ കെ.പി ഗിരീഷ് കുമാർ, ജില്ലാ വ്യവസായ കേന്ദ്രം യൂണിറ്റ് ഇൻസ്പെക്ടർ പി.പി ഗംഗാധരൻ, പഞ്ചായത്ത് അംഗം കെ സിജു, സംസ്ഥാന കൈത്തറി നൈത്ത് ഫെഡറേഷൻ ജനറൽ സെക്രട്ടറി താവം ബാലകൃഷ്ണൻ, പി മനോഹരൻ, എം ബാലകൃഷ്ണൻ, കെ വി സന്തോഷ്‌ കുമാർ, സംഘാടക സമിതി ചെയർമാൻ പി ഗോവിന്ദൻ, ഇരിണാവ് വ്യൂവേഴ്സ് സൊസൈറ്റി സെക്രട്ടറി കെ അനിൽകുമാർ എന്നിവർ സംസാരിച്ചു.