എന്റെ കേരളം പ്രദര്‍ശന വിപണന മേള: മികച്ച മാധ്യമ കവറേജിന് പുരസ്‌കാരം; എന്‍ട്രികള്‍ നാളെ (മെയ് 12) വൈകിട്ട് 4 നകം നല്‍കണം
സംസ്ഥാന സര്‍ക്കാരിന്റെ നാലാം വാര്‍ഷികത്തോടനുബന്ധിച്ച് മലപ്പുറം കോട്ടക്കുന്ന് മൈതാനത്ത് നടക്കുന്ന എന്റെ കേരളം പ്രദര്‍ശന വിപണന മേളയുടെ മികച്ച വാർത്താ കവറേജിന് മാധ്യമ സ്ഥാപനം, പത്ര റിപ്പോര്‍ട്ടര്‍, ഫോട്ടോഗ്രാഫര്‍, ചാനല്‍ റിപ്പോര്‍ട്ടര്‍, വീഡിയോഗ്രാഫര്‍, ഓണ്‍ലൈന്‍ മാധ്യമം എന്നിവയ്ക്ക് പുരസ്‌കാരങ്ങള്‍ നല്‍കുന്നു. ഏഴ് ദിവസങ്ങളിലായി നടക്കുന്ന മേളയുടെ സമഗ്ര കവറേജിനാണ് മാധ്യമ സ്ഥാപനങ്ങൾക്കുള്ള അവാർഡ്. മൗലികമായ മികച്ച റിപ്പോര്‍ട്ടുകള്‍/ഫോട്ടോകൾ/വീഡിയോകൾ എന്നിവ പരിഗണിച്ചായിരിക്കും വ്യക്തിഗത പുരസ്‌കാരങ്ങള്‍ നല്‍കുക.
എൻട്രികൾ നാളെ (മെയ് 12) വൈകിട്ട് 4 മണിക്കുള്ളില്‍ നൽകണം. വാര്‍ത്ത, ഫോട്ടോ എന്നിവയുടെ പത്രക്കട്ടിങ്ങുകള്‍, വീഡിയോ, ഓഡിയോ ക്ലിപ്പുകള്‍, ലിങ്കുകള്‍ എന്നിവ പെന്‍ഡ്രൈവിലാക്കിയോ ഇമെയില്‍ വഴിയോ നല്‍കാം. സമഗ്ര കവറേജിന് അച്ചടി മാധ്യമങ്ങൾക്ക് നൽകുന്ന പുരസ്കാരത്തിന് മാത്രം എൻട്രി അയക്കേണ്ടതില്ല. മറ്റുള്ളവയെല്ലാം നിശ്ചിത സമയത്തിനകം ലഭിക്കുന്ന എൻട്രി മാത്രമേ പരിഗണിക്കുകയുള്ളൂ. മേളയുടെ സമാപന ദിനമായ മെയ് 13 ന് നടക്കുന്ന സമാപന സമ്മേളനത്തില്‍ പുരസ്‌കാരങ്ങള്‍ വിതരണം ചെയ്യും. ഇമെയില്‍ വിലാസം- diomlpm2@gmail.com.
- Log in to post comments