ആർദ്ര കേരളം പുരസ്‌കാരം  കണ്ണൂരിന് നേട്ടമായത്ത് ആരോഗ്യ, ശുചിത്വ, ജലസംരക്ഷണ മേഖലകളിലെ മികവ്

തദ്ദേശസ്വയംഭരണ സ്ഥാപനങ്ങൾക്കുള്ള 2023- 24 ലെ ആർദ്ര കേരളം പുരസ്കാരത്തിൽ   മികച്ച മൂന്നാമത്തെ ജില്ലാ പഞ്ചായത്തായി കണ്ണൂർ ജില്ലാ പഞ്ചായത്തിനെ മാറ്റിയത് ആരോഗ്യ, ശുചിത്വ, ജലസംരക്ഷണ മേഖലകളിൽ നടത്തിയ മികച്ച പ്രവർത്തനങ്ങളും നൂതന ഇടപെടലുകളും. ജില്ലാ പഞ്ചായത്തിന് കീഴിലുള്ള ജില്ലാ ആശുപത്രി, ജില്ലാ ഹോമിയോ ആശുപത്രി, ജില്ലാ ആയുർവേദ ആശുപത്രി എന്നിവയുടെ നവീകരണത്തിനും ആധുനിക വൽക്കരണത്തിനും പഞ്ചായത്ത് ഫണ്ടിന് പുറമേ സിഎസ്‌ആർ ഫണ്ടുകൾ കൂടി ലഭ്യമാക്കി നടത്തിയ വികസന പ്രവർത്തനങ്ങൾ അവാർഡ് നേടിയെടുക്കുന്നതിൽ പ്രധാന ഘടകമായി.

ജില്ലാ ആശുപത്രിയിലെ അമ്മയും കുഞ്ഞും ബ്ലോക്ക്, സൂപ്പർ സ്പെഷ്യാലിറ്റി ബ്ലോക്ക്, ജില്ലാ ഹോമിയോ ആയുർവേദ ആശുപത്രികളിലെ സ്പെഷ്യാലിറ്റി ക്ലിനിക്കുകൾ എന്നിവയുടെ പ്രവർത്തന മികവ് പുരസ്‌കാരത്തിൽ നിർണായകമായി. അതോടൊപ്പം  പഞ്ചായത്ത് നടത്തിയ സാന്ത്വന പരിചരണ പ്രവർത്തനങ്ങൾ, ക്ഷയരോഗ ബാധിതർക്കുള്ള പോഷകാഹാരം കിറ്റ് വിതരണം, കണ്ണൂർ ഫൈറ്റ് കാൻസർ പദ്ധതി, ജില്ലാ ആശുപത്രിയിലെ കൃത്രിമ അവയവ വിതരണ പദ്ധതി തുടങ്ങിയ നൂതന പദ്ധതികൾ ആരോഗ്യ മേഖലയിൽ ജില്ലാ പഞ്ചായത്ത് നടപ്പിലാക്കി.

കടൽത്തീരങ്ങളിലെ മാലിന്യ സംസ്കരണത്തിനായി ശുചിത്വ സാഗരം സുന്ദര തീരം പദ്ധതി, ശുചിത്വ ബോധവൽക്കരണ സന്ദേശ യാത്ര മുതലായവയും ജലം സുലഭം, ജല പരിശോധന ലാബ് തുടങ്ങിയ ജല സംരക്ഷണ പദ്ധതികളും ജില്ലാപഞ്ചായത്തിനെ പുരസ്‌കാര നേട്ടത്തിലേക്ക് ഉയർത്താൻ കാരണമായി.