കളക്ടേഴ്സ് @ സ്‌കൂള്‍ പദ്ധതിയുമായി ശുചിത്വമിഷന്‍
മാലിന്യങ്ങള്‍ തരം തിരിച്ച് സംസ്‌കരിക്കേണ്ടതിന്റെ പ്രാധാന്യം കുട്ടികളിലൂടെ കുടുംബങ്ങളിലേക്കും സമൂഹത്തിലേക്കും എത്തിക്കുന്നതിന് ലക്ഷ്യമിട്ട് ശുചിത്വമിഷന്റെ കളക്ടേഴ്സ് @ സ്‌കൂള്‍ പദ്ധതി ജില്ലയിലെ സ്‌കൂളുകളിലും നടപ്പാക്കുന്നു. വലിച്ചെറിയല്‍ മനോഭാവത്തിന് മാറ്റം വരുത്തുന്നതിനും പദ്ധതി ഉന്നമിടുന്നു. അടിമാലി ഗവ ഹൈസ്‌കൂള്‍, കട്ടപ്പന ഗവ ട്രൈബല്‍ ഹയര്‍ സെക്കണ്ടറി സ്‌കൂള്‍ , പൂമാല ഗവ ട്രൈബല്‍ ഹയര്‍ സെക്കണ്ടറി സ്‌കൂള്‍ എന്നിവടങ്ങളില്‍ പദ്ധതിക്ക് തുടക്കമിട്ടു. ശുചിത്വമിഷന്‍ , ഹരിതകേരളം മിഷന്‍ വിദ്യാഭ്യാസ വകുപ്പ് , തദ്ദേശ സ്വയംഭരണ സ്ഥാപനങ്ങള്‍ എന്നിവ സംയുക്തമായാണ് പദ്ധതി സംഘടിപ്പിക്കുന്നത്. പദ്ധതിയുടെ ഭാഗമായി നാലു മിനി മെറ്റീരിയല്‍ കളക്ഷന്‍ ബിന്നുകള്‍ വീതം മൂന്ന് സ്‌കൂളുകളിലും സ്ഥാപിച്ചു. ഉപയോഗശേഷമുള്ള പെറ്റ് ബോട്ടിലുകള്‍ ,ഹാര്‍ഡ് ബോട്ടിലുകള്‍ , പാല്‍ കവറുകള്‍ ,പേപ്പര്‍ എന്നിങ്ങനെ ഉണങ്ങിയതും വൃത്തിയുള്ളതുമായ നാല് തരം അജൈവ വസ്തുക്കള്‍ ബിന്നുകളില്‍ ശേഖരിക്കും. എല്ലാ മാസവും ഒന്നാമത്തെയും മൂന്നാമത്തെയും ബുധനാഴ്ചകളില്‍ അജൈവ പാഴ് വസ്തുക്കള്‍ കുട്ടികള്‍ക്ക് ബിന്നുകളില്‍ നിക്ഷേപിക്കാം. എല്ലാ മാസവും ഒന്നാമത്തെയും മൂന്നാമത്തെയും വ്യാഴാഴ്ചകളില്‍ ബിന്നുകളില്‍ നിന്നും തദ്ദേശ സ്വയംഭരണ സ്ഥാപനങ്ങളിലെ ഹരിതകര്‍മ്മ സേനയോ പ്രാദേശിക പാഴ്വസ്തു വ്യാപാരികളോ പുനഃചംക്രമണത്തിനായി ഇവ ശേഖരിക്കും. നവംബര്‍ ഒന്നിനകം ജില്ലയിലെ എല്ലാ തദ്ദേശ സ്വയം ഭരണ സ്ഥാപന പരിധിയിലും ഒരു സര്‍ക്കാര്‍ സ്‌കൂളിലെങ്കിലും പദ്ധതി ആരംഭിക്കുമെന്ന് ശുചിത്വമിഷന്‍ കോ-ഓര്‍ഡിനേറ്റര്‍ സാജു സെബാസ്റ്റ്യന്‍ പറഞ്ഞു . അടിമാലി സ്‌കൂളില്‍ പദ്ധതിയുടെ ഉദ്ഘാടനം ജില്ലാ പഞ്ചായത്ത് മെമ്പര്‍ ഇന്‍ഫന്റ് തോമസ് നിര്‍വ്വഹിച്ചു. ചടങ്ങില്‍ പഞ്ചായത്ത് പ്രസിഡന്റ് ദീപ രാജീവ് അധ്യക്ഷയായിരുന്നു.
- Log in to post comments