പൊതുമരാമത്ത് വകുപ്പിന് ആറു നില ഓഫീസ് സമുച്ചയം വരുന്നു നിര്‍മാണോദ്ഘാടനം മന്ത്രി ജി സുധാകരന്‍ നിര്‍വഹിച്ചു
കലക്ടറേറ്റ് കെട്ടിടത്തോട് ചേര്‍ന്ന് പൊതുമരാമത്ത് വകുപ്പിന് ആറു നിലയില്‍ ആധുനിക ഓഫീസ് കെട്ടിട സമുച്ചയം വരുന്നു. ഓഫീസ് കോംപ്ലക്‌സിന്റെ നിര്‍മാണോദ്ഘാടനം പൊതുമരാമത്ത് വകുപ്പ് മന്ത്രി ജി സുധാകരന്‍ നിര്‍വ്വഹിച്ചു. വകുപ്പിന്റെ പ്രവര്‍ത്തനങ്ങള്‍ ആധുനിക വല്‍ക്കരിക്കുന്നതിനും ജീവനക്കാര്‍ക്കും സന്ദര്‍ശകര്‍ക്കും മികച്ച സൗകര്യങ്ങള്‍ ഒരുക്കുന്നതിനും വേണ്ടിയാണ് പുതിയ കെട്ടിടം നിര്‍മിക്കുന്നതെന്ന് മന്ത്രി പറഞ്ഞു.
നിലവില്‍ പിഡബ്ല്യുഡി, ഇറിഗേഷന്‍ തുടങ്ങി വിവിധ ഓഫീസുകള്‍ പ്രവര്‍ത്തിച്ചു വരുന്ന കെട്ടിടങ്ങള്‍ നിലനില്‍ക്കുന്ന സ്ഥലത്തോട് ചേര്‍ന്നുള്ള ഭാഗത്താണ് കെട്ടിടത്തിന്റെ ആദ്യഘട്ടം നിര്‍മാണം തുടങ്ങുന്നത്. ഇത് പൂര്‍ത്തിയാവുന്ന മുറയ്ക്ക് ഓഫീസുകള്‍ പുതിയ കെട്ടടത്തിലേക്ക് മാറ്റും. അതിനു ശേഷം നിലവിലെ കെട്ടിടങ്ങള്‍ പൊളിച്ചുമാറ്റിയ സ്ഥലത്താണ് രണ്ടാംഘട്ട പ്രവര്‍ത്തനങ്ങള്‍ നടത്തുക.
7386 ചതുരശ്ര മീറ്റര്‍ വിസ്തീര്‍ണമുള്ള കെട്ടിട സമുച്ചയത്തിന് 20 കോടി രൂപയുടെ എസ്റ്റിമേറ്റാണ് തയ്യാറാക്കിയിരിക്കുന്നതെന്ന് മന്ത്രി പറഞ്ഞു. അടിത്തറയും താഴത്തെ നിലയും നിര്‍മിക്കുന്നതിന് രണ്ട് കോടി രൂപ ഇതിനകം അനുവദിച്ചു കഴിഞ്ഞു. താഴത്തെ നിലയില്‍ സെമിനാര്‍ ഹാള്‍, പാര്‍ക്കിങ് ലോബി, കാന്റീന്‍, സ്‌റ്റേഷനറി റൂം, യുപിഎസ് റൂം, ടോയ്‌ലെറ്റ് ബ്ലോക്ക്, ഇലക്ട്രിക്കല്‍ റൂം എന്നിവയാണ് ഉള്‍പ്പെടുത്തിയിട്ടുള്ളത്.
ഒന്നാം നിലയില്‍ പൊതുമരാമത്ത് കെട്ടിടവിഭാഗം, റോഡ് സെക്ഷന്‍ ആന്റ് അദര്‍ സെക്ഷന്‍ ഓഫീസുകള്‍, രണ്ടാം നിലയില്‍ റോഡ് ഡിവിഷന്‍, എന്‍എച്ച് സബ് ഡിവിഷന്‍, എന്‍എച്ച് സെക്ഷന്‍, ബ്രിഡ്ജസ് ഡിവിഷന്‍ ആന്റ് സെക്ഷന്‍ ഓഫീസുകള്‍, മൂന്നാം നിലയില്‍ എന്‍എച്ച് ഡിവിഷന്‍, മെയിന്റനന്‍സ് ഡിവിഷന്‍, സബ് ഡിവിഷന്‍, ഇറിഗേഷന്‍ സെക്ഷന്‍, ക്വാളിറ്റി കണ്‍ട്രോള്‍, ഇലക്ട്രിക്കല്‍ സബ് ഡിവിഷന്‍ ഓഫീസുകള്‍, നാലാം നിലയില്‍ ഇറിഗേഷന്‍ മേജര്‍ ഡിവിഷന്‍, ഇറിഗേഷന്‍ മൈനര്‍ സബ് ഡിവിഷന്‍, ഇന്‍ലാന്‍ഡ് നാവിഗേഷന്‍ സബ് ഡിവിഷന്‍, ഇന്‍ലാന്‍ഡ് നാവിഗേഷന്‍ ഡിവിഷന്‍ ഓഫീസുകള്‍, അഞ്ചാം നിലയില്‍ ഇറിഗേഷന്‍ എംഐ ഡിവിഷന്‍, സ്റ്റോര്‍ റൂം, ആറാം നിലയില്‍ സ്റ്റെയര്‍ റൂം, വാട്ടര്‍ ടാങ്ക് എന്നിങ്ങനെയാണ് വിഭാവനം ചെയ്തിരിക്കുന്നത്.
ചടങ്ങില്‍ തുറമുഖ പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി അധ്യക്ഷത വഹിച്ചു. മേയര്‍ സുമ ബാലകൃഷ്ണന്‍, ജില്ലാ പഞ്ചായത്ത് പ്രസിഡണ്ട് കെ വി സുമേഷ് എന്നിവര്‍ മുഖ്യാതിഥികളായി. കോര്‍പറേഷന്‍ കൗണ്‍സിലര്‍മാരായ അഡ്വ. ലിഷ ദീപക്, ഇ ബീന, സി എറമുള്ളാന്‍, പിഡബ്ല്യുഡി സൂപ്രണ്ടിംഗ് എഞ്ചിനീയര്‍മാരായ ജി എസ് ദിലീപ് ലാല്‍, ഇ ജി വിശ്വപ്രകാശ്, എക്‌സിക്യൂട്ടീവ് എഞ്ചിനീയര്‍മാരായ ജിഷാകുമാരി, എം ജഗദീഷ്, വിവിധ കക്ഷിനേതാക്കള്‍ തുടങ്ങിയവര്‍ സംസാരിച്ചു.
- Log in to post comments