അമ്പലപ്പുഴ ലൈഫ് മിഷൻ കുടുംബസംഗമം : സ്വപ്ന ഭവന സാക്ഷാത്കാരത്തിനൊപ്പം തുടർസേവനങ്ങളും...

ആലപ്പുഴ : സ്വപ്ന ഭവന സാക്ഷാത്കാരത്തിന്റെ സന്തോഷം പങ്കുവയ്ക്കുന്നതിനൊപ്പം തുടർ ജീവിതത്തിൽ ആവശ്യമായ വിവിധ സേവനങ്ങളും ഉറപ്പുവരുത്തുന്നതായിരുന്നു അമ്പലപ്പുഴ ബ്ലോക്ക്‌ പഞ്ചായത്തിലെ ലൈഫ് മിഷൻ കുടുംബ സംഗമം. അമ്പലപ്പുഴ ബ്ലോക്ക്‌ പഞ്ചായത്തിൽ ലൈഫ് ഗുണഭോക്താക്കൾക്കായി 23 വകുപ്പുകളുടെ  സേവനമാണ് ഉറപ്പാക്കിയത്.
അദാലത്തിൽ വിവിധ വകുപ്പുകളിൽ നിന്നായി  നിരവധി അപേക്ഷകളാണ് ലഭിച്ചത്. സ്വീകരിച്ച അപേക്ഷകൾ തുടർ നടപടികൾക്കായി അതതു വകുപ്പുകളിലേക്കു നൽകും.  ഗ്രാമവികസനം, വ്യവസായം, കൃഷി, ആരോഗ്യം,, പട്ടികജാതി പട്ടിക വർഗ്ഗ വികസനം, ദാരിദ്ര്യ ലഘൂകരണം, കുടുംബശ്രീ, അക്ഷയ, ലീഡ് ബാങ്ക്, സിവിൽ സപ്ലൈസ്, കൃഷി വകുപ്പ്, സാമൂഹ്യ നീതി, ഫിഷറിസ്, വ്യവസായ വകുപ്പ്, ക്ഷീര വികസനം, വനിതാ ശിശു വികസനം  തുടങ്ങിയ വകുപ്പുകളുടെ സേവനം ലഭ്യമാക്കി.

സിവിൽ സപ്ലൈസ്  വകുപ്പിൽ 68 അപേക്ഷകൾ ലഭിച്ചതിൽ 16 എണ്ണം തീർപ്പാക്കി. 11 അപേക്ഷകൾ ആധാർ കാർഡ് പാൻ കാർഡ് തിരുത്തലുകൾക്കും 32 അപേക്ഷകൾ  റേഷൻ കാർഡ് പേര് ചേർക്കൽ, തിരുത്തൽ എന്നിവയ്ക്കുമായി ലഭിച്ചു.  ബിൽഡിംഗ്‌ മെറ്റീരിയൽ വിഭാഗത്തിൽ ആകെ 150 അപേക്ഷയാണ് ലഭിച്ചത്. കുടുംബശ്രീയിൽ സ്വയം തൊഴിലുമായി ബന്ധപ്പെട്ടു 11 അപേക്ഷയും ലീഡ് ബാങ്കിൽ 46 അപേക്ഷയും ലഭിച്ചു.
ആരോഗ്യ വകുപ്പിന്റെ സ്റ്റാളിലുടെ ജീവിതശൈലി രോഗങ്ങൾ ഗുണഭോക്താക്കൾ പരിശോധിച്ചു.   കൃഷിവകുപ്പിൽ 21 അപേക്ഷകൾ ലഭിച്ചു. കൂടാതെ 58 അന്വേഷണങ്ങളും  ഗുണഭോക്താക്കളിൽ നിന്നും ലഭിച്ചു. ആകെ 30  എണ്ണം തീർപ്പാക്കി.  ക്ഷീര വകുപ്പിൽ 12 അപേക്ഷകളും എസ് സി -എസ് ടി വിഭാഗത്തിൽ 10 അപേക്ഷകളുമാണ് ലഭിച്ചത്. സർക്കാരിന്റെ വിവിധ പദ്ധതികളെ കുറിച്ചും, അനുകുല്യങ്ങളെ കുറിച്ചും ഗുണഭോക്താക്കളിൽ അവബോധം സൃഷ്‌ടിക്കാനും സംഗമത്തിലൂടെ സാധിച്ചു.