മുല്ലശ്ശേരിയിൽ ലൈഫ്മിഷൻ കുടുംബ സംഗമവും അദാലത്തും ഇന്ന്

മുല്ലശ്ശേരി ലൈഫ്മിഷൻ കുടുംബ സംഗമത്തിന്റെയും അദാലത്തിന്റെയും ബ്ലോക്ക് തല ഉദ്ഘാടനം ഇന്ന് (ജനുവരി 11 ശനി). വെങ്കിടങ്ങ് മേച്ചേരിപ്പടി അൽ ബസറ ഓഡിറ്റോറിയത്തിൽ വെച്ച് നടക്കുന്ന ചടങ്ങിൽ രാവിലെ 9 മുതൽ ലൈഫ്മിഷൻ / പി.എം.എ.വൈ. (ജി) ഗുണഭോക്താക്കളുടെ രജിസ്‌ട്രേഷനും അദാലത്തും നടക്കും. ഉച്ചയ്ക്ക് 12 മണിക്ക് തദ്ദേശ സ്വയംഭരണ വകുപ്പ് മന്ത്രി എ.സി.മൊയ്തീൻ ഉദ്ഘാടനം നിർവ്വഹിക്കും. മണലൂർ മണ്ഡലം മുരളി പെരുനെല്ലി എം.എൽ.എ. ചടങ്ങിൽ അദ്ധ്യക്ഷത വഹിക്കും.
കേരള സർക്കാർ നടപ്പിലാക്കി വരുന്ന സമ്പൂർണ്ണ പാർപ്പിട പദ്ധതിയായ ലൈഫ് മിഷന് കീഴിൽ ഇതിനോടകം ഒന്നരലക്ഷത്തിൽപരം വീടുകളുടെ നിർമ്മാണം പൂർത്തിയായിട്ടുണ്ട്. സംസ്ഥാനതലത്തിൽ രണ്ടു ലക്ഷം വീടുകളുടെ പൂർത്തീകരണത്തിന്റെ പ്രഖ്യാപനം ജനുവരി 26-ന് മുഖ്യമന്ത്രി പിണറായി വിജയൻ നിർവഹിക്കും. ഇതിനു മുന്നോടിയായാണ് മുല്ലശ്ശേരി ബ്ലോക്ക് പഞ്ചായത്തിന് കീഴിൽ ലൈഫ് പദ്ധതിയിൽ വീട് നിർമാണം പൂർത്തിയാക്കിയ ഗുണഭോക്താക്കളുടെ കുടുംബസംഗമവും അദാലത്തും സംഘടിപ്പിച്ചിരിക്കുന്നത്. കൂടാതെ ലൈഫ് ഗുണഭോക്താക്കൾക്ക് സംസ്ഥാന കേന്ദ്ര സർക്കാരുകളുടെ വിവിധ ക്ഷേമപദ്ധതികളും സേവനങ്ങളും നേരിട്ട് ലഭ്യമാക്കുന്നതിനാണ് കുടുംബസംഗമത്തോടൊപ്പം ഇരുപതോളം വകുപ്പുകളുടെ പങ്കാളിത്തത്തോടെ അദാലത്തുകൾ സംഘടിപ്പിക്കുന്നത്.