കോവിഡ് 19 മുഖ്യമന്ത്രിയുടെ ദുരിതാശ്വാസ നിധി; കടയ്ക്കല്‍ ഗ്രാമപഞ്ചായത്ത് 21,03,200 രൂപ  കൈമാറി

കോവിഡ് 19 വൈറസ് വ്യാപന പ്രതിരോധ പ്രവര്‍ത്തനങ്ങള്‍ക്കായി മുഖ്യമന്ത്രിയുടെ ദുരിതാശ്വാസ നിധിയിലേക്ക് 21,03,200 രൂപ കടയ്ക്കല്‍ ഗ്രാമപഞ്ചായത്ത് കൈമാറി. ഗ്രാമപഞ്ചായത്തിന്റെ തനത് ഫണ്ടില്‍ നിന്നും 20 ലക്ഷം രൂപയും പഞ്ചായത്ത് ജനപ്രതിനിധികളുടെ മാര്‍ച്ച് മാസത്തെ ഓണറേറിയം 1,03,200 രൂപയും ചേര്‍ത്തുള്ള തുകയാണ് പ്രസിഡന്റ് ആര്‍ എസ് ബിജു ജില്ലാ കലക്ടര്‍ ബി അബ്ദുല്‍ നാസറിന് കൈമാറിയത്.
കലക്ടറുടെ ചേംബറില്‍ നടന്ന ചടങ്ങില്‍ പഞ്ചായത്ത് ഡെപ്യൂട്ടി ഡയറക്ടര്‍ ബിനുന്‍  വാഹിദ്, കടയ്ക്കല്‍ ഗ്രാമപഞ്ചായത്ത്  വികസനകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ എം  ഷാജഹാന്‍, അസിസ്റ്റന്റ് സെക്രട്ടറി മുജീബ് തുടങ്ങിയവര്‍ പങ്കെടുത്തു.