ആയിരത്തോളം രോഗികള്‍ക്ക് ഡയാലിസിസ് കിറ്റുകളെത്തിച്ച് താനൂര്‍ എം.എല്‍.എ ആസ്തി വികസന ഫണ്ടില്‍ നിന്ന് അനുവദിച്ചത് 2.2 കോടി രൂപ
താനൂര്‍ മണ്ഡലത്തിലെ നിര്‍ധനരായ എല്ലാ കിഡ്നി രോഗികള്‍ക്കും എം.എല്‍.എ വി.അബ്ദുറഹിമാന്റെ നേതൃത്വത്തില്‍ ഡയാലിസിസ് കിറ്റുകള്‍ നല്‍കി. മണ്ഡലത്തില്‍ ഇതുവരെ ആയിരത്തോളം കിറ്റുകളാണ് വിവിധ പഞ്ചായത്തുകളിലായി നല്‍കിയത്. ലോക്ക് ഡൗണ്‍ തുടങ്ങിയതോടെ ഡയാലിസിസിനാവശ്യമായ പല മരുന്നുകള്‍ക്കും ക്ഷാമം നേരിട്ട ഘട്ടത്തിലാണ് എം.എല്‍.എ സ്വന്തം നിലയില്‍ കാരുണ്യഹസ്തവുമായി മുന്നിട്ടിറങ്ങിയത്. കോഴിക്കോട്, മംഗലാപുരം, ബാംഗ്ലൂര്‍ തുടങ്ങി വിവിധ സ്ഥലങ്ങളില്‍ നിന്ന് മരുന്നുകളെത്തിക്കുകയായിരുന്നു. താനാളൂര്‍ ഡയാലിസിസ് സെന്റര്‍, ഒഴൂര്‍ കുടുംബാരോഗ്യ കേന്ദ്രം, പൊന്‍ മുണ്ടം, ചെറിയമുണ്ടം ഹെല്‍ത്ത് സെന്ററുകള്‍, താനൂര്‍ സാമൂഹികാരോഗ്യ കേന്ദ്രത്തിലേയും, നിറമരുതൂര്‍ പഞ്ചായത്തിലേയും പരിരക്ഷാ വിഭാഗം എന്നിവിടങ്ങളിലെല്ലാം ആവശ്യമായ മരുന്നുകളും സര്‍ജിക്കല്‍ ഉപകരണങ്ങളുമെത്തിച്ചു നല്‍കി.
വാണിയന്നൂരില്‍ സൗജന്യചികിത്സ നടത്തി വരുന്ന അഭയം ഡയാലിസിസ് സെന്ററിനും മുഴുവന്‍ രോഗികള്‍ക്കുമുള്ള കിറ്റുകളാണ് വിതരണം ചെയ്തത്. മണ്ഡലത്തിലെ മറ്റു രോഗികള്‍ക്ക് അത്യാവശ്യ ഘട്ടങ്ങളില്‍ മരുന്നുകളെത്തിക്കാനുള്ള സജ്ജീകരണങ്ങളും എം.എല്‍.എ ഏര്‍പ്പെടുത്തിയിട്ടുണ്ട്. മെഡിക്കല്‍ കോളജില്‍ നിന്നും മറ്റും സൗജന്യ നിരക്കില്‍ ലഭിച്ചിരുന്ന മരുന്നുകള്‍ ലഭിക്കാതെ വന്‍ വില നല്‍കി പുറത്തു നിന്ന് വാങ്ങാന്‍ കഴിയാതെ വലഞ്ഞ അനേകം പേര്‍ക്ക് എം .എല്‍ .എയുടെ ഇടപെടല്‍ ആശ്വാസമായി.
തിരൂര്‍ ജില്ലാ ആശുപത്രിയിലെ പാലിയേറ്റ് വിഭാഗത്തിലുള്ള മുഴുവന്‍ രോഗികള്‍ക്കും എം.എല്‍.എയുടെ നേതൃത്വത്തില്‍ മരുന്നുകളെത്തിച്ചു. താനാളൂര്‍ ഡയാലിസിസ് സെന്ററിലേക്ക് മൂന്ന് ഡയാലിസിസ് യൂനിറ്റുകള്‍ വാങ്ങാന്‍ എം.എല്‍.എ യുടെ ആസ്തി വികസന പദ്ധതിയിലുള്‍പ്പെടുത്തി 20 ലക്ഷം രൂപ അനുവദിച്ചിട്ടുണ്ട്. കൂടാതെ താനൂരിലെ ആരോഗ്യ മേഖലയിലെ അടിസ്ഥാന വികസന പ്രവര്‍ത്തനങ്ങള്‍ക്കായി രണ്ടു കോടി രൂപയും എം.എല്‍ എ അനുവദിച്ചിട്ടുണ്ട്. മണ്ഡലത്തിലെ മുഴുവന്‍ പഞ്ചായത്തുകളിലെയും താനൂര്‍ നഗരസഭയിലെയും ആരോഗ്യ ഉപകേന്ദ്രങ്ങളുടെ നിര്‍മാണ പ്രവൃത്തികള്‍ക്കായി തുക വിനിയോഗിക്കാനാണ് തീരുമാനം.
- Log in to post comments