അട്ടപ്പാടിയുടെ സമഗ്രവികസന പദ്ധതി അവതരിപ്പിച്ച് ജില്ലാ വികസന സമിതി യോഗം
അടപ്പാടിയുടെ സമഗ്ര വികസനം വികസനം ലക്ഷ്യമാക്കി ആവിഷ്‌ക്കരിച്ച 'തുണൈ' പദ്ധതി ജില്ലാ വികസന സമിതിയില്‍ അവതരിപ്പിച്ചു. ജില്ലയിലെ വിവിധ വകുപ്പുകളിലെ ഓഫീസര്‍മാരുടെ മേല്‍നോട്ടത്തിലാണ് പദ്ധതി നടപ്പിലാക്കുന്നതെന്ന് ജില്ലാ കളക്ടര്‍ ജി പ്രിയങ്ക പറഞ്ഞു.
നെല്ല് സംഭരണവും സംഭരണ വില വിതരണവും വേഗത്തിലാക്കി കര്‍ഷകര്‍ അഭിമുഖീകരിക്കുന്ന പ്രശ്നങ്ങള്‍ക്ക് പരിഹാരം കാണണമെന്ന് ആവശ്യപ്പെട്ട് കെ.ഡി പ്രസേനന്‍ എം എല്‍ എ യോഗത്തില്‍ പ്രമേയം അവതരിപ്പിച്ചു. എം എല്‍ എമാരായ കെ. ബാബു രാഹുല്‍ മാങ്കൂട്ടത്തില്‍ എന്നിവര്‍ പ്രമേയത്തെ പിന്താങ്ങി. ആലത്തൂര്‍ താലൂക്ക് ആശുപത്രിയില്‍ മരുന്നിന്റെ ലഭ്യത ഉറപ്പുവരുത്തണമെന്ന് കെ. ഡി പ്രസേനന്‍ എം എല്‍ എ പറഞ്ഞു.
പല്ലശന റോഡ് നവീകരണം 10 ദിവസത്തിനകം പൂര്‍ത്തീകരിക്കാന്‍ നടപടി സ്വീകരിക്കണമെന്ന് ബന്ധപ്പെട്ട ഉദ്യോഗസ്ഥര്‍ക്ക് എം എല്‍ എ നിര്‍ദ്ദേശം നല്‍കി. ആലത്തൂര്‍ എന്‍ എച്ച് ലെ സര്‍വ്വീസ് റോഡ് ടാറിങ്ങ് പ്രവൃത്തി സമയബന്ധിതമായി പൂര്‍ത്തികരിക്കാന്‍ വേണ്ട നടപടികള്‍ സ്വീകരിക്കാന്‍ കളക്ടര്‍ എഡിഎമ്മിനെ ചുമതലപ്പെടുത്തി.
നെല്ലിയാമ്പതി , പുലയമ്പാറ, നൂറടി, പറമ്പിക്കുളം എന്നിവിടങ്ങളില്‍ പട്ടയമില്ലാതെ താമസിക്കുന്ന കുടുബങ്ങള്‍ക്ക് പട്ടയമനുവദിക്കുന്ന വിഷയത്തില്‍ മെയ് മാസത്തില്‍ തന്നെ സര്‍വേ പൂര്‍ത്തിയാക്കണമെന്ന് കെ ബാബു എം എല്‍ എ യോഗത്തില്‍ നിര്‍ദ്ദേശിച്ചു.
ലാന്റ് ബാങ്ക് പദ്ധതിയിലുള്‍പ്പെട്ട പറമ്പിക്കുളം മേഖലയിലെ മുതലമട ചെമ്മണാംപാതയില്‍ എസ് ടി വിഭാഗക്കാര്‍ക്ക് 26 ഏക്കറോളം ഭൂമി നല്‍കുന്ന വിഷയത്തില്‍ റിപ്പോര്‍ട്ട് അടുത്ത മാസം നല്‍കണമെന്നും സുന്ദര കോളനിയില്‍ 86 കുടുംബങ്ങള്‍ക്ക് പട്ടയം നല്‍കുന്ന പ്രശ്നവുമായി ബന്ധപ്പെട്ട വിഷയത്തില്‍ മുനിസിപ്പാലിറ്റി എന്‍ ഒ സി നല്‍കാനും എം എല്‍ എ നിര്‍ദ്ദേശം നല്‍കി.
പറമ്പിക്കുളം പി എച്ച് സി യില്‍ ഒരാഴ്ച്ചയ്ക്കുള്ളില്‍ ഡോക്ടറേയും ജെ പി എച്ച് എന്‍ നേയും നിയമിക്കണമെന്നും മറ്റ് ജീവനക്കാരേയും കാലതാമസം കൂടാതെ നിയമിക്കുന്നതിനും ജില്ലാ കളക്ടര്‍ ജില്ലാ മെഡിക്കല്‍ ഓഫീസറെ ചുമതലപ്പെടുത്തി.
പാലക്കാട് കെ എസ് ആര്‍ ടി സി ബസ് സ്റ്റാന്‍ഡില്‍ എയ്ഡ് പോസ്റ്റ് സ്ഥാപിക്കുന്നതിന് ഉടന്‍ നടപടിയെടുക്കണമെന്നും റോഡരികില്‍ നിര്‍ത്തിയിട്ടിരിക്കുന്ന ബസുകള്‍ അപകടകരമായ രീതിയില്‍ പാര്‍ക്ക് ചെയ്യുന്നതുമായി ബന്ധപ്പെട്ട് രാഹുല്‍ മാങ്കൂട്ടത്തില്‍ എം എല്‍ എ ഉന്നയിച്ച പരാതിയില്‍ അടിയന്തര നടപടിയെടുക്കണമെന്ന് ജില്ലാ കളക്ടര്‍ ആര്‍ ടി ഒ (എന്‍ഫോഷ്സ്മെന്റ)് യോട് നിര്‍ദ്ദേശിച്ചു. നഗരത്തിലെ ഗതാഗതകുരുക്ക് ഒഴിവാക്കുന്നതിനും സ്‌കൂള്‍ പരിസരങ്ങളില്‍ സൈന്‍ ബോര്‍ഡ്, സ്പീഡ് ബ്രേക്കര്‍ എന്നിവ സ്ഥാപിക്കുന്നതിനും സാങ്കേതിക പഠനം നടത്തണമെന്ന് രാഹുല്‍ മാങ്കൂട്ടത്തില്‍ എം എല്‍ എ പറഞ്ഞു.
മംഗലം ഗാന്ധി സ്മാരക സ്‌കൂളിലെ കുട്ടികള്‍ക്ക് റോഡ് മുറിച്ചു കടക്കുന്നതിന് കാല്‍നടപ്പാലം നിര്‍മ്മിക്കുന്നതിന് ടെണ്ടര്‍ നല്‍കിയിട്ടുണ്ടെന്ന് പി പി സുമോദ് എം എല്‍ എ യുടെ ചോദ്യത്തിന് മറുപടിയായി യോഗത്തില്‍ അറിയിച്ചു.
പട്ടാമ്പി മണ്ഡലത്തിലെ റവന്യൂ ടവര്‍ നിര്‍മ്മാണ പ്രവര്‍ത്തനവുമായി ബന്ധപ്പെട്ട് പോസ്റ്റുകള്‍ സൈറ്റില്‍ നിന്നും എത്രയും പെട്ടന്ന് എടുത്തു മാറ്റണമെന്ന് മുഹമ്മദ് മുഹസിന്‍ എം എല്‍ എ കെഎസ്ഇബി ഉദ്യേഗസ്ഥര്‍ക്ക് നിര്‍ദ്ദേശം നല്‍കി. പൂവാന്‍ചോലയിലേക്ക് പോകുന്ന ഗ്രാമീണ റോഡിലൂടെ സമീപത്ത് പ്രവര്‍ത്തിക്കുന്ന ക്വാറിയിലേക്ക് പോകുന്ന വലിയ വാഹനങ്ങള്‍ നിരന്തരം കടന്നു പോകുന്നത് കുട്ടികള്‍ ഉള്‍പ്പെടെ ഉള്ളവര്‍ക്ക് ഭീഷണി ആയതിനാല്‍ ഇത് നിയന്ത്രിക്കുന്നതിനുള്ള നടപടി സ്വീകരിക്കണമെന്നും എം എല്‍ എ പറഞ്ഞു. ജില്ലയിലെ കേര പദ്ധതിയുടെ നിജസ്ഥിതിയെക്കുറിച്ച് ചിറ്റൂര്‍ എം എല്‍ എ യുടെ പ്രതിനിധി ആവശ്യപ്പെട്ടു.
കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ എംഎല്‍എമാരായ കെ ഡി പ്രസേനന്‍, കെ ബാബു, പി പി സുമോദ്, രാഹുല്‍ മാങ്കൂട്ടത്തില്‍, മുഹമ്മദ് മുഹസിന്‍, മന്ത്രി കെ കൃഷ്ണന്‍കുട്ടിയുടെ പ്രതിനിധി, എഡിഎം കെ മണികണ്ഠന്‍, ജില്ലാ പ്ലാനിങ്് ഓഫീസര്‍ രത്‌നേഷ് (ഇന്‍ ചാര്‍ജ്ജ്), ഡെപ്യൂട്ടി കളക്ടര്‍ (എല്‍ ആര്‍) സക്കീര്‍ ഹുസൈന്‍ വിവിധ വകുപ്പ് മേധാവികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.
- Log in to post comments