ആനന്ദപുരം ബ്ലോക്ക് കുടുംബാരോഗ്യ കേന്ദ്രത്തിലെ വെയിറ്റിംഗ് ഏരിയയുടെ നിര്മ്മാണോദ്ഘാടനം നടത്തി
ഇരിങ്ങാലക്കുട ബ്ലോക്ക് പഞ്ചായത്തിന്റെ കീഴില് വരുന്ന ആനന്ദപുരം ബ്ലോക്ക് കുടുംബാരോഗ്യ കേന്ദ്രത്തില് ഒ.പി ബ്ലോക്കിലെ വെയിറ്റിംഗ് ഏരിയയുടെ നിര്മ്മാണോദ്ഘാടനം ഉന്നത വിദ്യാഭ്യാസ-സാമൂഹിക നീതി വകുപ്പ് മന്ത്രി ഡോ. ആര്. ബിന്ദു നിര്വ്വഹിച്ചു. സംസ്ഥാന സര്ക്കാരിന്റെ ആര്ദ്രം പദ്ധതിയില് ഉള്പ്പെടുത്തി 37.5 ലക്ഷം രൂപ ചെലവഴിച്ചാണ് കാത്തിരിപ്പ് കേന്ദ്രം നിര്മ്മിക്കുന്നത്.
ആനന്ദപുരം കുടുംബാരോഗ്യ കേന്ദ്രത്തിന്റെ പരിസരത്ത് നടന്ന ചടങ്ങില് ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്റ് ടി.ജി ശങ്കരനാരായണന് അധ്യക്ഷത വഹിച്ചു. ജില്ലാ പഞ്ചായത്തംഗം ജോസ്. ജെ. ചിറ്റിലപ്പിള്ളി, മുരിയാട് ഗ്രാമപഞ്ചായത്ത് പ്രസിഡന്റ് സരള വിക്രമന്, ഇരിങ്ങാലക്കുട ബ്ലോക്ക് പഞ്ചായത്ത് വൈസ് പ്രസിഡന്റ് നിമിഷ ശ്രീനിവാസന് തുടങ്ങിയവര് വിശിഷ്ടാതിഥികളായി.
ഇരിങ്ങാലക്കുട ബ്ലോക്ക് ആരോഗ്യ-വിദ്യാഭ്യാസ സ്റ്റാന്ഡിങ് കമ്മിറ്റി ചെയര്പേഴ്സണ് വൃന്ദ അജിത് കുമാര്, ബ്ലോക്ക് പഞ്ചായത്ത് വികസന സ്റ്റാന്ഡ് കമ്മിറ്റി ചെയര്പേഴ്സണ് എന്.ബി പവിത്രന്, ക്ഷേമകാര്യ സ്റ്റാന്ഡ് കമ്മിറ്റി ചെയര്പേഴ്സണ് പി.ഡി നെല്സണ്, ആനന്ദപുരം സി.എച്ച്.സി സുപ്രണ്ട് ഡോ. കെ.കെ ശ്രീവത്സന്, ഇരിങ്ങാലക്കുട ബ്ലോക്ക് പഞ്ചായത്ത് സെക്രട്ടറി കെ.കെ നിഖില്, ഇരിങ്ങാലക്കുട ബ്ലോക്ക് പഞ്ചായത്ത് അംഗങ്ങള്, ഗ്രാമ പഞ്ചായത്ത് അംഗങ്ങള്, വിവിധ രാഷ്ട്രീയ പാര്ട്ടി പ്രതിനിധികള്, ആശുപത്രി ജീവനക്കാര് തുടങ്ങിയവര് പങ്കെടുത്തു.
- Log in to post comments