ആറളം ഫാമും പുനരധിവാസ മേഖലയും സന്ദര്‍ശിച്ച് ജില്ലാ ജഡ്ജി
ആറളം ഫാമിലെയും പുനരധിവാസ മേഖലയിലെയും ജനങ്ങളുടെ ജീവിത സാഹചര്യങ്ങള്‍ നേരിട്ടറിയാനും പ്രദേശത്തെ വികസന പ്രവര്‍ത്തനങ്ങള്‍ വിലയിരുത്തുന്നതിനുമായി പ്രിന്‍സിപ്പല്‍ ജില്ലാ ആന്‍ഡ് സെഷന്‍സ് ജഡ്ജി എം മനോജിന്റെ നേതൃത്വത്തിലുള്ള സംഘം പ്രദേശം സന്ദര്‍ശിച്ചു. ജില്ലാ കളക്ടര്‍ പി വിഷ്ണുരാജ്, സബ് ജഡ്ജിയും ജില്ലാ ലീഗല്‍ സര്‍വീസ് അതോറിറ്റി സെക്രട്ടറിയുമായ എം ശ്രുതി തുടങ്ങിയവരും അദ്ദേഹത്തോടൊപ്പമുണ്ടായിരുന്നു.
ആറളം ഫാമില്‍ ചേര്‍ന്ന യോഗത്തില്‍ ഉദ്യോഗസ്ഥരില്‍ നിന്ന് ഫാമിന്റെ പ്രവര്‍ത്തനങ്ങളുടെ വിശദാംശങ്ങള്‍ അദ്ദേഹം ചോദിച്ചറിഞ്ഞു. തുടര്‍ന്ന് വളയംചാലിലെ കുടുംബശ്രീ പരിശീലന കേന്ദ്രത്തില്‍ പഞ്ചായത്ത് അധികൃതര്‍, വിവിധ വകുപ്പുദ്യോഗസ്ഥര്‍, ഊരുപ്രമുഖര്‍, സാമൂഹിക പ്രവര്‍ത്തകര്‍, കുടുംബശ്രീ ആനിമേറ്റര്‍മാര്‍, പ്രൊമോട്ടര്‍മാര്‍, ഉന്നതികളിലെ താമസക്കാര്‍ എന്നിവരുമായി അദ്ദേഹം ആശയ വിനിമയം നടത്തി.
പ്രദേശത്തിന്റെ സമഗ്രമായ വികസനത്തിനും ജനങ്ങളുടെ പുരോഗതിക്കും വകുപ്പുകളുടെ ഏകോപിച്ചുള്ള പ്രവര്‍ത്തനങ്ങള്‍ അനിവാര്യമാണെന്ന് അദ്ദേഹം പറഞ്ഞു. ജനങ്ങളുടെ ജീവിത നിലവാരം, ജീവനോപാധികള്‍, കുടിവെള്ളവും വീടുകളും റോഡുകളും ഉള്‍പ്പെടെയുള്ള അടിസ്ഥാന സൗകര്യവികസനം, കൃഷി, കുട്ടികളുടെ വിദ്യാഭ്യാസം, വന്യമൃഗ ആക്രമണം, ആനമതില്‍ അടക്കമുള്ള പ്രതിരോധ മാര്‍ഗങ്ങള്‍, കുട്ടികള്‍ക്കെതിരായ അതിക്രമങ്ങള്‍ തുടങ്ങിയ വിഷയങ്ങള്‍ യോഗത്തില്‍ ഉയര്‍ന്നുവന്നു.
മേഖലയിലെ കുടിവെള്ള നിര്‍മാണത്തിനായി ജലജീവന്‍ മിഷന്‍ പദ്ധതിയില്‍ 80 കിലോമീറ്ററില്‍ പൈപ്പിടല്‍ പൂര്‍ത്തിയായതായി ഉദ്യോഗസ്ഥര്‍ അറിയിച്ചു. വീടുകളില്‍ വാട്ടര്‍ടാപ്പ് കണക്ഷന്‍ നല്‍കുന്നത് പുരോഗമിക്കുകയാണ്. ഇതിനു പുറമെ, 4.8 കോടി രൂപ ചെലവില്‍ ഡിആര്‍ഡിഎം നടപ്പിലാക്കുന്ന കുടിവെള്ള പദ്ധതിയിലൂടെ 1500 കുടുംബങ്ങള്‍ക്ക് ജനുവരിയോടെ കുടിവെള്ളമെത്തിക്കുന്നതിനുള്ള പദ്ധതിയും പുരോഗമിക്കുകയാണ്.
കര്‍ഷകര്‍ക്ക് കൃഷി ചെയ്യുന്നതിനുള്ള തൈകള്‍ വിതരണം ചെയ്യുന്നതിലെ കാലതാമസം ഒഴിവാക്കാന്‍ നടപടി വേണമെന്ന് ജില്ലാ ജഡ്ജി പറഞ്ഞു. ആറളത്തെ മികച്ചയിനം കുരുമുളക്, കശുവണ്ടി, കൊക്കോ തുടങ്ങിയവ ഉള്‍പ്പെടുത്തി ആറളം ബ്രാന്‍ഡിന് രൂപം നല്‍കുന്ന കാര്യം ആലോചിക്കണമെന്ന് ജില്ലാ കളക്ടര്‍ നിര്‍ദ്ദേശം നല്‍കി.
ചില ബ്ലോക്കുകളില്‍ ആവശ്യമായ ഗതാഗത സംവിധാനമില്ലെന്നും വീടുകള്‍ വാസയോഗ്യമല്ലെന്നും യോഗത്തില്‍ പരാതികളുയര്‍ന്നു. എംആര്‍എസ്സിലേക്ക് ഉള്‍പ്പെടെയുള്ള ഒന്‍പത് റോഡുകളുടെ നിര്‍മാണം പുരോഗമിക്കുന്നതായി പൊതുമരാമത്ത് വകുപ്പ് ഉദ്യോഗസ്ഥര്‍ അറിയിച്ചു. പുനരധിവാസ മേഖലയിലെ താമസയോഗ്യമായവയും അല്ലാത്തവയുമായ വീടുകളുടെ കൃത്യമായ ഡാറ്റ ശേഖരണം പുരോഗമിക്കുകയാണെന്നും ഡിസംബറോടെ അത് പൂര്‍ത്തിയാവുമെന്നും ജില്ലാ കളക്ടര്‍ അറിയിച്ചു.
മേഖലയിലെ വിദ്യാഭ്യാസ പ്രശ്‌നങ്ങളും യോഗം ചര്‍ച്ച ചെയ്തു. കുട്ടികളുടെ സ്‌കൂള്‍ പ്രവേശനം ഉറപ്പാക്കുന്നതിനും വിദ്യാര്‍ഥികളുടെ കൊഴിഞ്ഞു പോക്ക് തടയുന്നതിനും രക്ഷിതാക്കള്‍, അധ്യാപകര്‍, ജനപ്രതിനിധികള്‍ ഉള്‍പ്പെടെയുള്ളവര്‍ ഒന്നിച്ചുപ്രവര്‍ത്തിക്കണമെന്ന് ജില്ലാ ജഡ്ജി പറഞ്ഞു. കുട്ടികള്‍ക്കെതിരായ അതിക്രമങ്ങള്‍ തടയുന്നതിനും ശക്തമായ നടപടികള്‍ വേണം.
ആറളം ഹൈസ്‌കൂള്‍, ഹയര്‍ സെക്കന്‍ഡറി സ്‌കൂള്‍, പ്രീമെട്രിക് ഹോസ്റ്റല്‍, മോഡല്‍ റെസിഡന്‍ഷ്യല്‍ സ്‌കൂള്‍ എന്നിവ സന്ദര്‍ശിച്ച ജില്ലാ ജഡ്ജിയും സംഘവും കുട്ടികളുമായി ആശയവിനിമയം നടത്തി. നന്നായി പഠിക്കുന്നതിനോടൊപ്പം നല്ലപോലെ കളിക്കാനും സമയം കണ്ടെത്തണം. വായന പ്രോത്സാഹിപ്പിക്കുന്നതിന് നല്ല പുസ്തകങ്ങള്‍ സമ്മാനമായി നല്‍കുമെന്നും ജഡ്ജി പറഞ്ഞു. കോടതി പ്രവര്‍ത്തനങ്ങള്‍ നേരിട്ടറിയുന്നതിന് വിദ്യാര്‍ഥികള്‍ക്ക് കോടതി സന്ദര്‍ശനത്തിന് സൗകര്യമൊരുക്കും. ജില്ലയ്ക്കു പുറത്തുള്ള സ്ഥലത്തേക്ക് വിനോദയാത്ര പോവാനുള്ള ആഗ്രഹം പങ്കുവച്ച വിദ്യാര്‍ഥികളോട് അതിന് അവസരമൊരുക്കുമെന്നും അദ്ദേഹം ഉറപ്പുനല്‍കി.
ആനമതില്‍ നിര്‍മാണം നടക്കുന്ന പ്രദേശവും ജില്ലാ ജഡ്ജിയും സംഘവും സന്ദര്‍ശിച്ചു. പ്രവൃത്തി നല്ല രീതിയില്‍ പുരോഗമിക്കുന്നതായി പിഡബ്ല്യു ഉദ്യോഗസ്ഥര്‍ അറിയിച്ചു. നിലവില്‍ നൂറിലേറെ ജോലിക്കാര്‍ മതില്‍നിര്‍മാണത്തിന്റെ ഭാഗമായി ജോലി ചെയ്യുന്നുണ്ട്. ഡിസംബറോടെ നിര്‍മാണം പൂര്‍ത്തിയാവുന്ന രീതിയിലാണ് പ്രവൃത്തി പുരോഗമിക്കുന്നത്. ആനമതില്‍ കഴിഞ്ഞുള്ള സ്ഥലത്ത് ഏതെങ്കിലും രീതിയിലുള്ള പ്രതിരോധ മാര്‍ഗം ആവശ്യമാണോ എന്ന കാര്യം പരിഗണിക്കണമെന്ന് ജില്ലാ ജഡ്ജി പറഞ്ഞു. പുനരധിവാസ മേഖലയിലെ ഏതാനും വീടുകളും ജഡ്ജിയും സംഘവും സന്ദര്‍ശിച്ചു.
സബ് കളക്ടര്‍ രവി മീണ, പഞ്ചായത്ത് പ്രസിഡന്റ് വി ശോഭ, ഐടിഡിപി പ്രൊജക്ട് ഓഫീസര്‍ എസ് എസ് സുധീര്‍, ആറളം സൈറ്റ് മാനേജര്‍ ടി ഷൈജു, ജനപ്രതിനിധികള്‍, വകുപ്പുദ്യോഗസ്ഥര്‍ തുടങ്ങിയവരും സംഘത്തെ അനുഗമിച്ചു.
കുട്ടികളുടെ പഠനനിലവാരം മെച്ചപ്പെടുത്താന്‍ സമഗ്ര പദ്ധതി തയ്യാറാക്കും: ജില്ലാ കളക്ടര്‍
ആറളം പുനരധിവാസ മേഖലയിലെ കുട്ടികളുടെ പഠനനിലവാരം മെച്ചപ്പെടുത്താന്‍ സമഗ്ര പദ്ധതി തയ്യാറാക്കുമെന്ന് ജില്ലാ കളക്ടര്‍ പി വിഷ്ണുരാജ്. ജില്ലാ ജഡ്ജി എം മനോജിന്റെ ആറളം സന്ദര്‍ശനവുമായി ബന്ധപ്പെട്ട് ചേര്‍ന്ന യോഗത്തിലാണ് ജില്ലാ കളക്ടര്‍ ഇക്കാര്യം അറിയിച്ചത്.
പഠനത്തോട് വിദ്യാര്‍ഥികള്‍ക്ക് താല്‍പര്യമുണ്ടാക്കുകയെന്നതാണ് ഏറ്റവും പ്രധാനം. ഇതിനായി പഠനം രസകരമാക്കുന്നതിനുള്ള വിവിധ പദ്ധതികള്‍ നടപ്പിലാക്കും. പഠനത്തോടൊപ്പം കായിക വിനോദങ്ങള്‍ക്ക് കൂടുതല്‍ സൗകര്യമൊരുക്കും. കുട്ടികളില്‍ ലക്ഷ്യബോധം സൃഷ്ടിക്കാനും വായനാശീലനം വളര്‍ത്താനും ആവശ്യമായ കാര്യങ്ങള്‍ ചെയ്യും.
സ്‌കൂളില്‍ പ്രവേശനം നേടാത്തവരും ഇടയ്ക്കുവച്ച് കൊഴിഞ്ഞു പോയവരുമായ കുട്ടികളെ കണ്ടെത്തി അവരെ സ്‌കൂളിലെത്തിക്കുന്നതിന് പദ്ധതി ആവിഷ്‌ക്കരിക്കും. ഇതിന്റെ മുന്നോടിയായി ഇത്തരം കുട്ടികളുടെ കണക്കെടുപ്പ് നടത്തിവരികയാണ്. മേഖലയിലെ സ്‌കൂളുകള്‍ക്ക് കായിക, വിനോദ ഉപകരണങ്ങള്‍ ഇതിനകം ലഭ്യമാക്കിയതായും ജില്ലാ കളക്ടര്‍ അറിയിച്ചു.
സ്‌കൂളുകളില്‍ മികച്ച പ്ലേ ഗ്രൗണ്ട് ഉള്‍പ്പെടെയുള്ള സൗകര്യങ്ങളൊരുക്കും. വിദ്യാര്‍ഥികളുടെ താല്‍പര്യമനുസരിച്ചുള്ള സ്‌പോര്‍ട്‌സ് പരിശീലനത്തിനും സംവിധാനമുണ്ടാക്കും. മേഖലയിലെ വിദ്യാര്‍ഥികള്‍ക്ക് ഉള്‍പ്പെടെ മികച്ച അടിസ്ഥാന സൗകര്യങ്ങള്‍ ഒരുക്കുന്നതിന് ആറളത്തിന് സ്‌പെഷ്യല്‍ പാക്കേജ് ആവശ്യമാണെന്നും ജില്ലാ കളക്ടര്‍ അഭിപ്രായപ്പെട്ടു.
- Log in to post comments