ലോക മലമ്പനി നിവാരണദിനം ഇന്ന് (ഏപ്രിൽ 25) പ്രതിരോധ പ്രവർത്തനങ്ങൾ ഊർജ്ജിതമാക്കും  - ഡി.എം.ഒ

മലേറിയ (മലമ്പനി) രോഗത്തിനെതിരെ ജാഗ്രത വേണമെന്നും, ജില്ലയിൽ പ്രതിരോധ പ്രവർത്തനങ്ങൾ കൂടുതൽ ഊർജ്ജിതമാക്കുമെന്നും ജില്ലാ മെഡിക്കൽ ഓഫീസർ (ആരോഗ്യം) അറിയിച്ചു. ഏല്ലാവർഷവും ഏപ്രിൽ 25 ലോക മലമ്പനി നിവാരണ ദിനമായി ആചരിച്ചുവരികയാണ്. മലേറിയ പ്രതിരോധ പ്രവർത്തനങ്ങളെക്കുറിച്ച് ജനങ്ങളിൽ അവബോധമുണ്ടാക്കുകയാണ് ഈ ദിനാചരണത്തിന്റെ ലക്ഷ്യം. മലമ്പനി നിവാരണം യാഥാർത്ഥ്യമാക്കാം: പുനർനിക്ഷേപിക്കാം, പുനർവിചിന്തനം നടത്താം, പുനരുജ്ജ്വലിപ്പിക്കാം എന്നതാണ് ഈ വർഷത്തെ ദിനാചരണ സന്ദേശം.

പ്ലാസ്മോഡിയം വിഭാഗത്തിൽപ്പെട്ട ഒരു ഏകകോശപരാദമാണ് മലമ്പനി രോഗത്തിന് കാരണം. കൊതുകുജന്യരോഗമായ മലമ്പനി അനോഫിലിസ് വിഭാഗത്തിൽപ്പെട്ട പെൺകൊതുകുകളാണ് പകർത്തുന്നത്. പ്ലാസ്മോഡിയം വൈവാക്സ്, പ്ലാസ്മോഡിയം ഫാൽസിപാറം എന്നീ രണ്ടിനങ്ങളാണ് നമ്മുടെ നാട്ടിൽ സാധാരണയായി കണ്ടുവരുന്നത്.

    പനിയോടൊപ്പം ശക്തമായ കുളിരും, തലവേദനയും, പേശിവേദനയുമാണ് പ്രാരംഭരോഗലക്ഷണങ്ങൾ. വിറയലോടുകൂടി ആരംഭിച്ച് ശക്തമായ പനിയും, കുളിരും ദിവസേനയോ ഒന്നിടവിട്ടുളള ദിവസങ്ങളിലോ, മൂന്ന് ദിവസം കൂടുമ്പോഴോ ആവർത്തിക്കുന്നത് മലമ്പനിയുടെ പ്രത്യേക ലക്ഷണമായി കരുതാം. ഇതോടൊപ്പം മനംപുരട്ടൽ, ചർദ്ദി, ചുമ, ത്വക്കിലും കണ്ണിലും മഞ്ഞനിറം എന്നിവയും ഉണ്ടാകാം. പനി, ശക്തമായ തലവേദന എന്നീ ലക്ഷണങ്ങൾ മാത്രമായും മലമ്പനി കാണാറുണ്ട്.

    ജില്ലയിൽ കഴിഞ്ഞ 5 വർഷമായി തദ്ദേശീയ മലമ്പനി കേസുകൾ (Indegeuous) റിപ്പോർട്ട് ചെയ്യുന്നില്ലെങ്കിലും.  അതിഥിത്തൊഴിലാളികളിലും അന്തർസംസ്ഥാന-അന്തർദേശീയ യാത്രികർക്കിടയിലും (Imported) വ്യാപകമായി മലേറിയ കേസുകൾ റിപ്പോർട്ട് ചെയ്യുന്നുണ്ട്.

രോഗപ്രതിരോധ മാർഗ്ഗങ്ങൾ

 കൊതുകുകടി ഏൽക്കാതിരിക്കാനായി വ്യക്തിഗത സുരക്ഷാമർഗ്ഗങ്ങൾ സ്വീകരിക്കുക.

 മലമ്പനിക്ക് കാരണമാകുന്ന കൊതുകുകൾ ശുദ്ധജലത്തിൽ മുട്ടയിട്ട് വളരുന്നതിനാൽ വീടിനുളളിലും പരിസരങ്ങളിലും വെളളം കെട്ടി നിൽക്കാനുളള സാഹചര്യം ഒഴിവാക്കുക.

 കിണറുകളും ടാങ്കുകളും കൊതുക് കടക്കാത്തവിധം വലകൊണ്ട് മൂടി സംരക്ഷിക്കുക.

 റോഡ്/കെട്ടിടനിർമ്മാണം നടക്കുന്ന സ്ഥലങ്ങളിലും ജലദൌർലഭ്യമുളള സ്ഥലങ്ങളിലും വെളളം സൂക്ഷിച്ചിരിക്കുന്ന ടാങ്കുകളിലും പാത്രങ്ങളിലും കൊതുക് വളരുന്നില്ലെന്ന് ഉറപ്പാക്കുക.

    പനിയുളളപ്പോൾ രക്തം പരിശോധിച്ച് മലമ്പനി അല്ലെന്ന് ഉറപ്പുവരുത്തണം. യാത്രാ പശ്ചാത്തലമുളളവർ ഇക്കാര്യം ഡോക്ടറോട് പറയുന്നത് ചികിത്സയ്ക്ക് കൂടുതൽ സഹായകരമാകും. സർക്കാർ ആശുപത്രികളിൽ മലമ്പനിക്കെതിരെയുളള പരിശോധനയും ചികിത്സയും സൌജന്യമായി ലഭ്യമാണ്.

  ആരോഗ്യജാഗ്രത പ്രവർത്തനങ്ങളുടെ ഭാഗമായി മഴക്കാല പൂർവ്വ ശുചീകരണ പ്രവർത്തനങ്ങളിലും കൊതുകു നിവാരണ പ്രവർത്തനങ്ങളിലും ഏവരും പങ്കാളികളാകണമെന്നും ജില്ലാ മെഡിക്കൽ ഓഫീസർ (ആരോഗ്യം) അറിയിച്ചു.