നിയമസഭാ തിരഞ്ഞെടുപ്പ്: ഹരിതചട്ടം പാലിച്ച് മാതൃകയായി ജില്ല

നിയമസഭാ തിരഞ്ഞെടുപ്പിനോടനുബന്ധിച്ച് ജില്ലയിൽ ഹരിതചട്ടം കർശനമായി പാലിച്ചുകൊണ്ടുള്ള പ്രവർത്തനങ്ങൾ പുരോഗമിക്കുന്നു. ജില്ലാ ഇലക്ഷൻ ഓഫീസർ കൂടിയായ ജില്ലാ കളക്ടറുടെ നേതൃത്വത്തിൽ ശുചിത്വ മിഷന്റെ സജീവ പങ്കാളിത്തത്തോടെയാണ് പ്രവർത്തനങ്ങൾ ഏകോപിപ്പിക്കുന്നത്.
തിരഞ്ഞെടുപ്പ് സാമഗ്രികളുടെ വിതരണ കേന്ദ്രങ്ങളിൽ ഹരിതചട്ടം പാലിക്കുന്നുണ്ടെന്ന് ഉറപ്പുവരുത്താൻ ജില്ലാ ശുചിത്വ മിഷൻ കോർഡിനേറ്ററുടെ നേതൃത്വത്തിൽ പ്രത്യേക പരിശോധന നടത്തി. വിതരണ കേന്ദ്രങ്ങളിലും അനുബന്ധ ഇടങ്ങളിലും പരിസ്ഥിതി സൗഹൃദമായ രീതിയിലാണ് ക്രമീകരണങ്ങൾ ഒരുക്കിയിരുന്നത്. 
 
ഡിസ്പോസിബിൾ വസ്തുക്കൾക്ക് വിലക്ക്: ഭക്ഷണത്തിനായി സ്റ്റീൽ പ്ലേറ്റുകളും സ്റ്റീൽ ഗ്ലാസുകളും മാത്രമാണ് ഉപയോഗിക്കുന്നത്.
 
പ്ലാസ്റ്റിക് വിമുക്തം: പ്ലാസ്റ്റിക് വസ്തുക്കളുടെ ഉപയോഗം പൂർണ്ണമായും ഒഴിവാക്കുകയും പേപ്പർ ഉപയോഗം പരമാവധി കുറയ്ക്കുകയും ചെയ്തു.
 
മാലിന്യ സംസ്‌കരണം: ഭക്ഷണാവശിഷ്ടങ്ങളും മറ്റ് പാഴ് വസ്തുക്കളും ശാസ്ത്രീയമായ രീതിയിൽ ശേഖരിക്കാനും സംസ്‌കരിക്കാനുമുള്ള ബിൻ സംവിധാനങ്ങൾ ഓരോ കേന്ദ്രത്തിലും ഒരുക്കിയിട്ടുണ്ട്.

തിരഞ്ഞെടുപ്പ് ഉദ്യോഗസ്ഥരും സന്നദ്ധ പ്രവർത്തകരും വളരെ മാതൃകാപരമായ രീതിയിലാണ് ഈ പ്രവർത്തനങ്ങളോട് സഹകരിക്കുന്നത്. വോട്ടെടുപ്പ് ദിവസവും തുടർന്നും ഹരിതചട്ടം കർശനമായി പാലിക്കപ്പെടുന്നുണ്ടെന്ന് ഉറപ്പാക്കാൻ ശുചിത്വ മിഷൻ സംഘം നിരന്തര നിരീക്ഷണം നടത്തുമെന്നും അധികൃതർ അറിയിച്ചു.