ഓണ്‍ലൈന്‍ ഗ്രാമസഭ; തേവലക്കരയില്‍ ഇന്ന്(23) മന്ത്രി ഷിബു ബേബി ജോണ്‍ ഉദ്ഘാടനം ചെയ്യും
പ്രവാസികള്‍ ഉള്‍പ്പെടെയുള്ളവര്‍ക്ക് ഗ്രാമസഭ പ്രവര്‍ത്തനങ്ങളില്‍ കൂടുതല്‍ പങ്കാളിത്തം ഉറപ്പാക്കുന്നതിനും ജനപങ്കാളിത്തം വര്‍ധിപ്പിക്കുന്നതിനും ഓണ്‍ലൈന്‍ ഗ്രാമസഭ സംവിധാനം ഒരുക്കുകയാണ് തേവലക്കര ഗ്രാമപഞ്ചായത്ത്. ഇന്ന് ഒക്ക്‌ടോബര്‍ 23ന് വെള്ളിയാഴ്ച വൈകിട്ട് മൂന്നിന് തേവലക്കര ഗ്രാമപഞ്ചായത്തിന്റെ നേതൃത്വത്തില്‍ കെ വി എം സ്‌കൂള്‍ ഓഡിറ്റോറിയത്തില്‍ സംഘടിപ്പിക്കുന്ന വെര്‍ച്വല്‍ ഗ്രാമസഭ മന്ത്രി ഷിബു ബേബി ജോണ്‍ ഓണ്‍ലൈനായി ഉദ്ഘാടനം ചെയ്യും. ഗ്രാമസഭകളിലെ ജനപങ്കാളിത്തം വര്‍ധിപ്പിക്കുന്നതിനും പൊതുജനങ്ങള്‍ക്ക് അഭിപ്രായങ്ങളും നിര്‍ദേശങ്ങളും പങ്കുവയ്ക്കുന്നതിനും ഓണ്‍ലൈന്‍ സംവിധാനം സഹായകമാകും. ഗൂഗിള്‍ മീറ്റ് മുഖേനയാണ് ഓണ്‍ലൈന്‍ ഗ്രാമസഭയില്‍ പങ്കെടുക്കാനുള്ള സൗകര്യം പഞ്ചായത്ത് ഒരുക്കിയിരിക്കുന്നത്. പരമ്പരാഗത ഗ്രാമസഭാ യോഗങ്ങളില്‍ നേരിട്ട് പങ്കെടുക്കാന്‍ കഴിയാത്തവര്‍ക്കും ഈ സംവിധാനത്തിലൂടെ ഗ്രാമസഭാ പ്രവര്‍ത്തനങ്ങളില്‍ പങ്കാളികളാകാം. ജനാധിപത്യ പ്രക്രിയയില്‍ കൂടുതല്‍ ജനങ്ങളെ ഉള്‍പ്പെടുത്തുകയും വികസന പ്രവര്‍ത്തനങ്ങളില്‍ അവരുടെ അഭിപ്രായങ്ങള്‍ പരിഗണിക്കുകയുമാണ് ലക്ഷ്യം.
- Log in to post comments