പിറവം ഉപജില്ലാ സ്കൂൾ കലോത്സവത്തിന് തുടക്കമായി

ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബ് ഉദ്ഘാടനം ചെയ്തു.

 
വിദ്യാർഥികളുടെ കലാപ്രകടനങ്ങൾ വിജയത്തിനപ്പുറം സർഗാത്മകതയുടെയും വ്യക്തിത്വ വികാസത്തിന്റെയും വേദികളായി മാറണമെന്ന് ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബ്.  പിറവം ഉപജില്ലാ സ്കൂൾ കലോത്സവം പാമ്പാക്കുട ഗവൺമെന്റ് ഹയർ സെക്കൻഡറി സ്കൂളിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

കലോത്സവങ്ങളിൽ മത്സരിക്കുന്ന ഓരോ വിദ്യാർഥിക്കും അവരുടെ കഴിവുകൾ പ്രകടിപ്പിക്കാനുള്ള തുല്യ അവസരം ലഭിക്കണം. മത്സരഫലങ്ങൾക്കപ്പുറം പങ്കാളിത്തത്തിനും കലാപരമായ മികവിനും പ്രാധാന്യം നൽകണം. വിധിനിർണയം സുതാര്യവും നീതിപൂർവവുമായിരിക്കണമെന്നും അദ്ദേഹം പറഞ്ഞു. വിദ്യാർഥികളുടെ സർഗാത്മക കഴിവുകൾ പരിപോഷിപ്പിക്കുന്നതിനും കലാ-സാംസ്കാരിക മേഖലകളിൽ കൂടുതൽ അവസരങ്ങൾ ഒരുക്കുന്നതിനും ഇത്തരം കലോത്സവങ്ങൾ സഹായകരമാണെന്നും അദ്ദേഹം കൂട്ടിച്ചേർത്തു.

എറണാകുളത്ത് ജനുവരിയിൽ നടക്കുന്ന സംസ്ഥാന സ്കൂൾ കലോത്സവവും കോലഞ്ചേരിയിൽ നടക്കുന്ന ജില്ലാ സ്കൂൾ കലോത്സവവും വിദ്യാർഥികൾക്ക് മികച്ച പ്രകടനങ്ങൾ കാഴ്ചവയ്ക്കാനുള്ള വേദികളായിരിക്കുമെന്നും കലോത്സവത്തിന്റെ സംഘാടനവും പങ്കാളിത്തവും ഇതിന് കരുത്തേകുമെന്നും അദ്ദേഹം പറഞ്ഞു.

 ചടങ്ങിൽ ജില്ലാ പഞ്ചായത്ത് പ്രസിഡന്റ് കെ ജി രാധാകൃഷ്ണൻ അധ്യക്ഷത വഹിച്ചു. ഫ്രാൻസിസ് ജോർജ് എം പി, പാമ്പാക്കുട ബ്ലോക്ക് പഞ്ചായത്ത് പ്രസിഡന്റ് നെവിൻ ജോർജ്, ബ്ലോക്ക് പഞ്ചായത്ത് വൈസ് പ്രസിഡണ്ട് ജിനി ജിജോയ്, പാമ്പാക്കുട ഗ്രാമപഞ്ചായത്ത് പ്രസിഡന്റ് ഷീല ബാബു, മണീട് ഗ്രാമപഞ്ചായത്ത് പ്രസിഡന്റ് ഷിജി ബിജു, രാമമംഗലം ഗ്രാമ പ്രസിഡന്റ് ജെസ്സി രാജു, എടക്കാട്ടുവയൽ ഗ്രാമപഞ്ചായത്ത് പ്രസിഡന്റ് ജൂലിയ ജെയിംസ്, പാമ്പാക്കുട പഞ്ചായത്ത് വൈസ് പ്രസിഡന്റ് ആശിഷ് എം ജോൺ, ഗ്രാമപഞ്ചായത്ത് സ്ഥിരം സമിതി അധ്യക്ഷർ, ബ്ലോക്ക്‌ പഞ്ചായത്ത്‌ അംഗങ്ങൾ, ഗ്രാമപഞ്ചായത്ത് അംഗങ്ങൾ, വിദ്യാഭ്യാസ വകുപ്പ് ഉദ്യോഗസ്ഥർ, സ്കൂൾ അധികൃതർ, അധ്യാപകർ, പി ടി എ പ്രതിനിധികൾ, സംഘാടകസമിതി ഭാരവാഹികൾ തുടങ്ങിയവർ പങ്കെടുത്തു.