കോവിഡ് 19 ലോക്ക് ഡൗണ്‍ ലംഘനം; ജില്ലാ അതിര്‍ത്തികളില്‍ 24 മണിക്കൂറും ജാഗ്രത
കോവിഡ് 19 സമൂഹ വ്യാപനം തടയുന്നതിനായി ജില്ലാ അതിര്‍ത്തികളില്‍ കര്‍ശനമായ പരിശോധന തുടരുന്നു. കൂടുതല്‍ യാത്രാ വാഹനങ്ങള്‍ അതിര്‍ത്തി കടന്നെത്തിയതോടെ ആരോഗ്യ പരിശോധന കൂടുതല്‍ കര്‍ക്കശമാക്കി. ആരോഗ്യ വകുപ്പിനൊപ്പം ഫുഡ് സേഫ്റ്റി, റവന്യു, തദ്ദേശ സ്വയംഭരണ വകുപ്പ് എന്നിവരടങ്ങിയ സ്‌പെഷല്‍ സ്‌ക്വാഡും പ്രവര്‍ത്തിക്കുന്നുണ്ട്. സ്‌പെഷല്‍ സ്‌ക്വാഡുകളുടെ പ്രവര്‍ത്തനം ഒരാഴച കൂടി തുടരുമെന്നും ജാഗ്രതാ നിര്‍ദ്ദേശങ്ങള്‍ പാലിക്കാത്തപക്ഷം നിയമ നടപടികള്‍ എടുക്കുമെന്നും ജില്ലാ കലക്ടര്‍ ബി അബ്ദുല്‍ നാസര്‍ മുന്നറിയിപ്പു നല്‍കി.
ജില്ലയുടെ വിവിധ അതിര്‍ത്തികളില്‍ പരിശോധനയുടെ ഭാഗമായി പൊലീസും ആരോഗ്യ പ്രവര്‍ത്തകരും അടങ്ങിയ 51 അംഗ സംഘം ഓച്ചിറ(57), താമരക്കുളം(83), കടമ്പാട്ടുകോണം(4,125), ഏനാത്ത്(1,033), ആര്യങ്കാവ് ചെക്ക് പോസ്റ്റ്(1,223) എന്നിവിടങ്ങളിലായി 6,521 പേര്‍ക്ക് സ്‌ക്രീനിംഗ് നടത്തി. ഹെല്‍ഫ്‌ളാഷ് തെര്‍മോ മീറ്റര്‍ ഉപയോഗിച്ചു നടത്തിയ പ്രാഥമിക പരിശോധനയില്‍ അഞ്ചു വയസില്‍ താഴെ പ്രായമുള്ള 21 കുട്ടികള്‍, 16 ഇതര സംസ്ഥാനത്തൊഴിലാളികള്‍ ഉള്‍പ്പെടെയുള്ളവരെ പരിശോധിച്ചു. ആര്‍ക്കും രോഗലക്ഷണങ്ങള്‍ പ്രകടമല്ല.
(പി.ആര്‍.കെ. നമ്പര്‍. 1156/2020)
- Log in to post comments