റവന്യു ദൗത്യസംഘം ഒഴിപ്പിക്കൽ തുടരുന്നു

ഇടുക്കി ജില്ലയിലെ അനധികൃത കയ്യേറ്റങ്ങൾ ഒഴിപ്പിക്കുന്നതിന് സർക്കാർ നിയോഗിച്ചിട്ടുള്ള റവന്യു സംഘം ദൗത്യം തുടരുന്നു. ഇന്ന് (ഒക്ടോ 28 ) പള്ളിവാസൽ, ചിന്നക്കനാൽ വില്ലേജുകളിൽ നിന്നുള്ള കയ്യേറ്റങ്ങളാണ് ഒഴിപ്പിച്ചത് . പള്ളിവാസൽ വില്ലേജിൽ ബ്ലോക്ക് 14 - ൽ സർവ്വേ 36/3 - ലെ 30.95 ആർ സ്ഥലത്തെ അനധികൃത കൈയ്യേറ്റവും ഉടുമ്പൻചോല താലൂക്കിൽ ചിന്നക്കനാൽ വില്ലേജിലെ സ്വകാര്യ വ്യക്തി അനധികൃതമായി കൈവശം വച്ചിരുന്ന ചിന്നക്കനാൽ താവളം സർവ്വെ 20/1, 11/1, 48 ൽ പ്പെട്ട 0.89.07 ഹെക്ടർ [1.76 ഏക്കർ റവന്യൂ പുറമ്പോക്ക് ഭൂമിയും 43.3 സെന്റ് കെ എസ് ഇ ബി സ്ഥലവും ഉൾപ്പടെ 2.20 ഏക്കർ ] റവന്യു ദൗത്യസംഘം ഒഴിപ്പിച്ചു.

നിയമപരമായി യാതൊരു പിൻബലവും ഇല്ലാതിരുന്ന കയ്യേറ്റങ്ങൾ എല്ലാ നടപടിക്രമങ്ങളും പൂർത്തിയാക്കിയാണ് ഒഴിപ്പിച്ചിട്ടുള്ളതെന്ന് ജില്ലാകളക്ടർ ഷീബ ജോർജ്ജ് വ്യക്തമാക്കി . പട്ടയം ലഭിക്കുന്നതിനുള്ള അർഹത പരിശോധിച്ച് നിയമപരമായ നടപടികൾ പാലിച്ച് മാത്രമേ ഒഴിപ്പിക്കൽ നടപടികൾ സ്വീകരിക്കുകയുള്ളൂ.