കെ.എസ്.ഇ.ബി ഉപഭോക്തൃ സേവന വാരാചരണം : സംസ്ഥാനതല ഉദ്ഘാടനം ഇന്ന് കൊല്ലങ്കോട്; മന്ത്രി കെ. കൃഷ്ണന്‍കുട്ടി ഉദ്ഘാടനം ചെയ്യും
ഉപഭോക്തൃ സൗഹൃദ പരിപാടികളുടെ ഭാഗമായി ഒക്ടോബര്‍ രണ്ടു മുതല്‍ എട്ടു വരെ കെ.എസ്.ഇ.ബി സംഘടിപ്പിക്കുന്ന ഉപഭോക്തൃ സേവന വാരാചരണത്തിന്റെ സംസ്ഥാനതല ഉദ്ഘാടനം ഇന്ന് (ഒക്ടോബര്‍ രണ്ട്) രാവിലെ 10ന് കൊല്ലങ്കോട് വാസുദേവന്‍ മെമ്മോറിയല്‍ ഹാളില്‍ സംസ്ഥാന വൈദ്യുത വകുപ്പ് മന്ത്രി കെ. കൃഷ്ണന്‍ കുട്ടി നിര്‍വഹിക്കും. കെ.ബാബു എം.എല്‍.എ അധ്യക്ഷനാവും. കെ. രാധാകൃഷ്ണന്‍ എം.പി മുഖ്യാതിഥിയാവും. കെ.എസ്.ഇ.ബി സ്വതന്ത്ര്യ ഡയറക്ടര്‍ അഡ്വ. വി മുരുഗദാസ്, ചിറ്റൂര്‍ തത്തമംഗലം നഗരസഭാ ചെയര്‍പേഴ്‌സണ്‍ കെ.എല്‍ കവിത, ബ്ലോക്ക് പഞ്ചായത്ത് പ്രസിഡന്റുമാരായ ആര്‍. ചിന്നക്കുട്ടന്‍ (കൊല്ലങ്കോട്), സി. നീലാമണി (നെന്മാറ), എ സുജാത (ചിറ്റൂര്‍), കൊല്ലങ്കോട് ഗ്രാമപഞ്ചായത്ത് പ്രസിഡന്റ് കെ. സത്യപാല്‍, ജില്ലാ പഞ്ചായത്ത് അംഗം ശാലിനി കറുപ്പേഷ്, കൊല്ലങ്കോട് ബ്ലോക്ക് പഞ്ചായത്ത് അംഗം സത്യഭാമ ചന്ദ്രന്‍, കൊല്ലങ്കോട് ഗ്രാമപഞ്ചായത്ത് അംഗം പി.കെ ജയന്‍ തുടങ്ങിയവര്‍ സംബന്ധിക്കും. കെ.എസ്.ഇ.ബി ചെയര്‍മാന്‍ ബിജു പ്രഭാകര്‍ സ്വാഗതവും ഡെപ്യൂട്ടി ചീഫ് എഞ്ചിനീയര്‍ ടി.സി ഗിരിജ നന്ദിയും പറയും.
ഉപഭോക്താക്കളുമായുള്ള ഹൃദയബന്ധം കൂടുതല്‍ ഊഷ്മളമാക്കുക, ഉപഭോക്താക്കള്‍ക്ക് കൂടുതല്‍ മെച്ചപ്പെട്ട സേവനം സമയബന്ധിതമായി പ്രദാനം ചെയ്യുക തുടങ്ങിയ ലക്ഷ്യങ്ങളോടെയാണ് കെ.എസ്.ഇ.ബി ഉപഭോക്തൃ സൗഹൃദ പരിപാടികള്‍ സംഘടിപ്പിക്കുന്നത്. ഉപഭോക്തൃ സേവന വാരാചരണത്തോടനുബന്ധിച്ച് ഒക്ടോബര്‍ രണ്ടു മുതല്‍ എട്ടു വരെയുള്ള ദിവസങ്ങളില്‍ കെ.എസ്.ഇ.ബി ഓഫീസുകളില്‍ പൊതുജനങ്ങളുടെയും ജനപ്രതിനിധികളുടെയും പങ്കാളിത്തത്തോടെ വിവിധ ഉപഭോക്തൃ സേവന പരിപാടികള്‍ സംഘടിപ്പിക്കും. പൊതുജനങ്ങള്‍ക്ക് പ്രത്യേകം പരിഗണന നല്‍കി അവരുടെ പരാതികളും ആശങ്കകളും സംശയങ്ങളും പരിഹരിച്ചു നല്‍കും. ജനപ്രതിനിധികള്‍, റസിഡന്‍സ് അസോസിയേഷന്‍ പ്രതിനിധികള്‍, മതസാംസ്‌കാരിക സംഘടനാ പ്രതിനിധികള്‍, പൗരപ്രമുഖര്‍ തുടങ്ങിയവരെ പങ്കെടുപ്പിച്ച് ഡിവിഷന്‍ അടിസ്ഥാനത്തില്‍ ഉപഭോക്തൃ സംഗമം, അഭിപ്രായ സര്‍വെ, വൈദ്യുതി സുരക്ഷാ ബോധവത്കരണം തുടങ്ങിയ പരിപാടികളും ഇതോടൊപ്പം നടക്കും.
- Log in to post comments