ഫറോക്ക് താലൂക്ക് ആശുപത്രി: 23.5 കോടിയുടെ പുതിയ കെട്ടിടം ഞായറാഴ്ച മുഖ്യമന്ത്രി ഉദ്ഘാടനം നിർവഹിക്കും

സംസ്ഥാന സർക്കാർ ആരോഗ്യ മേഖലയിൽ നടപ്പിലാക്കി വരുന്ന ബഹുമുഖ വികസന പദ്ധതികളുടെ ഭാഗമായി ഫറോക്ക് താലൂക്ക് ആശുപത്രിയിൽ പുതിയതായി നിർമ്മിച്ച ബഹുനില മന്ദിരം ആഗസ്റ്റ് 31ന് രാവിലെ 10 മണിക്ക് മുഖ്യമന്ത്രി പിണറായി വിജയൻ നാടിന് സമർപ്പിക്കും. ആരോഗ്യ വകുപ്പ് മന്ത്രി വീണാ ജോർജ് അധ്യക്ഷത വഹിക്കും. പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് സ്വാഗതം ആശംസിക്കും. എം.കെ. രാഘവൻ എംപി മുഖ്യാതിഥിയാകും. മറ്റ് ജനപ്രതിനിധികൾ, ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുക്കും.

സംസ്ഥാന ആരോഗ്യ മേഖലയിൽ നടന്നു വരുന്ന വലിയ വികസന പ്രവർത്തനങ്ങളുടെ തുടർച്ചയാണ് ഫറോക്ക് താലൂക്ക് ആശുപത്രിയുടെ പുതിയ കെട്ടിടമെന്ന് മന്ത്രി വീണാ ജോർജ് പറഞ്ഞു. കിഫ്ബി വഴി 23.5 കോടി രൂപ ചെലവഴിച്ചാണ് 47,806 ചതുരശ്ര അടി വിസ്തൃതിയിൽ അത്യാധുനിക സൗകര്യങ്ങളോടെ കെട്ടിട നിർമ്മാണം പൂർത്തിയാക്കിയിരിക്കുന്നത്. വിവിധ സ്പെഷ്യാലിറ്റികൾ, ഓപ്പറേഷൻ തിയേറ്ററുകൾ, ലാബുകൾ തുടങ്ങിയ അതിനൂതനമായ സൗകര്യങ്ങളോടെ രോഗി പരിചരണം ഉറപ്പാക്കുന്ന ആശുപത്രിയിൽ ഒരേസമയം 103 രോഗികളെ കിടത്തി ചികിത്സിക്കാൻ കഴിയും. ഓക്സിജൻ പ്ലാന്റ്, ട്രോമാ കെയർ യൂണിറ്റ്, അത്യാഹിത വിഭാഗം, ഓപ്പറേഷൻ തിയേറ്ററുകൾ തുടങ്ങിയവ പുതിയ ആശുപത്രിയുടെ ഭാഗമായി വരുന്നുണ്ട്. പുതിയ സംവിധാനങ്ങൾ ജനങ്ങൾക്ക് ഏറെ സഹായകരമാകുമെന്നും മന്ത്രി വ്യക്തമാക്കി.

താഴത്തെ നിലയിൽ ജനറേറ്റർ റൂം, എയിഡ് പോസ്റ്റ്, ട്രയേജ്, വിവിധ ഒപികൾ, ഇഞ്ചക്ഷൻ, നെബുലൈസേഷൻ റൂം, മൈനർ ഒടി, എക്സ്റേ, ഫാർമസി സ്റ്റോർ, ഒപ്ടിയോമെട്രി റൂം, നഴ്സിംഗ് സ്റ്റേഷൻ, കാരുണ്യ ഇൻഷുറൻസ് കൗണ്ടർ എന്നിവയും ഒന്നാം നിലയിൽ ആധുനിക ലബോറട്ടറി, അൾട്രാ സൗണ്ട് സ്‌കാനിംഗ്, സെൻട്രൽ ലബോറട്ടറികളായ മൈക്രോബയോളജി, ബയോകെമിസ്ട്രി, ഹെമറ്റോളജി, ബ്ലഡ് സ്റ്റോറേജ്, വിവിധ ഒപികൾ എന്നിവയും രണ്ടാമത്തെ നിലയിൽ 45 കിടക്കകളുള്ള പുരുഷന്മാരുടെ വാർഡ്, നഴ്സിംഗ് സ്റ്റേഷൻ, സ്റ്റോർ റൂം, മൂന്നാമത്തെ നിലയിൽ 45 കിടക്കകളുള്ള സ്ത്രീകളുടെ വാർഡ്, സ്റ്റോർ റൂം, എന്നിവയും ഏറ്റവും മുകളിലെ നിലയിൽ ഒഎച്ച് ഫയർ ടാങ്ക്, ഫ്ളഷ് ടാങ്ക്, ഡൊമസ്റ്റിക് ടാങ്ക്, സോളാർ പ്ലാന്റ് എന്നിവയുണ്ട്.

പി.എൻ.എക്സ് 4290/2025