ടി.കെ സുധീഷ് ജില്ലാ പഞ്ചായത്ത് വൈസ് പ്രസിഡന്റായി സത്യപ്രതിജ്ഞ ചെയ്തു

തൃശ്ശൂര്‍ ജില്ലാ പഞ്ചായത്ത് വൈസ് പ്രസിഡന്റായി ടി.കെ സുധീഷ് തിരഞ്ഞെടുക്കപ്പെട്ടു. ജില്ലാ പഞ്ചായത്ത് കോണ്‍ഫറന്‍സ് ഹാളില്‍ നടന്ന തിരഞ്ഞെടുപ്പില്‍ ആകെ പോള്‍ ചെയ്ത 30 വോട്ടുകളില്‍ 21 വോട്ടുകളും നേടിയാണ് ടി.കെ സുധീഷ് വൈസ് പ്രസിഡന്റ് സ്ഥാനത്തെത്തിയത്. ഫലപ്രഖ്യാപനത്തിന് ശേഷം ജില്ലാ പഞ്ചായത്ത് പ്രസിഡന്റ് മേരി തോമസ് വൈസ് പ്രസിഡന്റിന് സത്യവാചകം ചൊല്ലിക്കൊടുത്തു. വരണാധികാരിയായ ജില്ലാ കളക്ടര്‍ അര്‍ജുന്‍ പാണ്ഡ്യന്‍ തിരഞ്ഞെടുപ്പ് നടപടിക്രമങ്ങള്‍ക്ക് നേതൃത്വം നല്‍കി.

കാട്ടൂര്‍ ഡിവിഷനില്‍ നിന്ന് എല്‍.ഡി.എഫ് സ്ഥാനാര്‍ത്ഥിയായാണ് ജില്ലാ പഞ്ചായത്തിലേക്ക് ടി.കെ സുധീഷ് തിരഞ്ഞെടുക്കപ്പെട്ടത്. വൈസ് പ്രസിഡന്റ് സ്ഥാനത്തേക്ക് മത്സരിച്ച വടക്കേക്കാട് ഡിവിഷനില്‍ നിന്നുള്ള ഷംസീറ അഷ്‌റഫിന് (യു.ഡി.എഫ്) 9 വോട്ടുകള്‍ ലഭിച്ചു.

ഉച്ചക്ക് 2.30 ന് തിരഞ്ഞെടുപ്പ് നടപടിക്രമങ്ങള്‍ ആരംഭിച്ചു. ഡെപ്യൂട്ടി കളക്ടര്‍ കെ. കൃഷ്ണകുമാര്‍ തിരഞ്ഞെടുപ്പ് നടപടിക്രമങ്ങള്‍ വിശദീകരിച്ചു. കൊടകര ഡിവിഷനില്‍ നിന്നുള്ള കെ.ജെ ഡിക്‌സണ്‍ വൈസ് പ്രസിഡന്റ് സ്ഥാനത്തേക്ക് ടി.കെ സുധീഷിനെ നിര്‍ദ്ദേശിക്കുകയും താന്ന്യം ഡിവിഷനിലെ കെ.പി സന്ദീപ് പിന്താങ്ങുകയും ചെയ്തു. വടക്കേക്കാട് ഡിവിഷനില്‍ നിന്ന് തിരഞ്ഞെടുക്കപ്പെട്ട അംഗം ആദ്യ വോട്ട് ചെയ്തു. തുടര്‍ന്ന് തിരഞ്ഞെടുക്കപ്പെട്ട മറ്റ് 29 അംഗങ്ങളും വോട്ട് രേഖപ്പെടുത്തി.

   സത്യപ്രതിജ്ഞ ചടങ്ങില്‍ തൃശ്ശൂര്‍ എം.എല്‍.എ പി. ബാലചന്ദ്രന്‍, മുന്‍ ജില്ലാ പഞ്ചായത്ത് പ്രസിഡന്റ് വി.എസ് പ്രിന്‍സ്, ജില്ലാ പഞ്ചായത്ത് സെക്രട്ടറി ടോബി ജോസ്, ജില്ലാ പഞ്ചായത്ത് അംഗങ്ങള്‍, ജനപ്രതിനിധികള്‍, രാഷ്ട്രീയപാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുത്തു.