പെരിയാർ വാലി ജലസേചന കനാൽ ശുചീകരണം സമയബന്ധിതമായി പൂർത്തിയാക്കണം: ഉപദേശക സമിതി യോഗം

പെരിയാർ വാലി ജലസേചന കനാൽ ശുചീകരണം   സമയബന്ധിതമായി പൂർത്തിയാക്കാനും
വരുന്ന വേനൽക്കാലം കണക്കിലെടുത്ത് കുടിവെള്ള ദൗർലഭ്യം വരാതിരിക്കാനുള്ള നടപടികൾ ഊർജിതമാക്കാനും കനാൽ ഉപദേശക സമിതി യോഗം നിർദ്ദേശിച്ചു.

ജില്ലാകളക്ടറുടെ അധ്യക്ഷതയിൽ എം എൽ എമാരായ അൻവർ സാദത്ത്, ഷിബു തെക്കുംപുറം, വി പി സജീന്ദ്രൻ, മനോജ് മൂത്തേടൻ എന്നിവരുടെ നേതൃത്വത്തിലാണ് യോഗം ചേർന്നത്.

നിർമ്മാണ, അറ്റകുറ്റപ്പണികൾക്കായി  അഞ്ച് കോടി രൂപ വീതം ആകെ പത്ത് കോടി രൂപയുടെ  അധിക പ്രൊപ്പോസൽ സർക്കാരിലേക്ക് അടിയന്തരമായി അയക്കാനും യോഗത്തിൽ തീരുമാനമായി.

 മഴലഭ്യത കുറയുന്നത് കണക്കിലെടുത്ത് കനാൽ തുറക്കുന്നതിൻ്റെ ട്രയൽ റൺ നവംബർ 25ന് നടത്താനും ഡിസംബർ ഒന്നിന് ജലവിതരണം ആരംഭിക്കാനും തീരുമാനിച്ചു.

കളക്‌ടറേറ്റ് കോൺഫറൻസ് ഹാളിൽ ചേർന്ന യോഗത്തിൽ ആലുവ പി വി ഐ പി (ഡിവിഷൻ നം. രണ്ട് ) എക്സിക്യൂട്ടീവ് എഞ്ചിനീയർ സി വി ബൈജു, പെരുമ്പാവൂർ ഡിവിഷൻ എക്സിക്യൂട്ടീവ് എഞ്ചിനീയർ സി എൻ രഞ്ജിത, ജില്ലാ പ്ലാനിങ് ഓഫീസർ ടി ജോതിമോൾ, വകുപ്പ് അസിസ്റ്റൻറ് എക്സിക്യൂട്ടീവ് എൻജിനീയർമാർ, എ ഇ മാർ, ജനപ്രതിനിധികൾ, ഉദ്യോഗസ്ഥർ 
തുടങ്ങിയവർ പങ്കെടുത്തു.