ഹൈടെക് സ്‌കൂൾ പദ്ധതിയിലെ ഉപകരണങ്ങൾക്ക് ഇൻഷുറൻസ് പരിരക്ഷ 

ഹൈടെക് സ്‌കൂൾ പദ്ധതിയുടെ ഭാഗമായി കേരള ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ (കൈറ്റ്) സംസ്ഥാനത്ത് വിന്യസിച്ച 3,07,634 ഉപകരണങ്ങൾക്കും ഇൻഷുറൻസ് പരിരക്ഷ ഏർപ്പെടുത്തി. 59772 ലാപ്‌ടോപ്പ്, 43422പ്രൊജക്ടർ, 4714 ഡി.എസ്.എൽ.ആർ ക്യാമറ, 4545എൽ.ഇ.ഡി. ടി.വി., 4720വെബ്ക്യാം, 23104പ്രൊജക്ഷൻ സ്‌ക്രീൻ, 41878 എച്ച്.ഡി.എം.ഐ കേബിൾ, 40614 ഫേസ് പ്ലേറ്റ്, 41789 സീലിംഗ് മൗണ്ട് കിറ്റ്, 42739 യു.എസ്.ബി സ്പീക്കർ, 337 ഡെസ്‌ക് ടോപ്പ് എന്നിവയ്ക്കാണ് ഇൻഷുറൻസ് പരിരക്ഷ ലഭിക്കുക.  342.8 കോടി രൂപ മൂല്യമുള്ള ഉപകരണങ്ങൾക്കാണ് പൊതുമേഖലാ കമ്പനിയായ യുണൈറ്റഡ് ഇന്ത്യാ ഇൻഷുറൻസ് കോർപ്പറേഷനുമായി ചേർന്ന് ഇൻഷുറൻസ് പരിരക്ഷ  കൈറ്റ് ഏർപ്പെടുത്തിയത്.  

 മോഷണം, തീപിടുത്തം, പ്രകൃതിക്ഷോഭം എന്നിവമൂലം ഉപകരണങ്ങൾക്ക് കേട് സംഭവിച്ചാൽ ഇൻഷുറൻസ് പരിരക്ഷ ലഭിക്കും.  ഉപകരണങ്ങൾ നശിച്ചാൽ സർക്കുലറിൽ നിർദ്ദേശിച്ചിട്ടുള്ള നമ്പരുകളിൽ ഉടൻ വിവരമറിയിക്കണം.  കവർച്ച, മോഷണം തുടങ്ങിയവമൂലം നഷ്ടം സംഭവിച്ചാൽ പോലീസ് സ്റ്റേഷനിൽ നിന്നുള്ള എഫ്.ഐ.ആർ. സഹിതമാണ് അപേക്ഷ നൽകേണ്ടത്. ഉപകരണങ്ങൾ സ്‌കൂൾ കാമ്പസിനുള്ളിലായിരിക്കുമ്പോൾ സംഭവിക്കുന്ന കേടുപാടുകൾക്ക് മാത്രമാണ് ഇൻഷുറൻസ് പരിരക്ഷ. ലാപ്‌ടോപ്പ് പോലെയുള്ള ഉപകരണങ്ങൾ നിലവിലെ നിർദ്ദേശങ്ങൾ അനുസരിച്ച് സ്‌കൂൾ അധികൃതരുടെ അനുവാദത്തോടെ ക്യാമ്പസിനു പുറത്തേക്ക് കൊണ്ടുപോകുമ്പോൾ പ്രത്യേകം ശ്രദ്ധിക്കണം. സർക്കുലർwww.kite.kerala.gov.in ൽ ലഭ്യമാണ്.

പി.എൻ.എക്സ്. 789/19