കാസര്‍കോട് ജില്ലയില്‍ ആദ്യ ദിനം  ആരും പത്രിക നല്‍കിയില്ല

ലോക്‌സഭാ തെരഞ്ഞെടുപ്പില്‍ നാമനിര്‍ദേശ പത്രിക സമര്‍പ്പിക്കാനുള്ള ആദ്യ ദിനമായ ഇന്നലെ (മാര്‍ച്ച് 28) കാസര്‍ഗോഡ് ലോക്‌സഭാ മണ്ഡലത്തില്‍ ആരും പത്രിക നല്‍കിയില്ല.

 പത്രിക നല്‍കുമ്പോള്‍ ശ്രദ്ധിക്കേണ്ട കാര്യങ്ങള്‍:

ലോക്‌സഭ  തെരഞ്ഞെടുപ്പില്‍  മത്സരിക്കുന്ന സ്ഥാനാര്‍ത്ഥികള്‍ 25,000 രൂപ  കെട്ടിവയ്ക്കണം. 1951 ലെ  ജനപ്രാതിനിധ്യ നിയമം സെക്ഷന്‍ 34 പ്രകാരമാണിത്. പട്ടികജാതി-പട്ടികവര്‍ഗ വിഭാഗത്തില്‍പ്പെടുന്ന സ്ഥാനാര്‍ത്ഥികള്‍ 12,500 രൂപയാണ് കെട്ടിവയ്‌ക്കേണ്ടത്. ഈ തുക '8443 -സിവില്‍ ഡിപ്പോസിറ്റ്‌സ്-121-ഡിപ്പോസിറ്റ്‌സ് ഇന്‍ കണക്ഷന്‍ വിത്ത് ഇലക്ഷന്‍സ്-2-ഡിപ്പോസിറ്റ്‌സ് മെയ്ഡ് ബൈ കാന്‍ഡിഡേറ്റ്‌സ് ഫോര്‍ പാര്‍ലമെന്റ്'എന്ന ശീര്‍ഷകത്തില്‍ ഒടുക്കി ഒറിജിനല്‍ ചലാന്‍  നാമനിര്‍ദേശ പത്രിക സമര്‍പ്പിക്കുന്ന സമയത്ത്  നല്‍കണം.. നാമനിര്‍ദേശ പത്രികയോടൊപ്പം സമര്‍പ്പിക്കുന്ന ഫോറം 26 ലുളള സത്യവാങ്മൂലം 50 രൂപയുടെ സ്റ്റാമ്പ് പേപ്പറില്‍ തയ്യാറാക്കി നല്‍കണം. ഈ സത്യപ്രസ്താവന  ഒരു സത്യപ്രതിജ്ഞാ കമ്മീഷണറുടെയോ, ഒന്നാം ക്ലാസ്സ് മജിസ്‌ട്രേട്ടിന്റേയോ, നോട്ടറി പബ്ലിക്കിന്റേയോ  മുമ്പാകെ ചെയ്തിരിക്കണം. 
    നാമനിര്‍ദ്ദേശ പത്രികയില്‍ പതിച്ചിരിക്കുന്ന ഫോട്ടോയ്ക്ക് പുറമേ ബാലറ്റ് പേപ്പറില്‍ അച്ചടിക്കുന്നതിനായി അതേതരത്തിലുളള മറ്റൊരു ഫോട്ടോ കൂടി സ്ഥാനാര്‍ത്ഥി കൊണ്ടുവരണം. ഈ ഫോട്ടോ  വെളുത്ത/ ഇളം നിറമുളള പശ്ചാത്തലത്തില്‍ മുഖം പൂര്‍ണ്ണമായി കാണാവുന്ന 2 സെ.മി x 2.5 സെ.മി വലിപ്പത്തില്‍ സമീപകാലത്ത് എടുത്തതായിരിക്കണം. സ്ഥാനാര്‍ത്ഥികള്‍ തെരഞ്ഞെടുപ്പിന് വേണ്ടി മാത്രം ഒരു ബാങ്ക് അക്കൗണ്ട് തുറക്കണം. ബാങ്ക് പാസ് ബുക്കിന്റെ മുന്‍ പേജും, അവസാനമായി നടന്ന ഇടപാട് കാണിക്കുന്ന പേജിന്റെയും പകര്‍പ്പ് കൊണ്ടുവരണം.