വൈഗ 2020 നു ഇന്ന് (ജനു. 4) തൃശൂരിൽ തുടക്കം

കാർഷികോൽപ്പന്ന സംസ്‌കരണവും, മൂല്യവർധനവും ലക്ഷ്യമാക്കി നടത്തുന്ന വൈഗ 2020 നു ഇന്ന് (ജനു. 4) തൃശൂരിൽ തുടക്കം. ജനുവരി 7 വരെ തേക്കിൻകാട് മൈതാനിയിൽ നടക്കുന്ന വൈഗയുടെ ഉദ്ഘാടനം ഇന്ന് രാവിലെ 10 ന് കേരള ഗവർണർ ആരിഫ് മുഹമ്മദ് ഖാൻ നിർവഹിക്കും. കൃഷി വകുപ്പ് മന്ത്രി അഡ്വ വി എസ് സുനിൽകുമാർ അധ്യക്ഷത വഹിക്കും. വൈകീട്ട് 5.30ന് കൃഷി വകുപ്പിന്റെ 'ജീവനി'പദ്ധതിയുടെ ഉദ്ഘാടനം മുഖ്യമന്ത്രി പിണറായി വിജയൻ നിർവഹിക്കും. കാർഷിക മേഖലയിലെ നൂതന ആശയങ്ങൾ പങ്കുവെക്കുന്നതിനും കാർഷികോൽപ്പന്നങ്ങളുടെ സംസ്‌കരണം, മൂല്യവർധനവ് എന്നിവയുടെ സാധ്യത മനസ്സിലാക്കുന്നതിനും കേരളത്തിലെ കർഷകരെയും സംരഭകരെയും ശാസ്ത്രജ്ഞരെയും പൊതു സമൂഹത്തെയും ഒത്തൊരുമിപ്പിച്ചു നടത്തുന്ന വൈഗയുടെ നാലാം പതിപ്പാണിത്. വിവിധ വിഷയങ്ങളെ അടിസ്ഥാനമാക്കി 2 വേദികളിലായി നിരവധി വിഷയങ്ങളിൽ സെമിനാറുകളും വർക്ക്‌ഷോപ്പുകളും ഇതിന്റെ ഭാഗമായി സംഘടിപ്പിക്കുന്നു. കാർഷിക മേഖലയിലെ നൂതന സാങ്കേതിക വിദ്യകൾ പരിചയപ്പെടുത്തുന്ന 350 അധികം പ്രദർശന സ്റ്റാളുകളും ഒരുക്കിയിരിക്കുന്നു.
ഉദ്ഘാടന ചടങ്ങിൽ വിദ്യാഭ്യാസ വകുപ്പ് മന്ത്രി പ്രൊഫ സി രവീന്ദ്രനാഥ്, തദ്ദേശ സ്വയം ഭരണ വകുപ്പ് മന്ത്രി എ സി മൊയ്തീൻ, ഗവ ചീഫ് വിപ് കെ രാജൻ, മേയർ അജിത വിജയൻ, ടി എൻ പ്രതാപൻ എം പി, ജില്ലാ പഞ്ചായത്ത് പ്രസിഡന്റ് മേരി തോമസ്, നബാർഡ് ചീഫ് ജനറൽ മാനേജർ ആർ ശ്രീനിവാസ്, കേന്ദ്ര സുഗന്ധവിള ഗവേഷണ കേന്ദ്രം ഡയറക്ടർ ഡോ കെ നിർമൽ ബാബു, കാർഷികോൽപ്പന്ന കമ്മീഷണർ ദേവേന്ദ്ര കുമാർ സിംഗ്, സ്പെഷ്യൽ സെക്രട്ടറി ആൻഡ് കൃഷി ഡയറക്ടർ ഡോ രത്തൻ ഖേൽക്കർ തുടങ്ങിയവർ പങ്കെടുക്കും.
ഇന്ന് (ജനുവരി നാലിന്) വേദി ഒന്നിൽ വാഴപ്പഴത്തിന്റെ ഉൽപാദനവും കയറ്റുമതിയും - സാധ്യതകൾ, എന്ന വിഷയത്തിലും വേദി രണ്ടിൽ സുസ്ഥിര കൃഷിയും മൂല്യ വർധനവും, സംസ്‌കരണം, കയറ്റുമതി, വിപണന ശൃംഖല - നയപരമായ ഇടപെടലുകൾ എന്നീ വിഷയങ്ങളിലും സെമിനാറുകൾ നടക്കും. 5 ന് വേദി ഒന്നിൽ ചെറുധാന്യങ്ങൾ പോഷകാഹാരത്തിനും വരുമാനത്തിനും, ഫ്‌ളോറികൾച്ചർ ആൻഡ് ലാൻഡ് സ്‌കേപ്പിംഗ് - വാണിജ്യപരമായ സാധ്യതകൾ, വേദി രണ്ടിൽ ചക്കയുടെ മൂല്യവർധനവ്, മൂല്യവർധനവ് തേനിൽ, നാളികേരത്തിന്റെ മൂല്യവർധനവ്, ഗതാഗതം, പാക്കേജിങ്, ലൈസൻസിങ് - സാങ്കേതിക സഹായവും സേവനങ്ങളും എന്നീ വിഷയങ്ങളിൽ സെമിനാറുകൾ നടക്കും. 6 ന് വേദി ഒന്നിൽ സ്റ്റാർട്ടപ് ഇക്കോ സിസ്റ്റം - നാഷണൽ ആൻഡ് സ്റ്റേറ്റ് ലെവൽ, കാർഷിക മേഖലയിൽ യുവാക്കൾക്കായി നൂതന പദ്ധതികൾ, സ്റ്റാർട്ടപ് - അനുഭവം പങ്കിടൽ വേദി രണ്ടിൽ പൈൻ ആപ്പിൾ - മൂല്യ വർദ്ധനവ്, കാർഷികോൽപ്പന്നങ്ങളുടെ ഭൗമ സൂചിക പദവി - ചങ്ങാലിക്കോടൻ വാഴപ്പഴം, മറയൂർ ശർക്കര, കാപ്പിയുടെ മൂല്യ വർധനവ്, മൂല്യ വർധനവ് സുഗന്ധ വിളകളിൽ - കുരുമുളക്, ഏലം എന്നീ സെമിനാറുകളും നടക്കും. 7 ന് വേദി ഒന്നിൽ ആരോഗ്യകേരളം - പച്ചക്കറി ഉൽപ്പാദനത്തിൽ കേരളം സ്വയം പര്യാപ്തതയിലേക്ക്, വേദി രണ്ടിൽ കേരളത്തിലെ ഫാർമർ പ്രൊഡ്യൂസർ കമ്പനികളുടെ വികസനവും സുസ്ഥിരതയും, സുസ്ഥിര വരുമാനത്തിന് ഇളനീർ - സാധ്യതകൾ എന്നീ വിഷയങ്ങളിൽ ഓപ്പൺ ഫോറം ചർച്ചയും നടക്കും. വിവിധ ദിവസങ്ങളിലായി കേന്ദ്ര കൃഷി മന്ത്രി പുരുഷോത്തം രൂപാല, തെലുങ്കാന കൃഷി വകുപ്പ് മന്ത്രി സിംഗ റെഢ്ഢി നിരഞ്ജൻ റെഢ്ഢി, പ്രതിപക്ഷ നേതാവ് രമേശ് ചെന്നിതല, മറ്റ് കേന്ദ്ര മന്ത്രിമാർ, അന്യ സംസ്ഥാന കൃഷി വകുപ്പ് മന്ത്രിമാർ, ജനപ്രതിനിധികൾ എന്നിവർ വൈഗ 2020ന്റെ ഭാഗമാകും.