മലപ്പുറം ബ്ലോക്ക് പഞ്ചായത്ത്:  ലൈഫ് ഗുണഭോക്താക്കളുടെ കുടുംബ സംഗമവും  അദാലത്തും സംഘടിപ്പിച്ചു

ലൈഫ് ഭവന പദ്ധതിയില്‍ വീടു നിര്‍മ്മാണം പൂര്‍ത്തിയായ മലപ്പുറം ബ്ലോക്ക് പഞ്ചായത്ത് പരിധിയിലെ ഗുണഭോക്താക്കളുടെ കുടുംബ സംഗമം മലപ്പുറം കോട്ടക്കുന്ന് ഡി.ടി.പി.സി ഓഡിറ്റോറിയത്തില്‍ നടന്നു. 302 കുടുംബങ്ങളാണ് സംഗമത്തില്‍ പങ്കെടുത്തത്. കുടുംബ സംഗമവും അദാലത്തും പി. ഉബൈദുള്ള എം.എല്‍.എ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്റ് കെ.സലീന അധ്യക്ഷത വഹിച്ചു. ജില്ലാ വനിതാക്ഷേമ ഓഫീസര്‍ രജനി പുല്ലാനിക്കാട് പദ്ധതി വിശദീകരിച്ചു. ബ്ലോക്ക് പഞ്ചായത്ത് സെക്രട്ടറി ടി.നിര്‍മ്മല, ജില്ലാ പഞ്ചായത്ത് വൈസ് പ്രസിഡന്റ് സക്കീന പുല്‍പ്പാടന്‍, ബ്ലോക്ക് പഞ്ചായത്ത് വൈസ് പ്രസിഡന്റ് വി.എ. റഹ്മാന്‍, ജോയിന്റ് ബി.ഡി.ഒ. ആര്‍.എച്ച്.കെ.ഹരിരാജന്‍, ജില്ലാ പഞ്ചായത്ത് അംഗങ്ങള്‍, ഗ്രാമപഞ്ചായത്ത് പ്രസിഡന്റുമാര്‍, വിവിധ സര്‍ക്കാര്‍ വകുപ്പ് ഉദ്യോഗസ്ഥര്‍, രാഷ്ട്രീയ പാര്‍ട്ടി നേതാക്കള്‍ തുടങ്ങിയവര്‍ പങ്കെടുത്തു.
മലപ്പുറം ബ്ലോക്ക് പഞ്ചായത്തില്‍ 334 വീടുകളാണ് ലൈഫ് ഭവന പദ്ധതിയിലൂടെ നിര്‍മ്മിച്ചത്. അതില്‍ 302 വീടുകളുടെ പണി പൂര്‍ത്തിയായി. പദ്ധതിയുടെ ആദ്യഘട്ടത്തില്‍ 10 വീടുകളും രണ്‍ാം ഘട്ടത്തില്‍ 173 വീടുകളുമാണ് ബ്ലോക്ക് പഞ്ചായത്ത് പരിധിയില്‍ നിര്‍മ്മാണം പൂര്‍ത്തിയാക്കിയത്. പി.എം.എ. വൈ പദ്ധതിയില്‍ 119 വീടുകളും നിര്‍മ്മിച്ചു.  സംഗമത്തോടനുബന്ധിച്ച് സംഘടിപ്പിച്ച അദാലത്തില്‍ ലൈഫ് പദ്ധതി ഗുണഭോക്താക്കള്‍ക്ക് കേന്ദ്ര -സംസ്ഥാന സര്‍ക്കാരിന്റെ വിവിധ ക്ഷേമപദ്ധതികള്‍ ലഭ്യമാക്കാന്‍ സര്‍ക്കാരിന്റെ 20 വകുപ്പുകളുടെ സേവനങ്ങളും പ്രയോജനമായി.