ആര്‍ദ്രം ജനകീയ ക്യാമ്പയിന്‍ ജില്ലാതല ഉദ്ഘാടനം നാളെ മന്ത്രി കെ.കെ ശൈലജ ടീച്ചര്‍ നിര്‍വഹിക്കും
'നമ്മുടെ ആരോഗ്യം നമ്മുടെ ഉത്തരവാദിത്തം' എന്ന മുദ്രാവാക്യത്തോടെ ഒരു വര്‍ഷം നീളുന്ന ആര്‍ദ്രം ജനകീയ ക്യാമ്പയിനിങിന്റെ ജില്ലാതല ഉദ്ഘാടനവും ആശ സമ്പൂര്‍ണ കമ്പ്യൂട്ടര്‍ സാക്ഷരത പ്രഖ്യാനവും നാളെ (ജനുവരി 11) ഉച്ചക്ക് 3.30ന് ആരോഗ്യവകുപ്പ് മന്ത്രി കെ.കെ ശൈലജ ടീച്ചര്‍ നിര്‍വഹിക്കും. മലപ്പുറം ടൗണ്‍ഹാളില്‍ നടക്കുന്ന ചടങ്ങില്‍ പി.ഉബൈദുളള എം.എല്‍.എ അധ്യക്ഷനാകും. പി.കെ കുഞ്ഞാലിക്കുട്ടി എം.പി വിശിഷ്ടാതിഥിയാകും. പരിപാടില്‍ സത്ജീവനം പാക്കേജിന്റെയും ആശമാര്‍ക്ക് നടപ്പാക്കിയ പ്രതിരോധ പരിശീലന പരിപാടിയായ ജ്വാലയുടെയും പാലിയേറ്റീന് നേഴ്‌സ് സമ്പൂര്‍ണ്ണ കമ്പൂട്ടര്‍ സാക്ഷരതയുടേയും പ്രഖ്യാപനവും നടക്കും
ആരോഗ്യകരമായ ജീവിതശൈലി രൂപീകരിക്കുന്നതിനുളള സന്ദേശങ്ങള്‍ ജനങ്ങളിലേക്കെത്തിക്കുവാനും ജനങ്ങളുടെ ജീവിത ശൈലി മാറ്റിയെടുക്കാനുമായാണ് ആര്‍ദ്രം ജനകീയ ക്യാമ്പയിന്‍ സംഘടിപ്പിക്കുന്നത്. ആരോഗ്യകരമായ ഭക്ഷണശീലങ്ങള്‍, യോഗാഭ്യാസമടക്കമുള്ള വിവിധ വ്യായാമമുറകള്‍, പുകയില ഉല്‍പ്പന്നങ്ങള്‍, മദ്യം, മയക്കുമരുന്ന് എന്നിവയില്‍ നിന്നുമുള്ള വിമുക്തി, ശുചിത്വശീലങ്ങളും മാലിന്യനിര്‍മ്മാര്‍ജ്ജനവും എന്നിവയാണ് ആര്‍ദ്രം ജനകീയ ക്യാമ്പയിനിങിന്റെ മറ്റ് ലക്ഷ്യങ്ങള്‍.
ആശമാര്‍ കമ്പ്യൂട്ടര്‍ സാക്ഷരത നേടുന്ന ഇന്ത്യയിലെ ആദ്യ ജില്ല എന്ന നേട്ടം കൈവരിക്കുകയാണ് മലപ്പുറം ജില്ല. അക്ഷയ ജില്ലാ പ്രൊജക്ട് ഓഫീസുമായി സഹകരിച്ച് ദേശീയ ആരോഗ്യദൗത്യം മലപ്പുറമാണ് പദ്ധതി ആരംഭിച്ചത്. ജില്ലയിലെ 106 തദ്ദേശ സ്വയം ഭരണ സ്ഥാപനങ്ങളിലെ 3225 ആശമാരാണ് കമ്പ്യൂട്ടര്‍ സാക്ഷരത നേടിയത്. ആശമാര്‍ കമ്പ്യൂട്ടര്‍ സാക്ഷരത നേടിയതിലൂടെ ഇ-ഹെല്‍ത്ത് പദ്ധതി നടപ്പിലാക്കുന്നതിനും ഡിജിറ്റലൈസ് ചെയ്യുന്ന റിപ്പോര്‍ട്ട് സംവിധാനത്തെ സഹായിക്കുന്നതിനും മുതല്‍ക്കൂട്ടാകും.
- Log in to post comments