കരുനാഗപ്പള്ളി ഗേള്‍സ് ഹൈസ്‌കൂളിലെ ഹൈടെക്ക് കെട്ടിടം ഇന്ന് (മാര്‍ച്ച് 8) മുഖ്യമന്ത്രി നാടിനു സമര്‍പ്പിക്കും
കരുനാഗപ്പള്ളി ഗേള്‍സ് ഹൈസ്‌കൂളിലെ ഹൈടെക്ക് കെട്ടിടം ഇന്ന് (മാര്‍ച്ച് 8) മുഖ്യമന്ത്രി പിണറായി വിജയന്‍ നാടിനു സമര്‍പ്പിക്കും. വൈകുന്നേരം 3.30ന് നടക്കുന്ന ഉദ്ഘാടന ചടങ്ങില്‍ മന്ത്രിമാരായ ജെ മേഴ്‌സിക്കുട്ടിയമ്മ, കെ രാജു, മുന്‍ മന്ത്രി കെ സി വേണുഗോപാല്‍, എം പി മാരായ കെ സോമപ്രസാദ്, എ എം ആരിഫ്, എം എല്‍ എ മാരായ ആര്‍ രാമചന്ദ്രന്‍, എന്‍ വിജയന്‍പിള്ള, കോവൂര്‍ കുഞ്ഞുമോന്‍, ജില്ലാ പഞ്ചായത്ത് പ്രസിഡന്റ് സി രാധാമണി, നഗരസഭാ ചെയര്‍പേഴ്‌സണ്‍ ഇ സീനത്ത് ബഷീര്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുക്കും.
ആറു നിലകള്‍ ഉള്ള കെട്ടിടത്തിന്റെ രണ്ടു നിലകള്‍ പൂര്‍ത്തിയാക്കിയാണ് ഗേള്‍സ് ഹൈസ്‌കൂള്‍ ഉദ്ഘാടനത്തിന് ഒരുങ്ങുന്നത്. വിശാലമായ നടുമുറ്റം, ലൈബ്രറി, കമ്പ്യൂട്ടര്‍, സയന്‍സ്, ഫിസിക്‌സ്, ലാംഗ്വേജ് ലാബുകള്‍, 20 ഹൈടെക് ക്ലാസ് മുറികള്‍, സ്ത്രീസൗഹൃദ ശുചിമുറികള്‍, ഭാവി ആവശ്യങ്ങള്‍ പരിഗണിച്ചുകൊണ്ടുള്ള രണ്ട് ലിഫ്റ്റുകള്‍ തുടങ്ങിയ സൗകര്യങ്ങളാണ് ഇപ്പോള്‍ തയ്യാറായിരിക്കുന്നത്. പരിസ്ഥിതി സൗഹാര്‍ദ്ദ ശൈലിയാണ് കെട്ടിടത്തിന്റെ നിര്‍മാണത്തിന് ഉപയോഗിച്ചിരിക്കുന്നത്. വെള്ളക്കെട്ട് ഒഴിവാക്കാനുള്ള ഓടകളും പൂര്‍ത്തിയായി. ആധുനിക സൗകര്യങ്ങളോടെയുള്ള അടുക്കളയും, ഡൈനിംഗ് ഹാളും നിര്‍മിക്കാന്‍ എം എല്‍ എ ഫണ്ടില്‍ നിന്നും 25 ലക്ഷം രൂപ അനുവദിച്ച് ടെണ്ടര്‍ കഴിഞ്ഞു. അടുത്ത അധ്യയന വര്‍ഷത്തിനകം പണിപൂര്‍ത്തിയാകും.
- Log in to post comments