സ്വാമി വിവേകാനന്ദന്‍ യുവ പ്രതിഭാ പുരസ്‌ക്കാരം; അപേക്ഷിക്കാം

         സംസ്ഥാന യുവജനക്ഷേമ ബോര്‍ഡ് 2019 ലെ സ്വാമി വിവേകാനന്ദന്‍ യുവ പ്രതിഭ  പുരസ്‌കാരത്തിന് അപേക്ഷ ക്ഷണിച്ചു.  വൃക്തിഗത അവാര്‍ഡിനായി 18 നും 40 നും ഇടയില്‍ പ്രായമുള്ള യുവജനങ്ങള്‍ക്കും ട്രാന്‍സ്‌ജെന്‍ഡേഴ്‌സിനും അപേക്ഷിക്കാം.   സാമൂഹ്യ പ്രവര്‍ത്തനം, മാധ്യമ പ്രവര്‍ത്തനം(പ്രിന്റ് മീഡിയ),  മാധ്യമ പ്രവര്‍ത്തനം(ദൃശ്യ മാധ്യമം),  കല,  സാഹിത്യം  ഫൈന്‍ ആര്‍ട്ട്‌സ്, കായികം(വനിത, പുരുഷന്‍) ശാസ്ത്രം, സംരംഭകത്വം, കൃഷി എന്നീ   മേഖലകളില്‍ നിന്നും  ഓരോ വ്യക്തിക്ക് വീതം ആകെ 11 പേര്‍ക്കാണ്  അവാര്‍ഡ് നല്‍കുന്നത്.  അവാര്‍ഡിനായി സ്വയം അപേക്ഷ സമര്‍പ്പിക്കുകയോ, മറ്റൊരു വ്യക്തിയെ നാമനിര്‍ദ്ദേശം ചെയ്യുകയോ ചെയ്യാം.  അവാര്‍ഡിന് അര്‍ഹരാകുന്നവര്‍ക്ക് 50,000 രൂപയും പ്രശസ്തി പത്രവും പുരസ്‌ക്കാരവും നല്‍കും.
സംസ്ഥാന യുവജനക്ഷേമ ബോര്‍ഡില്‍ അഫിലിയേറ്റ് ചെയ്തിട്ടുള്ള യൂത്ത് /യുവ ക്ലബ്ബുകളില്‍ നിന്നും   അവാര്‍ഡിനായി അപേക്ഷ ക്ഷണിച്ചു. ജില്ലാതലത്തില്‍ തിരഞ്ഞെടുക്കുന്ന മികച്ച ക്ലബ്ബിന് 30,000 രൂപയും പ്രശസ്തി പത്രവും പുരസ്‌കാരവും നല്‍കും. ജില്ലാതലത്തില്‍ അവാര്‍ഡിന് അര്‍ഹത നേടിയ ക്ലബ്ബിനെയാണ്  സംസ്ഥാനതല അവാര്‍ഡിനായി   പരിഗണിക്കുന്നത്. സംസ്ഥാന അവാര്‍ഡ് നേടുന്ന ക്ലബ്ബിന്   50,000 രൂപയും പ്രശസ്തി പത്രവും പുരസ്‌ക്കാരവും നല്‍കും.  ഇതിനായുള്ള  അപേക്ഷ മാര്‍ച്ച് 31 നകം  ജില്ലാ യൂത്ത് പ്രോഗ്രാം ഓഫീസര്‍,       ജില്ലാ യുവജനകേന്ദ്രം, ജില്ലാ പഞ്ചായത്ത് ഓഫീസ്, തേവള്ളി, കൊല്ലം വിലാസത്തില്‍  സമര്‍പ്പിക്കണം. അപേക്ഷയും വിശദ വിവരങ്ങളും  www.ksywb.kerala.gov.in എന്ന വെബ്‌സൈറ്റില്‍ ലഭിക്കും. ഫോണ്‍: 0474-2798440.