അത്യാധുനിക സൗകര്യങ്ങളോടെയാണ് പാലക്കാട് മെഡിക്കല്‍ കോളെജ് ഹോസ്റ്റല്‍ കെട്ടിടങ്ങള്‍ നിര്‍മിച്ചിരിക്കുന്നത്. പട്ടികജാതി വികസന ഫണ്ടില്‍ നിന്നും 26 കോടി ചെലവിട്ടാണ് ആണ്‍കുട്ടികള്‍ക്കും പെണ്‍കുട്ടികള്‍ക്കും ഹോസ്റ്റലുകള്‍ നിര്‍മിച്ചത്. 50260 ചതുരശ്ര അടി വിസ്തീര്‍ണ്ണമുള്ള ഒരു ഹോസ്റ്റലില്‍ 11 നിലകളാണുള്ളത്. 120 മുറികള്‍, 20 അതിഥി മുറികള്‍, ഡൈനിങ് ഹാള്‍, അടുക്കള, വാര്‍ഡന്‍ ഓഫീസ് എന്നിവയാണ് ഹോസ്റ്റലില്‍ ഉള്ളത്. ലിഫ്റ്റ് സൗകര്യം, സുരക്ഷാ സജ്ജീകരണങ്ങള്‍ എന്നിവയും ഒരുക്കിയിട്ടുണ്ട്. ഒരു ഹോസ്റ്റലില്‍ 200 പേര്‍ക്ക് താമാക്കിക്കാനുള്ള സൗകര്യമുണ്ട്.

പാലക്കാട് മെഡിക്കല്‍ കോളെജ് അധ്യാപക തസ്തിക ക്യാബിനറ്റ് പരിഗണനയിലാണെന്ന് പിന്നാക്ക ക്ഷേമ നിയമ-സാംസ്കാരിക വകുപ്പ് മന്ത്രി എ.കെ. ബാലന്‍ പറഞ്ഞു. പാലക്കാട് മെഡിക്കല്‍ കോളെജില്‍ പുതുതായി നിര്‍മിച്ച ഹോസ്റ്റല്‍ കെട്ടിടങ്ങള്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.  നിയമന സുതാര്യത ഉറപ്പാക്കി വകുപ്പ് മന്ത്രിയെന്ന നിലയില്‍ ഫയല്‍ ഒപ്പിട്ട് ക്യാബിനറ്റിന്‍റെ അംഗീകാരത്തിന് അയച്ചിട്ടുണ്ട്. അടുത്ത ക്യാബിനറ്റില്‍ അധ്യാപക നിയമനത്തിന് അംഗീകാരം ലഭിക്കും. 

ക്രിസ്തുമസ്-പുതുവസ്തര ആഘോഷങ്ങള്‍ക്ക് മുന്നോടിയായി മലമ്പുഴയുടെ സമഗ്രമായ ശുചീകരണം, ബസ് സ്റ്റാന്‍ഡ് സജ്ജമാക്കുക, റോഡ് അറ്റകുറ്റപണികള്‍ നടത്തുക തുടങ്ങിയ പ്രവര്‍ത്തനങ്ങള്‍ നടപ്പാക്കുന്നതുമായി ബന്ധപ്പെട്ട് മലമ്പുഴ ഇറിഗേഷന്‍ ഡിവിഷന്‍ എക്സിക്യൂട്ടീവ് എഞ്ചിനീയറുടെ ഓഫീസില്‍ അവലോകനയോഗം ചേര്‍ന്നു.സ്ഥലംഎം.എല്‍,എയും ഭരണപരിഷ്കരണ കമ്മീഷന്‍ ചെയര്‍മാനുമായ വി.എസ് അചുതാനന്ദന്‍റെ നിര്‍ദ്ദേശപ്രകാരമാണ് വിഷയങ്ങള്‍ ചര്‍ച്ച ചെയ്തത്. പ്രവര്‍ത്തനങ്ങള്‍ ഡി.ടി.പി.സി ചെയര്‍മാന്‍ കൂടിയായ ജില്ലാ കലക്ടറുടെ അനുമതിയോടെ നടപ്പാക്കാനും യോഗം തീരുമാനിച്ചു.

വടക്കഞ്ചേരി ഗ്രാമ പഞ്ചായത്ത് തെക്കെത്തറ അങ്കണവാടി കെട്ടിടം ഉദ്ഘാടനം ഡിസംബര്‍ 10-ന് ഉച്ചയ്ക്ക് രണ്ടിന്  നിയമ-സാംസ്കാരിക-പട്ടികജാതി-പട്ടികവര്‍ഗ്ഗ വകുപ്പ്  മന്ത്രി എ.കെ ബാലന്‍ നിര്‍വഹിക്കും. ആലത്തൂര്‍ ബ്ലോക്ക് പഞ്ചായത്ത് പ്രസിഡന്‍റ് സി.കെ ചാമുണ്ണി പരിപാടിയില്‍ അധ്യക്ഷനാകും .എം.എല്‍.എയുടെ 15-16 വര്‍ഷത്തെ പ്രാദേശിക ആസ്തി വികസന ഫണ്ടില്‍ നിന്നുളള 10 ലക്ഷം ചിലവഴിച്ചാണ് കെട്ടിടം നിര്‍മിച്ചിരിക്കുന്നത്.

അന്താരാഷ്ട്ര അഴിമതി വിരുദ്ധ ദിനാചരണത്തോടനുബന്ധിച്ച് 'വിശ്വാസ്'ന്‍റെ  നേതൃത്വത്തില്‍ ഇന്ന് (ഡിസംബര്‍ എട്ട് ) ഉദ്യോഗസ്ഥര്‍ക്ക് ബോധവത്ക്കരണ പരിപാടി നടത്തും. വൈകിട്ട് നാലിന് ജില്ലാ കലക്റ്ററേറ്റ് സമ്മേളനഹാളില്‍ നടക്കുന്ന പരിപാടി എം.ബി. രാജേഷ് എം.പി. ഉദ്ഘാടനം ചെയ്യും. ജില്ലാ കലക്റ്റര്‍ ഡോ: പി. സുരേഷ് ബാബു അധ്യക്ഷനാകും. ജസ്റ്റിസ് എം.എന്‍. കൃഷ്ണന്‍ മുഖ്യാതിഥിയാകും. മികച്ച ഡോക്റ്റര്‍ക്കുള്ള സംസ്ഥാന അവാര്‍ഡ് നേടിയ പൊലീസ് സര്‍ജന്‍ ഡോ: പി.ബി. ഗുജ്റാള്‍നെ പരിപാടിയില്‍ ആദരിക്കും. വിജിലന്‍സ് ഉദ്യോഗസ്ഥര്‍, സര്‍വീസ് സംഘടനാ നേതാക്കള്‍, എന്‍.എസ്.എസ്.വൊളന്‍റിയര്‍മാര്‍ പരിപാടിയില്‍ പങ്കെടുക്കും. 

സംഗീത നാടക അക്കാദമിയുടെ ഏഴ് ദിവസം നീണ്ടുനില്‍ക്കുന്ന നവഭവ കഥകളി മഹോത്സവത്തിന് ഇന്ന് ( ഡിസംബര്‍ ഒമ്പത്) തുടക്കമാകും. കാറല്‍മണ്ണ വാഴേങ്കട കുഞ്ചുനായര്‍ സ്മാരക ട്രസ്റ്റില്‍ വൈകിട്ട് അഞ്ചിന് നടക്കുന്ന പരിപാടി സാംസ്കാരിക-പിന്നാക്ക ക്ഷേമ- നിയമ വകുപ്പ് മന്ത്രി എ.കെ. ബാലന്‍ ഉദ്ഘാടനം ചെയ്യും. പുതുതലമുറ കഥകളി കലാകാരന്മാര്‍ക്ക് അവസരമൊരുക്കുകയാണ് പരിപാടിയുടെ ലക്ഷ്യം. കഥകളിയെക്കുറിച്ചുള്ള സംവാദത്തില്‍ പ്രശസ്ത കഥകളി കലാകാരന്മാര്‍ പങ്കെടുക്കും. കഥകളി രംഗത്ത് ദീര്‍ഘകാലം പ്രവര്‍ത്തിച്ച കലാകാരികളെ പരിപാടിയില്‍ ആദരിക്കും. പി.കെ. ശശി എം.എല്‍.എ. പരിപാടിയില്‍ അധ്യക്ഷനാകും.

ഹരിതകേരളം മിഷന്‍ ഒന്നാം വാര്‍ഷികത്തോടനുബന്ധിച്ച് സിവില്‍ സ്റ്റേഷനിലെ ഇ-മാലിന്യങ്ങളുടെ ഒന്നാം ഘട്ട ശേഖരണം ഹരിതകേരളമിഷന്‍റേയും ശുചിത്വമിഷന്‍റേയും നേതൃത്വത്തില്‍ നടന്നു. ഡെപ്യൂട്ടി ഡയറക്ടര്‍ ഓഫ് പഞ്ചായത്ത്, ജില്ല പ്രോസിക്യൂഷന്‍ ഓഫീസ്, ജില്ലാ ഇന്‍ഫര്‍മേഷന്‍ ഓഫീസ് എന്നിവിടങ്ങളില്‍ നിന്നാണ് ആദ്യഘട്ടത്തില്‍ മാലിന്യം ശേഖരിച്ചത്.. സംസ്ഥാന സര്‍ക്കാരിന്‍റെ അധീനതയിലുള്ള ക്ലീന്‍ കേരള കമ്പനിയാണ് ശാസ്ത്രീയ സംസ്കരണത്തിനായി ഇ.മാലിന്യങ്ങള്‍ ശേഖരിക്കുന്നത്.

മാലിന്യ സംസകരണത്തോടൊപ്പം വൈദ്യുതി, ശുദ്ധജലം, ചാരം എന്നിവ ഒരേ സമയം നിര്‍മിക്കുന്ന വിവിധോദ്ദേശ മാലിന്യ സംസ്കരണ സംവിധാനവുമായാണ് മൊയന്‍സ് സ്കൂള്‍ വിദ്യാര്‍ഥിനികള്‍ ഹരിതകേരളം വാര്‍ഷികാഘോഷത്തിന്‍റെ ഭാഗമായി നടന്ന പ്രദര്‍ശനത്തിനെത്തിയത്. മാലിന്യം നിശ്ചിത ഊഷ്മാവില്‍ കത്തിക്കുമ്പോള്‍ ഉണ്ടാകുന്ന നീരാവിയില്‍ നിന്നും ശുദ്ധജലം ഉണ്ടാകുകയും ഈ ജലം പ്രത്യേക  കുഴലുകള്‍ വഴി കടത്തിവിട്ട് വൈദ്യുതി നിര്‍മിക്കുകയും ചെയ്യുന്നതാണ് വിദ്യാര്‍ഥിനികളുടെ കണ്ടെത്തല്‍. മാലിന്യം കത്തുമ്പോള്‍ ഉണ്ടാകുന്ന ചാരം വളമായും ഉപയോഗിക്കാം. വലിയ വ്യവസായ സ്ഥാപനങ്ങള്‍ക്ക് ഉതകുന്ന രീതിയിലുള്ളതാണ് ഈ സംവിധാനം.