ജില്ലാ പഞ്ചായത്തും ആര്‍.എം.എസ്.എയും സംയുക്തമായി ജില്ലയിലെ ഇരുന്നൂറോളം ഹൈസ്‌ക്കൂളുകളില്‍ നടപ്പിലാക്കുന്ന പെണ്‍കുട്ടികള്‍ക്കുള്ള സ്വയംപ്രതിരോധ പരിശീലന പരിപാടിക്ക് മയ്യില്‍ ഐ.എം.എന്‍.എസ് ഗവ. ഹയര്‍ സെക്കന്ററി സ്‌കൂളില്‍ തുടക്കമായി. പദ്ധതിയുടെ ജില്ലാതല ഉദ്ഘാടനം ജില്ലാപഞ്ചായത്ത് പ്രസിഡന്റ് കെ.വി സുമേഷ് നിര്‍വഹിച്ചു. 

'ഭാവിക്ക് അനുയോജ്യമായ പ്രാദേശിക സര്‍ക്കാറുകള്‍: വിഭവവും ശാക്തീകരണവും' എന്ന വിഷയത്തില്‍ നവംബര്‍ 21 മുതല്‍ 24 വരെ യൂറോപ്പിലെ മാള്‍ട്ട റിപ്പബ്ലിക്കിലെ വലേറ്റയില്‍ നടക്കുന്ന രാജ്യാന്തര സമ്മേളനത്തില്‍ കേരളത്തില്‍നിന്ന് കേന്ദ്ര- പഞ്ചായത്തീരാജ് മന്ത്രാലയം വിദഗ്ധ സമിതി അംഗവും ഭൂട്ടാന്‍ സര്‍ക്കാറിന്റെ ഉപദേഷ്ടാവുമായ ഡോ. പി.പി. ബാലന്‍ സംബധ്ധിക്കും. 52 കോമണ്‍വെല്‍ത്ത് രാജ്യങ്ങളില്‍ 48 രാജ്യങ്ങളിലാണ് പ്രാദേശിക സര്‍ക്കാറുകള്‍ ഉള്ളത്. കേരളത്തിലെ കുമളി ഗ്രാമപഞ്ചായത്ത് നടത്തിയ അധിക വിഭവ സമാഹരണ യജ്ഞത്തെക്കുറിച്ചുള്ള പഠനം അവതരിപ്പിക്കുന്നുണ്ട്.

സംസ്ഥാന പുരാരേഖാ വകുപ്പ് പൊതുവിദ്യാഭ്യാസ വകുപ്പുമായി ചേര്‍ന്ന് ഹൈസ്‌കൂള്‍ വിദ്യാര്‍ഥികള്‍ക്കായി സംഘടിപ്പിക്കുന്ന സംസ്ഥാന തല ക്വിസ് മത്സരത്തിന്റെ മേഖലാതല മത്സരം നവംബര്‍ 17ന് കണ്ണൂര്‍ റബ്‌കോ മിനി ഓഡിറ്റോറിയത്തില്‍ നടക്കും. വിജയികള്‍ക്ക് തുറമുഖ, പുരാരേഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി സമ്മാനം വിതരണം ചെയ്യും. കണ്ണൂര്‍ കോര്‍പറേഷന്‍ മേയര്‍ ഇ.പി ലത അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് കെ.വി സുമേഷ് മുഖ്യാതിഥിയായിരിക്കും.
പി എന്‍ സി/4303/2017 
 

തോട്ടടയിലെ ജില്ലാ അഭയ നികേതനില്‍ പുതുതായി നിര്‍മ്മിച്ച രാത്രികാല അഭയസങ്കേതത്തിന്റെ ഉദ്ഘാടനം നവംബര്‍ 17ന് രാവിലെ 10ന് തുറമുഖ, പുരാരേഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി നിര്‍വഹിക്കും. അടുക്കള ബ്ലോക്കിന്റെയും ഭക്ഷണശാലയുടെയും ശിലാസ്ഥാപനവും കണ്ണൂര്‍ കോര്‍പറേഷന്‍ മേയര്‍ ഇ.പി ലത നിര്‍വഹിക്കും. ഹഡ്‌കോയുടെ സാമ്പത്തിക സഹായത്തോടെയാണ് രാത്രികാല അഭയസങ്കേതം നിര്‍മാണം പൂര്‍ത്തിയാക്കിയത്. കണ്ണൂര്‍ കോര്‍പറേഷന്റെ ദേശീയ നഗര ഉപജീവനദൗത്യം പദ്ധതിയിലാണ് അടുക്കള ബ്ലോക്കും ഭക്ഷണശാലയും നിര്‍മിക്കുന്നത്. 
ചടങ്ങില്‍ ജില്ലാ കളക്ടര്‍ മീര്‍ മുഹമ്മദ് അലി അധ്യക്ഷത വഹിക്കും.
പി എന്‍ സി/4303/2017

ഭൂരേഖകളുമായി ബന്ധപ്പെട്ട വിവരങ്ങള്‍ എളുപ്പത്തില്‍ ലഭ്യമാക്കുന്നതിന് അവസരമൊരുക്കുന്നതിന്റെ ഭാഗമായി നടപ്പാക്കുന്ന ഭൂരേഖാ കംപ്യൂട്ടര്‍വല്‍ക്കരണത്തിന്റെ ഭാഗമായി കണ്ണൂര്‍ താലൂക്കിലെ ഭൂമിയുടെ ഉടമസ്ഥത സംബന്ധിച്ച സമഗ്ര വിവരശേഖരണം 18 ന് ആരംഭിക്കും. പള്ളിക്കുന്ന്, എളയാവൂര്‍, മക്രേരി, കണ്ണപുരം എന്നീ വില്ലേജുകളിലാണ് ആദ്യഘട്ടത്തില്‍ വിവരങ്ങള്‍ ശേഖരിക്കുന്നത്. 

പങ്കാളിത്ത പെന്‍ഷന്‍ പദ്ധതിയില്‍ ചേരുന്ന ജീവനക്കാരുടെ രജിസ്‌ട്രേഷന്‍ ഫോമില്‍ പി എഫ് ആര്‍ ഡി എ ചില മാറ്റങ്ങള്‍ വരുത്തുന്നതിനാല്‍ നാളെ(നവംബര്‍ 17) മുതല്‍ ഡിസംബര്‍ 5 വരെ പ്രാണ്‍ രജിസ്‌ട്രേഷന്‍ ഉണ്ടായിരിക്കുന്നതല്ലെന്ന് ജില്ലാ ട്രഷറി ഓഫീസര്‍ അറിയിച്ചു.
പി എന്‍ സി/4303/2017
 

സാമൂഹ്യനീതി വകുപ്പിന്റെയും ജില്ലാ പഞ്ചായത്തിന്റെയും സംയുക്താഭിമുഖ്യത്തിലുളള ലോക ഭിന്നശേഷി ദിനാചരണ പരിപാടികള്‍ ഡിസംബര്‍ 2, 3, 4, തീയതികളില്‍ നടത്തും.  ഡിസംബര്‍ 2 ന് മുനിസിപ്പല്‍ ഹൈസ്‌കൂളില്‍ കലാമത്സരവും 4 ന് പൊലീസ് പരേഡ് ഗ്രൗണ്ടില്‍ കായിക മത്സരവും നടത്തും.  പങ്കെടുക്കുവാന്‍ ആഗ്രഹിക്കുന്ന അംഗപരിമിതര്‍ നവംബര്‍ 25 ന് മുമ്പ് ജില്ലാ സാമൂഹ്യനീതി ഓഫീസില്‍ പേര് രജിസ്റ്റര്‍ ചെയ്യണം.  0497 2712255.
പി എന്‍ സി/4303/2017
 

വീടുകളില്‍ മാതൃകാ ഖര-ദ്രവ മാലിന്യസംസ്‌കരണ സംവിധാനങ്ങള്‍ ഏര്‍പ്പെടുത്തുന്നതിനും ജൈവകൃഷി എന്ന കാഴ്ചപ്പാടോടെ പച്ചക്കറി കൃഷിയെ പ്രോത്സാഹിപ്പിക്കുന്നതിനും പരിസ്ഥിതിയുമായി ഇടങ്ങി ജീവിക്കാന്‍ പ്രേരിപ്പിക്കുന്നതിനുമായി സംസ്ഥാന മലിനീകരണ നിയന്ത്രണ ബോര്‍ഡിന്റെ ഹരിതകേരള പുരസ്‌കാരം-2018 ന് പരിഗണിക്കുന്നതിന് സംസ്ഥാന ജീവനക്കാരില്‍ നിന്ന് അപേക്ഷ ക്ഷണിച്ചു.  സംസ്ഥാനതലത്തില്‍ ഒന്നാംസ്ഥാനത്തിന് അര്‍ഹനാകുന്നവര്‍ക്ക് 15,000 രൂപയും, രണ്ടാംസ്ഥാനത്തിന് അര്‍ഹനാകുന്നവര്‍ക്ക് 10,000 രൂപയും, മൂന്നാംസ്ഥാനത്തിന് അര്‍ഹനാകുന്നവര്‍ക്ക് 5,000 രൂപയും  നല്‍കും.

പട്ടികജാതി വികസന വകുപ്പിനു വേണ്ടി സി-ഡിറ്റ് നടപ്പിലാക്കുന്ന സൈബര്‍ശ്രീ സെന്ററില്‍ മാറ്റ്‌ലാബ് പരിശീലനത്തിന് അപേക്ഷ ക്ഷണിച്ചു. തിരുവനന്തപുരത്ത് നല്‍കുന്ന പരിശീലനത്തിന് 20 നും 26 നും ഇടയില്‍ പ്രായമുള്ള പട്ടികജാതി വിഭാഗത്തില്‍പ്പെട്ടവര്‍ക്ക് അപേക്ഷിക്കാം. 

 ജില്ലാ പഞ്ചായത്ത് സമഗ്ര വിദ്യാഭ്യാസ പദ്ധതിയുടെ ഭാഗമായി നടപ്പിലാക്കുന്ന ഇ മുകുളം പദ്ധതിയുടെ  ഉദ്ഘാടനവും പദ്ധതി വിശദീകരണ യോഗവും നവംബര്‍ 16 ഉച്ചക്ക് 2 മണിക്ക് ജില്ലാ പഞ്ചായത്ത് ഹാളില്‍ ചേരും.  യോഗത്തില്‍ ജില്ലയിലെ ഗവ./എയിഡഡ് ഹൈസ്‌കൂളിലെ പ്രധാനാധ്യാപകരും പി ടി എ പ്രസിഡണ്ടുമാരും വിദ്യാഭ്യാസ ഓഫീസര്‍മാരും പങ്കെടുക്കണമെന്ന് ജില്ലാ പഞ്ചായത്ത് പ്രസിഡണ്ട്  അറിയിച്ചു.
പി എന്‍ സി/4303/2017