കായികതാരം പി.യു. ചിത്ര കായിക-യുവജനകാര്യ വകുപ്പ് മന്ത്രി എ.സി. മൊയ്തീനെ നിയമസഭയിലെ ഓഫീസിലെത്തി സന്ദര്‍ശിച്ചു. ചിത്രയ്ക്ക് തുടര്‍പരിശീലനത്തിനു വേണ്ട എല്ലാ സഹായങ്ങളും പരിധിയില്ലാതെ സര്‍ക്കാര്‍ നല്‍കുമെന്ന് മന്ത്രി അറിയിച്ചു. കോച്ച് എന്‍.എസ്. സിജിനും ചിത്രയോടൊപ്പം ഉണ്ടായിരുന്നു.

പി.എന്‍.എക്‌സ്.3451/17

ഓണം ഘോഷയാത്രയില്‍ നോര്‍ക്ക റൂട്ട്‌സിനു വേണ്ടി ഫ്‌ളോട്ട് അവതരിപ്പിക്കുന്നതിന് കലാകാരന്മാരില്‍ നിന്നും രൂപരേഖ ക്ഷണിച്ചു. പ്രവാസികളുമായി ബന്ധപ്പെട്ട വിഷയങ്ങളായിരിക്കണം ചിത്രീകരിക്കേണ്ടത്. എ-3 പേപ്പറില്‍ ഡിസൈനുകളുടെ ത്രിമാന ചിത്രങ്ങള്‍ സഹിതം ആഗസ്റ്റ് 14 ന് വൈകുന്നേരം അഞ്ചിനു മുന്‍പ് ചീഫ് എക്‌സിക്യൂട്ടീവ് ഓഫീസര്‍, നോര്‍ക്ക റൂട്ട്‌സ്, നോര്‍ക്ക സെന്റര്‍, തൈക്കാട് - 695014 വിലാസത്തിലോ ceonorkaroots@gmail.com ലോ ലഭ്യമാക്കണം. ഫോണ്‍ : 0471-2770537.

പി.എന്‍.എക്‌സ്.3450/17

കേരളത്തിന്റെ മാലിന്യ പ്രശ്‌നങ്ങള്‍ക്ക് പരിഹാരം കാണുക എന്ന ലക്ഷ്യത്തോടെ ഹരിതകേരളം മിഷന്റെ നേതൃത്വത്തില്‍ ആഗസ്റ്റ് 15ന് മാലിന്യത്തില്‍ നിന്ന് സ്വാതന്ത്ര്യം പദ്ധതിക്ക് തുടക്കമാവുമെന്ന് ഹരിതകേരളം വൈസ് ചെയര്‍പേഴ്‌സണ്‍ ഡോ. ടി.എന്‍. സീമ വാര്‍ത്താസമ്മേളനത്തില്‍ പറഞ്ഞു. ആഗസ്റ്റ് 15 നും അടുത്ത ദിവസവും മന്ത്രിമാര്‍, എം.പിമാര്‍, എം.എല്‍.എ മാര്‍, തദ്ദേശസ്ഥാപന പ്രതിനിധികള്‍ തുടങ്ങിയവര്‍ വീടുകളും സ്ഥാപനങ്ങളും സന്ദര്‍ശിക്കും. സെപ്തംബര്‍ 15 ന് തദ്ദേശസ്വയംഭരണ സ്ഥാപനതല ശുചിത്വ മാലിന്യ സംസ്‌കരണ പ്ലാന്‍ തയ്യാറാകും. ഈ മാസം ഹരിതകര്‍മ്മസേന രൂപീകരിക്കും.

മാലിന്യത്തില്‍ നിന്നും സ്വാതന്ത്ര്യം പ്രചാരണത്തോടനുബന്ധിച്ച് സംസ്ഥാനതല ഫോട്ടോഗ്രാഫി മത്സരം സംഘടിപ്പിക്കുന്നു. പരിപാടിയുടെ ഭാഗമായി പ്രാദേശികമായി നടക്കുന്ന വിവിധ പരിപാടികളുടെ ഫോട്ടോകളാണ് മത്സരത്തിന് പരിഗണിക്കുക. 25,000 രൂപ ഒന്നാം സമ്മാനവും 15,000 രൂപ രണ്ടാം സമ്മാനവും 10,000 രൂപ മൂന്നാം സമ്മാനവും ലഭിക്കും. 8281199014 ലേക്ക് വാട്‌സ് അപ്പ് ആയോ suchitwamissionphotos@gmail.com ലോ ഫോട്ടോ അയയ്ക്കാം. ആഗസ്റ്റ് 20 ആണ് എന്‍ട്രികള്‍ ലഭിക്കേണ്ട അവസാന തീയതി.

പി.എന്‍.എക്‌സ്.3448/17

കുടിവെള്ള ശുചിത്വ മന്ത്രാലയം സ്വച്ഛത്തോണ്‍ 1.0 സ്വച്ഛ് ഭാരത് ഹാക്കത്തോണ്‍ സംഘടിപ്പിക്കുന്നു. സ്വച്ഛ് ഭാരത് മിഷന്റെ നടത്തിപ്പില്‍ നേരിടാനിടയുള്ള വെല്ലുവിളികള്‍ക്ക് പരിഹാര മാര്‍ഗ്ഗങ്ങള്‍ കാണുന്നതിന് പൊതുജനങ്ങളില്‍ നിന്ന് നിര്‍ദേശങ്ങള്‍ തേടുകയാണ് പ്രധാന ഉദ്ദേശ്യം. ആദ്യഘട്ടത്തില്‍ മത്സരാര്‍ത്ഥികളില്‍ നിന്നും ഓണ്‍ലൈന്‍ എന്‍ട്രികള്‍ ക്ഷണിക്കും. രണ്ടാംഘട്ടത്തില്‍ രജിസ്റ്റര്‍ ചെയ്തവര്‍ മുന്നോട്ട് വയ്ക്കുന്ന പ്രശ്‌നപരിഹാര മാര്‍ഗ്ഗങ്ങള്‍ തത്സമയം പ്രദര്‍ശിപ്പിക്കും.

കോഴിക്കോട് ആസ്ഥാനമായി പ്രവര്‍ത്തിക്കുന്ന കിര്‍ടാഡ്‌സ് (കേരള ഇന്‍സ്റ്റിറ്റ്യൂട്ട് ഫോര്‍ റിസര്‍ച്ച് ട്രെയിനിംഗ് ആന്റ് ഡെവലപ്‌മെന്റ് സ്റ്റഡീസ് ഓഫ് ഷെഡ്യൂള്‍ഡ് കാസ്റ്റ്‌സ് ആന്റ് ഷെഡ്യൂള്‍ഡ് ട്രൈബ്‌സ്) വകുപ്പിലേക്ക് പ്രോജക്ട് ഫെല്ലോ തസ്തികയിലേക്കും ഡാറ്റാ എന്‍ട്രി ഓപ്പറേറ്ററുടെ തസ്തികയിലേക്കും താല്‍ക്കാലിക അടിസ്ഥാനത്തില്‍ നിയമനം നടത്തും.

ബോയിലര്‍ അറ്റന്‍ഡന്റ്‌സ് കോംപീറ്റന്‍സി പരീക്ഷയുടെ തീയതികള്‍ നിശ്ചയിച്ചു. സെക്കന്റ് ക്ലാസ് ബോയിലേഴ്‌സ് അറ്റന്‍ഡന്റ്‌സ് കോംപീറ്റന്‍സി പരീക്ഷ ഒക്ടോബര്‍ പത്ത്, 11, 12 തീയതികളിലും ഫസ്റ്റ് ക്ലാസ് ബോയിലേഴ്‌സ് അറ്റന്‍ഡന്റ്‌സ് കോംപീറ്റന്‍സി പരീക്ഷ നവംബര്‍ 14, 15, 16 തീയതികളിലും നടക്കുമെന്ന് ഫാക്ടറീസ് ആന്റ് ബോയിലേഴ്‌സ് ചെയര്‍മാന്‍ ബോര്‍ഡ് ഓഫ് എക്‌സാമിനേഷന്‍ ഡയറക്ടര്‍ അറിയിച്ചു.

പി.എന്‍.എക്‌സ്.3445/17

ശ്രീ ചിത്തിര തിരുനാള്‍ ഇന്‍സ്റ്റിറ്റ്യൂട്ട് ഫോര്‍ മെഡിക്കല്‍ സയന്‍സ് ആന്റ് ടെക്‌നോളജിയുടെയും, നാഷണല്‍ ഇന്‍സ്റ്റിറ്റ്യൂട്ട് ഓഫ് സ്പീച്ച് ആന്റ് ഹിയറിംഗിന്റെയും സംയുക്ത സംരംഭമായ മസ്തിഷ്‌കവികാസത്തകരാറുകള്‍ക്കായുള്ള സമഗ്ര കേന്ദ്രത്തിന്റെ ഉദ്ഘാടനം ഇന്ന് (ആഗസ്റ്റ് എട്ട്) ആരോഗ്യമന്ത്രി കെ.കെ. ശൈലജ ടീച്ചര്‍ നിര്‍വഹിക്കും. ശ്രീ ചിത്തിര തിരുനാള്‍ ഇന്‍സ്റ്റിറ്റ്യൂട്ടിലെ അച്യുതമേനോന്‍ സെന്റര്‍ ഫോര്‍ ഹെല്‍ത്ത് സ്റ്റഡീസ് ഓഡിറ്റോറിയത്തില്‍ വൈകിട്ട് നാലിനാണ് ചടങ്ങ്.

സംസ്ഥാനത്ത് സര്‍വ ശിക്ഷാ അഭിയാന്റെ കീഴില്‍ ഭിന്നശേഷിയുള്ള കുട്ടികളുടെ പരിശീലനത്തിനായി കേന്ദ്ര മാനവ വിഭവ ശേഷി മന്ത്രാലയം തുടര്‍ച്ചാനുമതി നല്‍കാതിരുന്നതും നിലവില്‍ അവശേഷിക്കുന്നതുമായ 408 റിസോഴ്‌സ് അദ്ധ്യാപകര്‍ക്ക് ഒരു വര്‍ഷത്തേയ്ക്ക് (2017-18) കരാര്‍ അടിസ്ഥാനത്തില്‍ പുനര്‍ നിയമനം നല്‍കുന്നതിന് അനുമതി നല്‍കി പൊതുവിദ്യാഭ്യാസ വകുപ്പ് ഉത്തരവ് പുറപ്പെടുവിച്ചു.

പി.എന്‍.എക്‌സ്.3423/17

കേരളത്തെ മാലിന്യ രഹിത സംസ്ഥാനമാക്കുന്നതിന്റെ ഭാഗമായി സംഘടിപ്പിക്കുന്ന 'മാലിന്യത്തില്‍ നിന്നും സ്വാതന്ത്ര്യം' യജ്ഞത്തില്‍ ശുചിത്വസംഗമവും പ്രതിജ്ഞയും സംഘടിപ്പിക്കും. ഓഗസ്റ്റ് 15 ന് ജില്ലാതലത്തില്‍ മന്ത്രിമാര്‍ പങ്കെടുക്കുന്ന സ്വാതന്ത്ര്യദിന ചടങ്ങുകള്‍ക്കു ശേഷം 'മാലിന്യത്തില്‍ നിന്നും സ്വാതന്ത്ര്യം' പ്രഖ്യാപനം നടത്തും. തദ്ദേശഭരണ സ്ഥാപനങ്ങളില്‍ നടക്കുന്ന സ്വാതന്ത്ര്യ ദിനപരിപാടികളിലും പ്രഖ്യാപനമുണ്ടാവും. ഓഗസ്റ്റ് 15 ന് വൈകിട്ട് നാലു മുതല്‍ ഏഴുവരെ വാര്‍ഡ് തലത്തില്‍ ശുചിത്വസംഗമം സംഘടിപ്പിക്കും.