കഴിഞ്ഞവര്‍ഷം ആഗസ്റ്റില്‍ ഒന്നാം വര്‍ഷ ഹയര്‍സെക്കന്ററി തുല്യതാ പരീക്ഷ എഴുതിയ വിദ്യാര്‍ത്ഥികള്‍ക്കുള്ള ഇംപ്രൂവ്‌മെന്റ് പരീക്ഷ സെപ്തംബര്‍ 22, 23, 24 തീയതികളില്‍ സംസ്ഥാനത്തെ വിവിധ പരീക്ഷാ കേന്ദ്രങ്ങളില്‍ നടത്തും. ഇംഗ്ലീഷ്, രണ്ടാം ഭാഷ, പാര്‍ട്ട് - മൂന്ന് വിഷയങ്ങള്‍ ഉള്‍പ്പടെ പരമാവധി മൂന്ന് വിഷയങ്ങള്‍ ഇംപ്രൂവ് ചെയ്യാം. പരീക്ഷാഫീസ് 800 രൂപ. സര്‍ട്ടിഫിക്കറ്റ് ഫീസ് 100 രൂപ. പിഴയില്ലാതെ 21 വരെ ഫീസടയ്ക്കാം. 20 രൂപ പിഴയോടെ 28 വരെ ഫീസടയ്ക്കാം. പരീക്ഷാ കേന്ദ്രങ്ങളിലാണ് ഫീസടയ്‌ക്കേണ്ടത്. പരീക്ഷാ കേന്ദ്രങ്ങളുടെ പട്ടിക ഉള്‍പ്പെട്ട നോട്ടിഫിക്കേഷന്റെ പൂര്‍ണ രൂപം www.dhsekerala.gov.in ല്‍ ലഭ്യമാണ്.

സംസ്ഥാനത്തെ സര്‍ക്കാര്‍, അര്‍ദ്ധസര്‍ക്കാര്‍ ജീവനക്കാര്‍, അധ്യാപകര്‍, പൊതുമേഖലാ സ്ഥാപനം, യൂണിവേഴ്‌സിറ്റി, സംസ്ഥാന-ജില്ല-പ്രാഥമിക സഹകരണ സംഘം, ദേശസാത്കൃത, ഷെഡ്യൂള്‍ഡ് ബാങ്ക്, സര്‍ക്കാര്‍ നിയന്ത്രണത്തിലെ കോര്‍പറേഷനുകള്‍, ലിമിറ്റഡ് കമ്പനികള്‍ എന്നിവയിലെ ജീവനക്കാര്‍ തങ്ങളുടെ പേരുള്‍പ്പെട്ട റേഷന്‍ കാര്‍ഡുകള്‍ ആഗസ്റ്റ് 20നകം ഡ്രോയിംഗ് ആന്റ് ഡിസ്‌ബേഴ്‌സിംഗ് ഓഫീസര്‍ മുമ്പാകെ പരിശോധനയ്ക്ക് ഹാജരാക്കണമെന്ന് സര്‍ക്കാര്‍ സര്‍ക്കുലര്‍ പുറത്തിറക്കി. റേഷന്‍ മുന്‍ഗണന പട്ടികയില്‍ അനര്‍ഹര്‍ കടന്നുകൂടിയതായി സര്‍ക്കാരിന്റെ ശ്രദ്ധയില്‍പെട്ട സാഹചര്യത്തിലാണ് നടപടി.

യു.എ.ഇ.യിലെ മോഡല്‍ സ്‌കൂളിലേക്ക് അധ്യാപക തസ്തികകളില്‍ നിയമനത്തിനായി ആഗസ്ത് 13 ന് എറണാകുളം കുണ്ടന്നൂരുള്ള ഹോട്ടല്‍ വൈറ്റ് ഫോര്‍ട്ടില്‍ ഒ.ഡി.ഇ.പി.സി. മുഖേന വാക്-ഇന്‍-ഇന്റര്‍വ്യൂ നടത്തും. തസ്തിക, യോഗ്യത എന്ന ക്രമത്തതില്‍ : കിന്റര്‍ഗാര്‍ട്ടന്‍ ടീച്ചര്‍ (സ്ത്രീകള്‍ മാത്രം) : ബിരുവവും പ്രീപ്രൈമറി ട്രെയിനിംഗ് ഡിപ്ലോമ/മോണ്ടിസ്സോറി സര്‍ട്ടിഫിക്കറ്റും, സി.ബി..എസ്.ഇ/ഐ.സി.എസ്.ഇ സ്‌കൂളുകളില്‍ സമാനതസ്തികയില്‍ രണ്ട് വര്‍ഷത്തെ പ്രവൃത്തി പരിചയവും ഉണ്ടാവണം, പരമാവധി പ്രായം 45 വയസ്.

തിരുവനന്തപുരം, കൊല്ലം, തൃശൂര്‍, പാലക്കാട്, കോഴിക്കോട്, മലപ്പുറം, വയനാട്, കണ്ണൂര്‍, കാസര്‍ഗോഡ് എന്നീ ഒന്‍പത് ജില്ലകളിലെ അടിസ്ഥാന സൗകര്യമുള്ള സര്‍ക്കാര്‍/എയ്ഡഡ് ഹയര്‍ സെക്കന്ററി സ്‌കൂളുകളില്‍ പ്ലസ് വണ്‍ പ്രവേശനത്തിന് 10 ശതമാനം സീറ്റു വര്‍ദ്ധനവ് കൂടി അനുവദിച്ച് ഉത്തരവായി. ഇതിനകം പ്രവേശനം നേടിയ വിദ്യാര്‍ത്ഥികള്‍ക്കും വര്‍ദ്ധിപ്പിച്ച 10 ശതമാനം സീറ്റുകളിലേക്ക് അപേക്ഷിക്കാം. അണ്‍-എയ്ഡഡ് ഹയര്‍ സെക്കന്ററി സ്‌കൂളുകളിലെ ബാച്ചുകള്‍ക്ക് വര്‍ദ്ധനവ് ബാധകമല്ല.

പി.എന്‍.എക്‌സ്.3495/17

ചൊവ്വാഴ്ച പൊതു തെരഞ്ഞെടുപ്പ് നടന്ന മട്ടന്നൂര്‍ നഗരസഭയില്‍ 83 ശതമാനം പേര്‍ വോട്ടു രേഖെപ്പടുത്തിയതായി സംസ്ഥാന തെരഞ്ഞെടുപ്പു കമ്മീഷന്‍ അറിയിച്ചു. നഗരസഭയില്‍ മൊത്തം 36330 വോട്ടര്‍മാരുള്ളതില്‍ 30122 പേരാണ് വോട്ടവകാശം വിനിയോഗിച്ചത്. ആഗസ്റ്റ് പത്തിന് രാവിലെ 10 മണിക്ക് വോട്ടെണ്ണല്‍ ആരംഭിക്കും. തെരഞ്ഞെടുപ്പു നടന്ന നഗരസഭ വാര്‍ഡ്, വോട്ടിംഗ് ശതമാനം എന്ന ക്രമത്തില്‍.

ശ്രീ ചിത്തിര തിരുനാള്‍ ഇന്‍സ്റ്റിറ്റ്യൂട്ട് ഫോര്‍ മെഡിക്കല്‍ സയന്‍സ് ആന്റ് ടെക്‌നോളജിയുടെയും നാഷണല്‍ ഇന്‍സ്റ്റിറ്റ്യൂട്ട് ഓഫ് സ്പീച്ച് ആന്റ് ഹിയറിംഗിന്റെയും സംയുക്ത സംരംഭമായ മസ്തിഷ്‌കവികാസത്തകരാറുകള്‍ക്കായുള്ള സമഗ്ര കേന്ദ്രം ഉദ്ഘാടനം ചെയ്തു. കേരളത്തിലെ പകര്‍ച്ചേതര രോഗങ്ങളുടെ പ്രതിരോധവും നിയന്ത്രണവും സംബന്ധിച്ച് അച്യുതമേനോന്‍ സെന്റര്‍ ഫോര്‍ ഹെല്‍ത്ത് സയന്‍സ് ആന്റ് സ്റ്റഡീസ് നടത്തിയ പഠനത്തിന്റെ പ്രോജക്ട് റിപ്പോര്‍ട്ട് പ്രകാശനം ചടങ്ങില്‍ ആസൂത്രണ ബോര്‍ഡ് അംഗം ഡോ. ബി. ഇഖ്ബാല്‍ ചടങ്ങില്‍ നിര്‍വഹിച്ചു. ആരോഗ്യവിവരങ്ങളുടെ അഭാവമാണ് ആരോഗ്യമേഖല നേരിടുന്ന പ്രധാനപ്രശ്‌നമെന്ന് അദ്ദേഹം പറഞ്ഞു.

പോളിടെക്‌നിക്കുകളില്‍ എന്‍.സി.സി/സ്‌പോര്‍ട്ട്‌സ് ക്വാട്ട പ്രവേശനത്തിനുളള കൗണ്‍സിലിംഗ് 11ന് തിരുവനന്തപുരം സാങ്കേതിക വിദ്യാഭ്യാസ ഡയറക്ടറേറ്റില്‍ നടക്കും. കൗണ്‍സിലിംഗിന് തെരഞ്ഞെടുക്കപ്പെട്ടവരുടെ റാങ്ക് ലിസ്റ്റ് www.dtekerala.gov.in, www.polyadmission.org എന്നിവയില്‍ പ്രസിദ്ധീകരിച്ചിട്ടുണ്ട്. റാങ്ക് ലിസ്റ്റില്‍ ഉള്‍പ്പെട്ടവര്‍ ബന്ധപ്പെട്ട രേഖകളുടെ അസലുമായി രക്ഷകര്‍ത്താവിനോടൊപ്പം രാവിലെ 10 മണിക്ക് എത്തണം.

കേരള സംസ്ഥാന ലഹരി വര്‍ജ്ജന മിഷന്‍ വിമുക്തിയുടെ ഭാഗമായി തിരുവനന്തപുരത്ത് ആരംഭിക്കുന്ന ലഹരി വിമുക്തിക്കായുള്ള കൗണ്‍സലിംഗ് കേന്ദ്രത്തില്‍ കരാര്‍ അടിസ്ഥാനത്തില്‍ രണ്ട് കൗണ്‍സലര്‍മാരെ തെരഞ്ഞെടുക്കും. എം.എസ്.ഡബ്ലിയു (മെഡിക്കല്‍ ആന്റ് സൈക്യാട്രി),വിദ്യാഭ്യാസയോഗ്യതയ്‌ക്കൊപ്പം ഈ മേഖലയില്‍ കൗണ്‍സലറായി പ്രവര്‍ത്തിച്ച രണ്ടു വര്‍ഷത്തെ പ്രവര്‍ത്തി പരിചയം, കമ്പ്യൂട്ടര്‍ പരിചയം എന്നിവ ഉണ്ടാവണം. പ്രായം 45 വയസിനുതാഴെ.

തിരുവനന്തപുരം ബാര്‍ട്ടണ്‍ഹില്‍ സര്‍ക്കാര്‍ എന്‍ജിനീയറിംഗ് കോളേജില്‍ ഇലക്ട്രിക്കല്‍ ആന്റ് ഇലക്ട്രോണിക്‌സ്, സിവില്‍ തുടങ്ങിയ വിഭാഗങ്ങളില്‍ ട്രേഡ്‌സ്മാന്‍, ഇന്‍ഫര്‍മേഷന്‍ ടെക്‌നോളജി വിഭാഗത്തില്‍ ട്രേഡ് ഇന്‍സ്ട്രക്ടര്‍ തസ്തികകളിലെ ഒഴിവുകളിലേക്ക് ഐ.റ്റി.ഐ യോഗ്യതയുള്ള ഉദേ്യാഗാര്‍ത്ഥികളില്‍ നിന്നും അപേക്ഷ ക്ഷണിച്ചു. പ്രതിഫലം മണിക്കൂറിന് 200 രൂപ. നിശ്ചിത യോഗ്യതയുള്ളവര്‍ ജനനതീയതി, വിദ്യാഭ്യാസ യോഗ്യത എന്നിവ തെളിയിക്കുന്ന അസല്‍ സര്‍ട്ടിഫിക്കറ്റുകളും, ബയോഡേറ്റായും സഹിതം ആഗസ്റ്റ് 16 രാവിലെ 10ന് കോളേജ് പ്രിന്‍സിപ്പാളിനു മുമ്പില്‍ കൂടിക്കാഴ്ചക്കെത്തണം. വെബ്‌സൈറ്റ് www.gecbh.ac.in

ഇന്ന് (ആഗസ്റ്റ് ഒന്‍പത്) ലോക തദ്ദേശീയ ജനതയുടെ അന്തര്‍ദേശീയ ദിനമായി ആചരിക്കും. ദിനാചരണത്തോടനുബന്ധിച്ച് പട്ടികവര്‍ഗ വികസന വകുപ്പും കോഴിക്കോട് കിര്‍ത്താഡ്‌സും സംയുക്തമായി സംസ്ഥാനത്തെ തിരഞ്ഞെടുക്കപ്പെട്ട 16 പി.വി.റ്റി.ജി കോളനികളില്‍ വിപുലമായ പരിപാടികള്‍ സംഘടിപ്പിക്കും. നടപ്പുവര്‍ഷം ഐക്യരാഷ്ട്ര സംഘടന ഒരു മാസക്കാലം നീണ്ടുനില്‍ക്കുന്ന ആഘോഷ പരിപാടികള്‍ സംഘടിപ്പിക്കാന്‍ തീരുമാനിച്ചിട്ടുണ്ട്. സെപ്തംബര്‍ 13 ന് പട്ടികവര്‍ഗ വികസന വകുപ്പ് സംസ്ഥാനത്തെ മുഴുവന്‍ പട്ടികവര്‍ഗ കോളനികളിലും വിവിധ വകുപ്പുകളുടെ സഹായത്തോടെ പ്രത്യേക പരിപാടികള്‍ സംഘടിപ്പിക്കുമെന്ന് പട്ടികവര്‍ഗ വികസന വകുപ്പ് ഡയറക്ടര്‍ അറിയിച്ചു.