വനിതാ കമ്മീഷന്‍ അദാലത്ത് ഇന്ന് (ഏപ്രില്‍ 17) രാവിലെ 10 ന് തിരൂര്‍ ഇ.എം.എസ് സാംസ്‌കാരിക സമുച്ചയത്തില്‍ നടക്കും.

ജില്ലയിലെ താനൂര്‍,തിരൂര്‍ പരപ്പനങ്ങാടി പോലീസ് സ്റ്റേഷന്‍ പരിധിയില്‍ പോലീസ് നിയമത്തിലെ 78,79 വകുപ്പുകള്‍ പ്രകാരം ജില്ലാ പോലീസ് മേധാവി നിരോധനാജ്ഞ പുറപ്പെടുവിച്ചു. മേഖലയില്‍ ക്രമസമാധാനം നിലനിര്‍ത്തുന്നതിനും പൊതുജനങ്ങളുടെ ജീവനും സ്വത്തിനും സംരക്ഷണം ഉറപ്പുവരുത്തുന്നതിനുമാണ് നടപടി.  ഇതിന്‍ പ്രകാരം  പൊതുസമ്മേളനങ്ങള്‍ പ്രകടനങ്ങള്‍,റാലികള്‍ എന്നിവ നിരോധിച്ചുട്ടുണ്ട്. അക്രമത്തിനുപയോഗിക്കുന്ന കല്ലുകളും ആയുധങ്ങളും സ്‌ഫോടക വസ്തുക്കളും ശേഖരിക്കുന്നത് കുറ്റകരമാണ്. എഴു ദിവസത്തേക്കാണ് നിരേധനാജ്ഞ പ്രഖ്യാപിച്ചിട്ടുള്ളത്.  

    തിരുവനന്തപുരം മെഡിക്കല്‍ കോളേജ് ആശുപത്രിയിലെ സര്‍ജിക്കല്‍ ഗ്യാസ്‌ട്രോ എന്ററോളജി വിഭാഗത്തില്‍ സീനിയര്‍ ലക്ചറര്‍/അസി. പ്രൊഫസര്‍ തസ്തികകളില്‍ ഒരു ഒഴിവിലേക്ക് കരാറടിസ്ഥാനത്തില്‍ നിയമനം നടത്തുന്നതിനായി ഏപ്രില്‍ 21 ന് വാക്ക് ഇന്‍ ഇന്റര്‍വ്യൂ നടത്തും. എം.എസ്, ഡി.എന്‍.ബി (സര്‍ജറി) യാണ് വിദ്യാഭ്യാസ യോഗ്യത.  പ്രതിമാസം 54,200 രൂപ വേതനം ലഭിക്കും.  രാവിലെ 11 ന് മെഡിക്കല്‍ കോളേജ് പ്രിന്‍സിപ്പല്‍ കാര്യാലയത്തിലാണ് ഇന്റര്‍വ്യൂ.
പി.എന്‍.എക്‌സ്.1421/18
 

    ഒളിമ്പിക്‌സ്, കോമണ്‍വെല്‍ത്ത് തുടങ്ങിയ അന്തര്‍ദേശീയ കായിക മത്സരങ്ങളില്‍ മെഡല്‍ നേടുന്നതിന് കേരളത്തിലെ കായികതാരങ്ങളെ സജ്ജമാക്കുന്നതിന് സംസ്ഥാന സ്‌പോര്‍ട്‌സ് കൗണ്‍സില്‍ നടപ്പിലാക്കുന്ന എലൈറ്റ് ട്രെയിനിംഗ് പദ്ധതിയിലേക്ക് കായിക താരങ്ങളെ തിരഞ്ഞെടുക്കുന്നു. 2016-17, 2017-18 വര്‍ഷങ്ങളില്‍ ദേശീയ, അന്തര്‍ദേശീയ മത്സരങ്ങളില്‍ കഴിവ് തെളിയിച്ചിട്ടുള്ള 14 മുതല്‍ 23 വയസുവരെ പ്രായമുള്ള കായികതാരങ്ങളെയാണ് തിരഞ്ഞെടുക്കുന്നത്.

    തയ്യല്‍ അധ്യാപക തസ്തികയ്ക്കുള്ള യോഗ്യതയായി കേരളത്തിലെ വിവിധ യൂണിവേഴ്‌സിറ്റികള്‍ നടത്തുന്ന ഫാഷന്‍ ടെക്‌നോളജി, കോസ്റ്റിയൂം ഡിസൈനിംഗ് ബിരുദ കോഴ്‌സുകള്‍ കൂടി നിശ്ചയിച്ച് പൊതുവിദ്യാഭ്യാസ വകുപ്പ് ഉത്തരവായി.
    എം.ജി യൂണിവേഴ്‌സിറ്റിയുടെ ബാച്ചിലര്‍ ഓഫ് ഫാഷന്‍ ടെക്‌നോളജി (ബി.എഫ്.ടി), കണ്ണൂര്‍ യൂണിവേഴ്‌സിറ്റിയുടെ ബി.എസ്‌സി എഫ്.എ.ഡി.റ്റി (ഫാഷന്‍ ആന്റ് അപ്പാരല്‍ ഡിസൈനിംഗ് ടെക്‌നോളജി), കാലിക്കറ്റ് യൂണിവേഴ്‌സിറ്റിയുടെ ബി.എസ്‌സി കോസ്റ്റിയൂം ആന്റ് ഫാഷന്‍ ഡിസൈനിംഗ് എന്നീ കോഴ്‌സുകളാണ് നിയമനത്തിനുള്ള യോഗ്യത.

    ഭരണരംഗത്ത് ഭാഷാമാറ്റ പുരോഗതി ഉറപ്പാക്കാന്‍ ജീവനക്കാര്‍ക്ക് ഐഎംജി മുഖേന ഭരണഭാഷാ പരിശീലനം ഉറപ്പാക്കുമെന്ന് ചീഫ് സെക്രട്ടറി പോള്‍ ആന്റണി അറിയിച്ചു. വിവിധ വകുപ്പുകളിലെ ഭാഷാമാറ്റ പുരോഗതി അവലോകനം ചെയ്യുന്നതിന് സെക്രട്ടേറിയറ്റ് ദര്‍ബാര്‍ഹാളില്‍ വിളിച്ചുചേര്‍ത്ത സംസ്ഥാനതല യോഗത്തില്‍ സംസാരിക്കുകയായിരുന്നു അദ്ദേഹം.

വട്ടപ്പാറ വളവിലെ റോഡപകടങ്ങള്‍ ഒഴിവാക്കുന്നതിന് നേരത്തെ ഉണ്ടായിരുന്ന പൊലീസ് എയ്ഡ് പോസ്റ്റ് പുനസ്ഥാപിക്കാന്‍ നടപടിയെടുക്കുമെന്ന് ജില്ലാ കളക്ടര്‍ അമിത് മീണ പറഞ്ഞു. റോഡരികിലെ മുഴുവന്‍ പരസ്യബോര്‍ഡുകളും നീക്കം ചെയ്യാനും മുന്നറിയിപ്പ് ബോര്‍ഡ് സ്ഥാപിക്കാനും റോഡ് സേഫ്റ്റി യോഗത്തില്‍ കലക്ടര്‍ നിര്‍ദേശം നല്‍കി. വട്ടപ്പാറയില്‍ പരസ്യബോര്‍ഡുകള്‍ നീക്കം ചെയ്യാനും പുതിയത് സ്ഥാപിക്കുന്നത് തടയാനും തഹസില്‍ദാറുടെ നേതൃത്വത്തില്‍ പ്രത്യേക സ്‌ക്വാഡ് രൂപീകരിക്കും. ലഹരി ഉപയോഗിച്ച് വാഹനമോടിക്കുന്നവരെ നിയന്ത്രിക്കാന്‍  പരിശോധന ശക്തമാക്കും.

സംസ്ഥാന ആരോഗ്യവകുപ്പിന്റെ ഇ-ഹെല്‍ത്ത് പദ്ധതി ജില്ലയില്‍ നടപ്പിലാക്കുന്നതിനുള്ള നടപടികള്‍ തുടങ്ങി. ആധാര്‍ കാര്‍ഡുമായി ബന്ധിപ്പിച്ചുകൊണ്ട്  ഇ ഹെല്‍ത്ത് പദ്ധതി പൂര്‍ത്തീകരിക്കപ്പെടുമ്പോള്‍ സര്‍ക്കാര്‍ ആശുപത്രികളിലെ സേവനങ്ങള്‍ രോഗികള്‍ക്ക് എളുപ്പത്തില്‍ ലഭ്യമാകും. വീട്ടിലിരുന്ന് തന്നെ സര്‍ക്കാര്‍ ആശുപത്രിയിലെ സേവനങ്ങളെക്കുറിച്ചറിയാനും ഒപി ടിക്കറ്റ് ബുക്ക് ചെയ്യാനും  സാധിക്കുന്ന വിധത്തിലാണ് പദ്ധതി തയ്യാറാക്കുന്നത്.