പൊതുവിദ്യാഭ്യാസ സംരക്ഷണ യജ്ഞവുമായി ബന്ധപ്പെട്ട് ജില്ലയില്‍ നടപ്പാക്കുന്ന പദ്ധതികളെ സംബന്ധിച്ച് ചര്‍ച്ച ചെയ്യുന്നതിന് വിദ്യാഭ്യാസ വകുപ്പ് മന്ത്രി. സി.രവീന്ദ്രനാഥിന്റെ അധ്യക്ഷതയില്‍ നാളെ (ഡിസംബര്‍ 22) രാവിലെ ഒമ്പതിന് മലപ്പുറം ടൗണ്‍ ഹാളില്‍ യോഗം ചേരും.  ജില്ലയിലെ എല്‍.പി, യു.പി, ഹൈസ്‌കൂള്‍, ഹയര്‍ സെക്കന്‍ഡറി പ്രധാന അധ്യാപകര്‍ എ.ഇ.ഒ, ഡി.ഇ.ഒ തുടങ്ങിയവര്‍ പങ്കെടുക്കണമെന്ന് വിദ്യാഭ്യാസ ഡെപ്യൂട്ടി ഡയറക്ടര്‍ അറിയിച്ചു.

സ്‌കൂള്‍ തല വിജയഭേരി പ്രവര്‍ത്തനം ഊര്‍ജ്ജിതമാക്കുവാന്‍ ജില്ലാ പഞ്ചായത്തില്‍ ചേര്‍ന്ന വിജയഭേരി സ്‌കൂള്‍ കോ-ഓര്‍ഡിനേറ്റര്‍മാരുടെ യോഗം തീരുമാനിച്ചു. അര്‍ധ വാര്‍ഷിക പരീക്ഷ ഫലത്തിന്റെ അടിസ്ഥാനത്തില്‍ പിന്നാക്കം നില്‍ക്കുന്ന വിദ്യാര്‍ത്ഥികളെ കണ്ടെത്തി പ്രത്യേക പരിശീലനം നല്‍കും. മിടുക്കരായ കുട്ടികള്‍ക്ക് എ പ്ലസ് ഉറപ്പ് വരുത്തുവാനും സവിശേഷ കര്‍മ്മ പരിപാടികള്‍ ആവിഷ്‌കരിച്ചു. ഓരോ വിദ്യാലയത്തിലും പരീക്ഷ എഴുതുന്ന 10 ശതമാനം വിദ്യാര്‍ത്ഥികള്‍ക്കെങ്കിലും എപ്ലസ് ഉറപ്പു വരുത്തുവാനും ഡി പ്ലസ് രഹിത വിജയം ഉറപ്പ് വരുത്തുവാനും വിജയഭേരി ലക്ഷ്യമിടുന്നു.

    ജില്ലയില്‍ ആരോഗ്യ വകുപ്പില്‍ ജൂനിയര്‍ പബ്ലിക്ക് ഹെല്‍ത്ത് നഴ്‌സ് തസ്തികയിലേക്ക് താല്‍ക്കാലിക നിയമനം നടത്തുന്നു.  താല്‍പര്യമുള്ളവര്‍ എസ്.എസ്.എല്‍.സി, എ.എന്‍.എം സര്‍ട്ടിഫിക്കറ്റ്, നഴ്‌സിങ് കൗണ്‍സില്‍ രജിസ്‌ട്രേഷന്‍ സര്‍ട്ടിഫിക്കറ്റ് ആധാര്‍ എന്നിവയുടെ അസ്സലും പകര്‍പ്പും സഹിതം ഡിസംബര്‍ 23ന് രാവിലെ 10.30ന് മലപ്പുറം സിവില്‍ സ്റ്റേഷനിലെ ജില്ലാ മെഡിക്കല്‍ ഓഫീസില്‍ നടക്കുന്ന കൂടിക്കാഴ്ചയക്ക് എത്തണം.

സംസ്ഥാന പഞ്ചായത്ത് ദിനാഘോഷം ജില്ലയില്‍ നടത്തുന്നതുമായി ബന്ധപ്പെട്ട് സംഘാടക സമിതി രൂപീകരണയോഗം ഇന്ന് (ഡിസംബര്‍ 21) ഉച്ചക്ക് രണ്ടിന് മലപ്പുറം ടൗണ്‍ ഹാളില്‍ ചേരും. തദ്ദേശ സ്വയം ഭരണ വകുപ്പ് മന്ത്രി കെ.ടി ജലീല്‍ അധ്യക്ഷത വഹിക്കും.

    ഗുരുവായൂര്‍ - ആല്‍ത്തറ - പൊന്നാനി റോഡില്‍ കുമ്മിപാലത്ത് കലുങ്കിന്റെ നിര്‍മ്മാണവും കുമ്മിപാലം മുതല്‍ കരിങ്കല്ലത്താണി വരെയുള്ള റോഡ് വീതി കൂട്ടുന്ന പ്രവൃത്തിയും നടക്കുന്നതിനാല്‍ ഇതിലൂടെയുള്ള വാഹന ഗതാഗതത്തിന് ഭാഗികമായ നിയന്ത്രണം ഉണ്ടായിരിക്കുമെന്ന് മഞ്ചേരി പൊതുമരാമത്ത് നിരത്ത് വിഭാഗം എക്‌സിക്യൂട്ടീവ് എഞ്ചിനീയര്‍ അറിയിച്ചു.       

മഞ്ചേരി ജില്ലാ കായിക സമുച്ചയത്തിന്റെ  നിര്‍മ്മാണം എത്രയും വേഗം പൂര്‍ത്തീകരിക്കുന്നതിന്  പദ്ധതി നടത്തിപ്പുമായി ബന്ധപ്പെട്ട രൂപീകരിച്ച സ്റ്റേറ്റ് ഹൈ പവര്‍ കമ്മിറ്റി ജനുവരി മൂന്നിന് തിരുവന്തപരത്ത് ചേരുമെന്ന് ജില്ലാ കലക്ടര്‍ അറിയിച്ചു. മന്ത്രിമാരായ ഡോ.കെ.ടി.ജലീല്‍, എ.സി.മൊയ്ദീന്‍ ജില്ലാ കലക്ടര്‍ അമിത് മീണ തുടങ്ങിയവര്‍ പങ്കെടുക്കും.കലക്ടറേറ്റില്‍ ജില്ലാ കലക്ടര്‍ അമിത് മീണയുടെ അധ്യക്ഷതയില്‍ ചേര്‍ന്ന സ്‌പോട്‌സ് കൗണ്‍സില്‍ എക്‌സിക്യൂട്ടിവ് യോഗത്തിലാണ് ഇതു സംബന്ധിച്ച തീരുമാനങ്ങള്‍ അറിയിച്ചത്.

ജില്ലാ പഞ്ചായത്ത് സ്ഥാപനമായ എം.ഐ.ഇ.ഡി മലപ്പുറത്ത് നടത്തുന്ന ഒരു മാസത്തെ ബ്യൂട്ടീഷന്‍ കോഴ്‌സ് ഡിസംബര്‍ 26ന് തുടങ്ങും. പങ്കെടുക്കുവാന്‍ താല്‍പര്യമുള്ളവര്‍ 26ന് രാവിലെ 10ന് ജില്ലാ പഞ്ചായത്ത് ഭവനില്‍ എത്തണം.  ഫോണ്‍ 0483 2730464.

ജില്ലാ ആസൂത്രണ സമിതി യോഗം ഡിസംബര്‍ 27ന് രാവിലെ 11.30ന് ജില്ലാ പഞ്ചായത്ത് സമ്മേളന ഹാളില്‍ ചേരും.