ജില്ലയില്‍ വിവിധ വകുപ്പുകളില്‍ ഉണ്ടാകുന്ന ഫുള്‍ടൈം സ്വീപ്പര്‍മാരുടെ ഒഴിവുകളിലേക്ക് പരിഗണിക്കപ്പെടുന്നതിന് സമ്മതമാണെന്ന് അറിയിച്ച പാര്‍ട്ട് ടൈം ജീവനക്കാരെ ഉള്‍പ്പെടുത്തി തയ്യാറാക്കിയ ജില്ലാതല പൊതു സീനിയോറിറ്റി ലിസ്റ്റിന്റെ അന്തിമ പട്ടിക പ്രസിദ്ധീകരിച്ചു.  കലക്ടറേറ്റ് നോട്ടീസ് ബോര്‍ഡ്, ജില്ലാ കലക്ടറുടെ വെബ്‌സൈറ്റ്, ജില്ലാ ഇന്‍ഫര്‍മേഷന്‍ ഓഫീസ്, കലക്ടറേറ്റിലെ എ സെക്ഷന്‍ എന്നിവിടങ്ങളില്‍ പട്ടിക പരിശോധനക്ക് ലഭിക്കും.
പി എന്‍ സി/4306/2017
 

ജില്ലാ വിദ്യാഭ്യാസ വകുപ്പിന്റെയും ജില്ലാ ശിശുക്ഷേമ സമിതിയുടെയും ആഭിമുഖ്യത്തില്‍ ശിശുദിന റാലി സംഘടിപ്പിച്ചു. കണ്ണൂര്‍ പൊലീസ് മൈതാനിയില്‍ നിന്ന് ആരംഭിച്ച റാലി ജില്ലാ പഞ്ചായത്ത് വൈസ് പ്രസിഡണ്ട് പി പി ദിവ്യ ഫ്‌ളാഗ് ഓഫ് ചെയ്തു. വിദ്യാഭ്യാസ ഉപ ഡയറക്ടര്‍ യു കരുണാകരന്‍ അധ്യക്ഷത വഹിച്ചു. ജില്ലാ ശിശുക്ഷേമ സമിതി സെക്രട്ടറി എം ശ്രീധരന്‍ സ്വാഗതം ആശംസിച്ചു.

 കേരളത്തിലെ ജനസംഖ്യയില്‍ 20 ശതമാനവും പ്രമേഹരോഗ ബാധിതരാണെന്നും അതില്‍ പകുതിയിലേറെയും സ്ത്രീകളാണെന്നുമുള്ള റിപ്പോര്‍ട്ടുകളുടെ പശ്ചാത്തലത്തില്‍ സമൂഹം കൂടുതല്‍ ജാഗ്രത പാലിക്കണമെന്ന് പ്രമേഹദിനാചരണത്തിന്റെ ഭാഗമായി സ്ത്രീകളും പ്രമേഹവും എന്ന വിഷയത്തില്‍ സംഘടിപ്പിച്ച ബോധവല്‍ക്കരണ പരിപാടി ആഹ്വാനം ചെയ്തു. കേരളത്തിലെ ഗ്രാമീണ സ്ത്രീകളിലാണ് പുരുഷന്‍മാരെക്കാള്‍ പ്രമേഹ രോഗികള്‍ കൂടുതല്‍. കൃത്യമായ വൈദ്യ പരിശോധനകള്‍ നടത്താത്തതും വ്യായാമത്തിന്റെ കുറവും തെറ്റായ ഭക്ഷണ ശീലവുമാണ് ഇതിന്റെ പ്രധാന കാരണമെന്ന് പരിപാടിയില്‍ സംസാരിച്ചവര്‍ ചൂണ്ടിക്കാട്ടി. 

 തോട്ടട ഗവ.ഹയര്‍ സെക്കണ്ടറി സ്‌കൂള്‍ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്റെ ഭാഗമായി നിര്‍മിക്കുന്ന ബഹുനില കെട്ടിടത്തിന്റെ പ്രവൃത്തി ഉദ്ഘാടനം തുറമുഖ വകുപ്പ് മന്ത്രി രാമചന്ദ്രന്‍ കടന്നപ്പള്ളി നിര്‍വഹിച്ചു. ഗ്രാമമെന്നോ നഗരമെന്നോ പാവപ്പെട്ടവനെന്നോ പണക്കാരനെന്നോ ഉള്ള വ്യത്യാസമില്ലാതെ എല്ലാവര്‍ക്കും ഉന്നതനിലവാരമുള്ള വിദ്യാഭ്യാസം ലഭ്യമാക്കുകയെന്നതാണ് പൊതുവിദ്യാഭ്യാസ സംരക്ഷണ യജ്ഞത്തിലൂടെ സംസ്ഥാന സര്‍ക്കാര്‍ ലക്ഷ്യമിടുന്നതെന്ന് അദ്ദേഹം പറഞ്ഞു. ഇത് വിജയിപ്പിക്കുന്നതില്‍ രക്ഷിതാക്കളും അധ്യാപകരും പൂര്‍വവിദ്യാര്‍ഥികളും നാട്ടുകാരും ഒന്നിച്ചിറങ്ങണമെന്നും അദ്ദേഹം പറഞ്ഞു. 

മീസില്‍സ്-റൂബെല്ല പ്രതിരോധ കുത്തിവെപ്പ് സ്‌കൂളുകളുടെ ഉത്തരവാദിത്തമായി കണ്ട് വിജയിപ്പിക്കാന്‍ എല്ലാ സ്ഥാപന മേധാവികളും തയ്യാറാകണമെന്ന് ജില്ലാ കലക്ടര്‍ മീര്‍ മുഹമ്മദലി നിര്‍ദേശിച്ചു. നിരക്ഷരരോ വേണ്ടത്ര വിദ്യാഭ്യാസമില്ലാത്തവരോ ആയ രക്ഷിതാക്കളുടെ അഭിപ്രായമല്ല, കുട്ടികളുടെ ഭാവിയാണ് ഇക്കാര്യത്തില്‍ പ്രധാനമെന്നും അദ്ദേഹം പറഞ്ഞു. സ്‌കൂള്‍ ഹെഡ്മാസ്റ്റര്‍മാര്‍, മാനേജര്‍മാര്‍, പിടിഎ ഭാരവാഹികള്‍ എന്നിവരുടെ യോഗത്തില്‍ സംസാരിക്കുകയായിരുന്നു അദ്ദേഹം. ചിലയിടത്തൊക്കെ എതിര്‍പ്പുമായി വരുന്നത് രക്ഷിതാക്കളല്ലാത്ത ചിലരാണ്. ഇത്തരക്കാരെ അറസ്റ്റ് ചെയ്ത് നിയമ നടപടിയെടുക്കും. 

കൊച്ചി: ഓണത്തോടനുബന്ധിച്ച് സപ്ലൈകോ വില്‍പ്പനശാലകളില്‍ നിന്ന് സാധനങ്ങള്‍ വാങ്ങിയവര്‍ക്കായി ഏര്‍പ്പെടുത്തിയ ഓണം സമ്മാനമഴ പദ്ധതി വിജയികളെ തിരഞ്ഞെടുത്തു. അഞ്ച് പവന്‍ സ്വര്‍ണ്ണത്തിന്റെ ബമ്പര്‍ സമ്മാനം എറണാകുളം പനങ്ങാട് സ്വദേശിനിയായ വി ബിന്ദുവിനാണ് ലഭിച്ചത്.  കൂപ്പണ്‍ നമ്പര്‍ 205414.

കൊച്ചി: ജില്ലാ ഭക്ഷ്യ സുരക്ഷാ അസിസ്റ്റന്റ് കമ്മീഷണറുടെ കാര്യാലയത്തിലേക്ക് വാഹനം പ്രതിമാസ വാടകയിനത്തില്‍ ഡ്രൈവര്‍ ഉള്‍പ്പെടെ നല്‍കുവാന്‍ കഴിയുന്നവരില്‍ നിന്ന് മുദ്രവച്ച ദര്‍ഘാസുകള്‍ ക്ഷണിച്ചു.

ദര്‍ഘാസുകള്‍ നവംബര്‍ 28-ന് ഉച്ചയ്ക്ക് രണ്ടു വരെ നല്‍കാം. കൂടുതല്‍ വിവരങ്ങള്‍ക്ക് ഫോണ്‍ 0484-2784807.
 

കൊച്ചി: ഖാദി ബോര്‍ഡില്‍ നിന്നും സി.ബി.സി പദ്ധതി പ്രകാരം വിവിധ വ്യവസായങ്ങള്‍ തുടങ്ങുന്നതിന് വായ്പ എടുത്ത സംരംഭകരില്‍ വായ്പ കുടിശിക ഉളളവര്‍ക്ക് ഡിസംബര്‍ 31 വരെ ഒറ്റത്തവണ തീര്‍പ്പാക്കല്‍ പദ്ധതി നടപ്പിലാക്കാന്‍ ഖാദി ബോര്‍ഡ് യോഗം തീരുമാനിച്ചു.

പിഴ പലിശ ഒഴിവാക്കിക്കൊണ്ടുളള ഒറ്റത്തവണ തീര്‍പ്പാക്കല്‍ പദ്ധതിയുടെ ആനുകൂല്യം വായ്പ കുടിശികയുളള എല്ലാ സംരംഭകരും പ്രയോജനപ്പെടുത്തണമെന്ന് പ്രോജക്ട് ഓഫീസര്‍ അറിയിച്ചു. കൂടുതല്‍ വിവരങ്ങള്‍ക്ക് ഫേഅണ്‍ 0484-2339080.

തീരദേശ സാക്ഷരതാ പരിപാടിയുടെ രണ്ടാംഘട്ട പരിശീലനം

കൊച്ചി: സംസ്ഥാന സര്‍ക്കാര്‍, ഫിഷറീസ് വകുപ്പ് സംസ്ഥാന സാക്ഷരതാ മിഷനിലൂടെ നടപ്പിലാക്കുന്ന തീരദേശ സാക്ഷരതാ പരിപാടിയുടെ രണ്ടാംഘട്ടത്തിന്റെ ഭാഗമായി കൊല്ലം, എറണാകുളം, കോഴിക്കോട് ജില്ലകളിലെ തദ്ദേശസ്വയംഭരണ സ്ഥാപനമേധാവികള്‍ക്കും പ്രേരക്മാര്‍ക്കും പരിശീലനം നല്‍കി.

കൊച്ചി: ജില്ലാ ശിശുക്ഷേമസമിതിയുടെ ആഭിമുഖ്യത്തില്‍ ശിശുദിനറാലിയും സമ്മേളനവും നടത്തി. രാജേന്ദ്രമൈതാനിയില്‍ നിന്ന് ആരംഭിച്ച റാലി ജില്ലാ കളക്ടര്‍ കെ.മുഹമ്മദ് വൈ സഫീറുളള ഫ്‌ളാഗ് ഓഫ് ചെയ്തു. അതിനു ശേഷം ഗാന്ധിയന്‍ പ്രതിമയില്‍ ഹാരാര്‍പ്പണം നടത്തി. 18 സ്‌കൂളുകളില്‍ നിന്ന് 4000 കുട്ടികള്‍ പങ്കെടുത്ത വര്‍ണശബളമായ റാലി പാര്‍ക്ക് അവന്യൂ വഴി ചില്‍ഡ്രന്‍സ് പാര്‍ക്കില്‍ സമാപിച്ചു.