കഞ്ചിക്കോട് കിൻഫ്ര വ്യവസായ പാർക്കിനകത്ത് ഇതര സംസ്ഥാന തൊഴിലാളികൾക്കായി നിർമിക്കുന്ന പാർപ്പിട സമുച്ചയം 'അപ്നാ ഘർ' ജനുവരിയിൽ തൊഴിലാളികൾക്ക് കൈമാറുമെന്ന് തൊഴിൽ-എക്സൈസ് വകുപ്പ് മന്ത്രി ടി.പി. രാമകൃഷ്‌ണൻ പറഞ്ഞു. പാർപ്പിട സമുച്ചയത്തിന്റെ നിർമാണ പുരോഗതി വിലയിരുത്തി സംസാരിക്കുകയായിരുന്നു മന്ത്രി. നിർമാണ പ്രവർത്തനങ്ങൾ ഏറ്റെടുത്ത കിറ്റ്‌കോ നവംബർ അവസാനത്തോടെ പണി പൂർത്തിയാക്കി കെട്ടിടം തൊഴിൽ വകുപ്പിന് കൈമാറുമെന്ന് ഉറപ്പു നലകിയിട്ടുണ്ട്. തിരുവനന്തപുരം, എറണാകുളം, കോഴിക്കോട് ജില്ലകളിൽ സമാന രീതിയിൽ 'അപ്നാ ഘർ' പാർപ്പിട സമുച്ചയം നിർമിക്കുമെന്നും മന്ത്രി പറഞ്ഞു. 

ഐ.റ്റി.ഐ.കൾ വഴി തൊഴിൽ സാധ്യത വർദ്ധിപ്പിക്കുമെന്ന് തൊഴിൽ-എക്സൈസ് വകുപ്പ് മന്ത്രി ടി.പി. രാമകൃഷ്ണൻ പറഞ്ഞു. പെരുമാട്ടി ഗവ.ഐ.റ്റി.ഐ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.വിദ്യാർഥികൾക്ക് മികച്ച നൈപുണ്യ പരിശീലനം നൽകി സംസ്ഥാനത്തെ തൊഴിൽ സാധ്യതകൾ മെച്ചപ്പെടുത്തകയാണ് സർക്കാർ ലക്ഷ്യമെന്നും മന്ത്രി പറഞ്ഞു.

പതിനഞ്ചാമത് സംസ്ഥാന എക്സൈസ് കലാ-കായിക മേള ഇന്ന് (നവംബർ 12) സമാപിക്കും. മൂന്ന് ദിവസം നീണ്ടുനിന്ന കലാ-കായിക മേളയുടെ സമാപന സമ്മേളനം വൈകിട്ട് മൂന്നിന് വിക്ടോറിയ കോളെജിൽ പട്ടികജാതി-വർഗ-പിന്നാക്ക ക്ഷേമ-നിയമ-സാംസ്കാരിക വകുപ്പ് മന്ത്രി എ.കെ.ബാലൻ ഉദ്ഘാടനം ചെയ്യും.

എക്‌സൈസ് കമ്മീഷനർ ഋഷിരാജ് സിങ് അധ്യക്ഷനാകുന്ന പരിപാടിയിൽ കെ.ബാബു എം.എൽ.എ. മുഖ്യാതിഥിയാകും.

ലഹരി ഉപയോഗത്തിനെതിരെ നടപടികള്‍ സ്വീകരിക്കുന്നതില്‍ കേരളം ഒന്നാമതാണെന്ന് എക്സൈസ്-തൊഴില്‍ വകുപ്പ് മന്ത്രി ടി.പി. രാമകൃഷ്ണന്‍ പറഞ്ഞു.  പതിനഞ്ചാമത്  സംസ്ഥാന എക്സൈസ് കലാ-കായികമേള വിക്ടോറിയ കോളെജില്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. 

പാലക്കാട് സര്‍ക്കാര്‍ മെഡിക്കല്‍ കോളേജില്‍ പ്രൊഫസര്‍/അസോസിയേറ്റ് പ്രൊഫസര്‍/അസിസ്റ്റന്റ് പ്രൊഫസര്‍/സീനിയര്‍ റസിഡന്റ് ഒഴിവുകളിലേക്ക് കരാര്‍ നിയമനത്തിന് എം.സി.ഐ മാനദണ്ഡപ്രകാരം യോഗ്യതയുളള ഡോക്ടര്‍മാരില്‍ നിന്നും അപേക്ഷ ക്ഷണിച്ചു.

അപേക്ഷകള്‍ നവംബര്‍ 14ന് മുമ്പ് ഓഫീസില്‍ ലഭിക്കണം.  വകുപ്പ്/കാറ്റഗറി അനുസരിച്ചുളള ഒഴിവുകള്‍ മെഡിക്കല്‍ കോളേജ് ഓഫീസില്‍ അറിയാം.  (ഫോണ്‍ 0491 2000644).  വിലാസം: പ്രിന്‍സിപ്പല്‍, ഇന്‍സ്റ്റിറ്റ്യൂട്ട് ഓഫ് ഇന്റഗ്രേറ്റഡ് മെഡിക്കല്‍ സയന്‍സസ് (ഗവ; മെഡിക്കല്‍ കോളേജ്), എന്‍.എച്ച് -544, ഈസ്റ്റ് യാക്കര, പാലക്കാട് -678013.

പി.എന്‍.എക്‌സ്.4815/17

* എസ്.എ.പി കോണ്‍സ്റ്റബിള്‍മാരുടെ പാസിംഗ് ഔട്ട് പരേഡില്‍ അഭിവാദ്യം സ്വീകരിച്ചു

ജില്ലയിലെ യുവജനങ്ങളെ കായികരംഗത്തെ മുഖ്യധാരയിലെത്തിക്കാന്‍ ജില്ലാ പഞ്ചായത്ത് നടപടി സ്വീകരിക്കുമെന്ന് ജില്ലാ പഞ്ചായത്ത് പ്രസിഡന്റ് അന്നപൂര്‍ണാദേവി പറഞ്ഞു. ജില്ലാ കേരളോത്സവത്തിന്റെ ഭാഗമായുള്ള കായിക മത്സരങ്ങളുടെ ഉദ്ഘാടനം ജില്ലാ സ്റ്റേഡിയത്തില്‍ നിര്‍വഹിച്ച് സംസാരിക്കുകയായിരുന്നു പ്രസിഡന്റ്. കായികക്ഷമത വര്‍ധിപ്പിക്കുന്നതിന് പരിശീലനം ആവശ്യമാണ്. ഇതിനായി വളരെ അടുക്കും ചിട്ടയോടും കൂടി മത്സരങ്ങള്‍ നടത്തി കൂടുതല്‍ പേരെ സംസ്ഥാന തല മത്സരങ്ങളില്‍ പങ്കെടുപ്പിക്കും.

അടുത്ത വര്‍ഷം (2018) ജനുവരി ഒന്നിന് സമ്പൂര്‍ണ ശുചിത്വ നഗരമായി കൊല്ലത്തെ പ്രഖ്യാപിക്കുന്നതിനുള്ള കൂട്ടായ പ്രവര്‍ത്തനങ്ങള്‍ക്ക് തുടക്കം. മാലിന്യ സംസ്‌കരണവും ശുചിത്വ അവബോധവും ഉറപ്പാക്കുന്നതിന് താഴേതട്ടില്‍ കേന്ദ്രീകരിക്കുന്ന ജനകീയ കൂട്ടായ്മയിലൂന്നിയ പ്രവര്‍ത്തനമാണ് ലക്ഷ്യമിടുന്നതെന്ന് മന്ത്രി ജെ. മേഴ്‌സിക്കുട്ടിയമ്മ അറിയിച്ചു.  സി. കേശവന്‍ മെമ്മോറിയല്‍ ടൗണ്‍ ഹാളില്‍ ചേര്‍ന്ന ശുചിത്വ കൊല്ലം സംഘാടക സമിതി ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ഡിസംബര്‍ 10 മുതല്‍ 31 വരെ നീണ്ടുനില്‍ക്കുന്ന പ്രവര്‍ത്തനത്തിലൂടെ പദ്ധതി പൂര്‍ണമായും പ്രായോഗികതലത്തിലെത്തും.

മൃഗസംരക്ഷണ മേഖലയില്‍ പ്രവര്‍ത്തിക്കുന്നവര്‍ക്ക് സഹായകരമായ അറിവുകളുടെ വിപുല ശേഖരമാണ് ദേശീയ മൃഗപക്ഷി മേളയെന്ന് മുഖ്യമന്ത്രി പിണറായി വിജയന്‍ പറഞ്ഞു. കൊല്ലം ആശ്രാമം മൈതാനത്ത് മേളയുടെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. 
പക്ഷികളെയും വളര്‍ത്തു മൃഗങ്ങളെയും പരിപാലിക്കുന്നതിനോടുള്ള ആഭിമുഖ്യം വര്‍ധിച്ചുവരുന്ന കാലമാണിത്. വരുമാന മാര്‍ഗമെന്ന നിലയിലും ഭക്ഷ്യ സുരക്ഷയ്ക്കും പ്രധാനമാണ്  വളര്‍ത്തുമൃഗങ്ങള്‍. രാജ്യത്ത് കാര്‍ഷിക വരുമാനത്തിന്റെ ഗണ്യമായ ഭാഗം സംഭാവന ചെയ്യുന്നത് മൃഗസംരക്ഷണ മേഖലയില്‍ പ്രവര്‍ത്തിക്കുന്നവരാണ്. ഇവര്‍ക്ക് കൂടുതല്‍ സംരക്ഷണം ലഭിക്കേണ്ടതുണ്ട്.

പ്രീപ്രൈമറി- പ്രൈമറി കുട്ടികള്‍ക്കായുള്ള ബാലസാഹിത്യപുസ്തക രചനയില്‍ അഭിരുചിയും താത്പര്യവുമുള്ള എഴുത്തുകാര്‍ക്കായി  കേരള സംസ്ഥാന ബാലസാഹിത്യ ഇന്‍സ്റ്റിറ്റ്യൂട്ട്  നവംബര്‍ 10,11,12 തീയതികളില്‍  നടത്താനിരുന്ന സംസ്ഥാനതലശില്പശാല ഡിസംബര്‍ 1,2,3 തീയതികളിലേക്ക് മാറ്റിവച്ചു. കോഴിക്കോട് ആരാധന ടൂറിസ്റ്റ് ഹോമില്‍ നടക്കുന്ന ശില്പശാല പ്രശസ്ത എഴുത്തുകാരന്‍ യു.എ.ഖാദര്‍ ഉദ്ഘാടനം ചെയ്യും. മൂന്ന് ദിവസത്തെ ശില്പശാലയില്‍ ബാലസാഹിത്യ രംഗത്തെ പ്രമുഖര്‍ വിവിധ സെഷനുകള്‍ നയിക്കും.എഴുത്തുകാര്‍ക്ക് തങ്ങളുടെ മനസ്സിലുള്ള ആശയങ്ങള്‍ പുസ്തകരൂപത്തില്‍ വികസിപ്പിച്ചെടുക്കാനുള്ള പരിശീലനമാണ് ശില്പശാലയിലൂടെ ലഭിക്കുക.