കേരള സംസ്ഥാന ഭാഗ്യക്കുറി ഏജന്റുമാരുടെയും വില്‍പനക്കാരുടെയും ക്ഷേമനിധി ബോര്‍ഡ് നഗരപരിധിയിലെ സ്വന്തമായി കടയില്ലാത്ത വഴിയോര വില്‍പനക്കാരായ (വില്‍പന തട്ട് ഉപയോഗിച്ച് ലോട്ടറി വില്‍പന നടത്തുന്നവര്‍)  ക്ഷേമനിധി അംഗങ്ങള്‍ക്ക് കുടുംബശ്രീ മുഖേന ബീച്ച് അംബ്രല്ല വിതരണം ചെയ്യുന്നു.  

ഗുണഭോക്താക്കളായ ലോട്ടറി ക്ഷേമനിധി അംഗങ്ങള്‍ 14 ന് വൈകിട്ട് 5 മണിക്ക് മുമ്പ് ജില്ലാ ഭാഗ്യക്കുറി ക്ഷേമനിധി ഓഫീസുമായി ബന്ധപ്പെടണം.

പി എന്‍ സി/4235/2017
 

തയ്യല്‍ തൊഴിലാളി ക്ഷേമനിധി ബോര്‍ഡില്‍ നിന്നും പെന്‍ഷന്‍ ലഭിക്കുന്ന പെന്‍ഷന്‍കാരില്‍ ഇനിയും ആധാറും മറ്റ് അനുബന്ധ രേഖകളും സമര്‍പ്പിച്ചിട്ടില്ലാത്തവര്‍ 16 ന് മുമ്പ്  സമര്‍പ്പിക്കണം.  
ക്ഷേമനിധി ബോര്‍ഡില്‍ നിന്ന് ആഗസ്ത് വരെയുളള പെന്‍ഷന്‍ ലഭിച്ചവര്‍ക്ക് കുടിശ്ശിക പെന്‍ഷന്‍ ലഭിക്കാനുണ്ടെങ്കില്‍ ജില്ലാ ഓഫിസില്‍ നിന്ന്  ക്ഷേമനിധി ബോര്‍ഡിന്റെ ചീഫ് എക്‌സിക്യുട്ടീവ് ഓഫീസര്‍ക്ക് പരാതി നല്‍കണം.  

പരാതി നല്‍കുന്നവര്‍ പെന്‍ഷന്‍ നമ്പര്‍, ഏതു കാലയളവിലാണ് ലഭിക്കാനുളളത്, അപേക്ഷകന്റെ വ്യക്തമായ വിലാസം, ഫോണ്‍ നമ്പര്‍ എന്നിവ അറിയിക്കണമെന്ന് എക്‌സിക്യുട്ടീവ് ഓഫീസര്‍ അറിയിച്ചു.

നവംബര്‍ 10, 11 തീയതികളില്‍ കണ്ണൂരിലെ വിവിധ വേദികളില്‍ നടക്കുന്ന കണ്ണൂര്‍ റവന്യൂ ജില്ലാ ശാസ്‌ത്രോത്സവത്തിന്റെ രജിസ്‌ട്രേഷന്‍ ഇന്ന്(നവംബര്‍ 9) രാവിലെ 11 ന് കണ്ണൂര്‍ മുനിസിപ്പല്‍ ഹൈസ്‌കൂളില്‍ തുടങ്ങും.  

എല്ലാ ജില്ലാ കണ്‍വീനര്‍മാരും ട്രോഫി കമ്മറ്റിയുടെ എന്‍ ഒ സി സഹിതം രജിസ്‌ട്രേഷന് ഹാജരാകേണ്ടതാണെന്ന് രജിസ്‌ട്രേഷന്‍ കമ്മിറ്റി അറിയിച്ചു.

പി എന്‍ സി/4232/2017
 

കൂത്തുപറമ്പ് ലാന്റ് ട്രിബ്യൂണല്‍ ഓഫീസില്‍9, 10, തീയതികളില്‍  നടത്താനിരുന്ന പട്ടയ കേസുകളുടെ വിചാരണ യഥാക്രമം 13, 17 തീയതികളിലേക്ക് മാറ്റിയതായി  കൂത്തുപറമ്പ് സ്‌പെഷ്യല്‍ തഹസില്‍ദാര്‍  അറിയിച്ചു.

പി എന്‍ സി/4231/2017
 

പി.കെ ശ്രീമതി ടീച്ചര്‍ എം.പിയുടെ പ്രാദേശിക വികസന പദ്ധതിയില്‍ ഉള്‍പ്പെടുന്ന 1.04 കോടിയുടെ വിവിധ പ്രവൃത്തികള്‍ക്ക് ജില്ലാ കലക്ടര്‍ ഭരണാനുമതി നല്‍കി. ജില്ലയിലെ ഒന്‍പത് സ്ഥലങ്ങളില്‍ ഹൈമാസ്റ്റ് ലൈറ്റ് സ്ഥാപിക്കുന്നതില്‍ 54 ലക്ഷം രൂപ, 13 സ്‌കൂളുകള്‍ക്ക് കംപ്യൂട്ടറുകളും അനുബന്ധ ഉപകരണങ്ങളും വാങ്ങാന്‍ 26.1 ലക്ഷം, എടച്ചേരി നായനാര്‍ റോഡ് ടാര്‍ ചെയ്യുന്നതിന് 10 ലക്ഷം, മൂന്നു സ്‌കൂളുകളില്‍ സ്മാര്‍ട്ട് ക്ലാസ് റൂം ഉപകരണങ്ങള്‍ വാങ്ങാന്‍ 9 ലക്ഷം, കണ്ണൂര്‍ കോര്‍പറേഷന്‍ പരിധിയിലെ മാളികപ്പറമ്പ് എസ്.സി കോളനിയില്‍ മൂന്ന് സോളാര്‍ ലൈറ്റുകള്‍ സ്ഥാപിക്കുന്നതിന് 5.25 ലക്ഷം എന്നിങ്ങനെയാണ് തുക അനുവദിച്ചത്. 

പൊതുവിദ്യാലയങ്ങളിലെ കുട്ടികളെ വായനയുടെ ലോകത്തേക്ക് നയിക്കാന്‍ പൊതു വിദ്യാഭ്യാസ വകുപ്പും സര്‍വശിക്ഷാ അഭിയാനും നടപ്പിലാക്കുന്ന നല്ലവായന, നല്ല പഠനം, നല്ല ജീവിതം പദ്ധതിയുടെ ഭാഗമായി  ഉപജില്ലയിലെ 102 വിദ്യാലയങ്ങളില്‍ ലൈബ്രറി പുസ്തക ങ്ങള്‍ വിതരണം ചെയ്തു. പുസ്തക വിതരണത്തിന്റെ ഉദ്ഘാടനം പി.കെ ശ്രീമതി ടീച്ചര്‍ എം.പി നിര്‍വഹിച്ചു. 

കണ്ണൂര്‍ ചെറുതാഴം മണ്ടൂരില്‍ ബസുകള്‍ കൂട്ടിയിടിച്ച് മരിച്ച പാപ്പിനിശ്ശേരിയിലെ മുസ്തഫ (58), ഏഴോം മൂലയിലെ പി.പി. സുബൈദ (48),  മുഫീദ് (18), ചെറുകുന്നിലെ സുജിത് പട്ടേരി (35), പയ്യന്നൂര്‍ പെരുമ്പയിലെ കരീം (44) എന്നിവരുടെ അവകാശികള്‍ക്ക് ഒരു ലക്ഷം രൂപ വീതം നല്‍കാന്‍ സംസ്ഥാന മന്ത്രിസഭാ യോഗം തീരുമാനിച്ചു.

ഗുരുതരമായി പരിക്കേറ്റ രണ്ടുപേര്‍ക്ക് 50,000 രൂപ വീതവും മറ്റുളള 11 പേര്‍ക്ക് 10,000 രൂപ വീതവും മുഖ്യമന്ത്രിയുടെ ദുരിതാശ്വാസ നിധിയില്‍നിന്നും ധനസഹായം അനുവദിച്ചു.

പി എന്‍ സി/4230/2017
 

ചിറ്റൂര്‍ ഗവ.വൊക്കേഷനല്‍ ഹയര്‍ സെക്കന്‍ഡറി സ്‌കൂളില്‍ വൊക്കേഷനല്‍ ഇന്‍സ്ട്രക്റ്റര്‍ എം.എസ്.അഗ്രോ തസ്തികയില്‍ താത്കാലിക ഒഴിവുണ്ട്.

മെക്കാനിക്കല്‍ എഞ്ചിനീയറിങില്‍ /അഗ്രിക്കള്‍ച്ചറല്‍ എഞ്ചിനീയറിങ് മൂന്ന് വര്‍ഷത്തെ ഡിപ്ലൊമയുള്ളവര്‍ക്ക് അപേക്ഷിക്കാം. യോഗ്യത, പ്രവൃത്തി പരിചയം തെളിയിക്കുന്ന സര്‍ട്ടിഫിക്കറ്റുകളുമായി നവംബര്‍ 10 രാവിലെ 11ന് കൂടിക്കാഴ്ചയ്‌ക്കെത്തണമെന്ന് പ്രിന്‍സിപ്പല്‍ അറിയിച്ചു.

ഫോണ്‍ : 04923 222174.
 

സര്‍ക്കാര്‍-എയ്ഡഡ് സ്‌കൂളുകളില്‍ ഒന്ന് മുതല്‍ 10 വരെ ക്ലാസ്സുകളിലെ ഒ.ഇ.സി. സ്‌കോളര്‍ഷിപ്പിന് അര്‍ഹരായ വിദ്യാര്‍ഥികളുടെ  വിവരങ്ങള്‍ ഓണ്‍ലൈനായി അപേക്ഷിച്ചതിന് ശേഷം ബെനിഫിഷറി ലിസ്റ്റ് കിട്ടിയിട്ടും ബാങ്ക് അക്കൗണ്ടുകളില്‍ ആനുകൂല്യം ക്രെഡിറ്റാവാത്ത സ്‌കൂളുകള്‍ വിവരം അറിയിക്കണം.

പിന്നാക്ക വിഭാഗ വികസന വകുപ്പിന്റെ കോഴിക്കോട് മേഖലാ ഓഫീസില്‍ സ്‌കൂള്‍ കോഡ്, ബാങ്ക് അക്കൗണ്ട് വിവരങ്ങള്‍ രേഖാമൂലം നല്‍കണമെന്ന് ഡെപ്യൂട്ടി ഡയറക്ടര്‍ അറിയിച്ചു.

ഫോണ്‍ : 0495 2377786.
 

പാലക്കാട് മെഡിക്കല്‍ കോളെജില്‍ പ്രൊഫസര്‍, അസോസിയെറ്റ് പ്രൊഫസര്‍ , സീനിയര്‍ റസിഡന്റ് അധ്യാപക തസ്തികകളിലേയ്ക്ക് കരാറടിസ്ഥാനത്തില്‍ നിയമനം നടത്തും. ഒപ്‌ടോമെട്രിസ്റ്റ് , എസ്.റ്റി.ഐ. കൗണ്‍സലര്‍, (ഡെര്‍മറ്റോളജി) തസ്തികകളിലേയ്ക്കും നിയമനം നടത്തും.

ഉദ്യോഗാര്‍ഥികള്‍ നവംബര്‍ 14 വൈകീട്ട് അഞ്ചിനകം അപേക്ഷിക്കണം. ഫോണ്‍ : 0491 2000644.